Guharūra 3 - Bibliya Yera 1951 1967 (Burundi)

Imana itanga Abalewi ngo bakorere abaherezi

¹ Uru ni rwo ruvyaro Aroni na Mose bari bafise igihe Uhoraho yavuganira na Mose ku musozi Sinayi.

² Aya ni yo mazina ya bene Aroni: imfura yiwe ni Nadabu, agakurikirwa na Abihu na Eleyazari na Itamari.

³ Ayo ni yo mazina ya bene Aroni, abaherezi bāsutswekw amavuta yo kubarobanura, bagashikirizwa ibango ry’ ubuherezi.

⁴ Mugabo Nadabu na Abihu bāpfiriye imbere y’Uhoraho, igihe bāmwosereza imibavu ku muriro urahuwe ahandi, bari mu bugaragwa bg’i Sinayi; bapfa ar’ incike. Ariko Eleyazari na Itamari bāshishikara ibango ry’ ubuherezi imbere ya se Aroni.

⁵ Uhoraho abarira Mose,

⁶ at’ Igiza hafi umuryango wa Lewi, ubashire imbere ya Aroni umuherezi, kugira ngo bamutumikire:

⁷ bamutumikire mu vyo yagezweko, no mu vy’ ishengero ryose ryagezweko, imbere y’ihema ry’ ibonaniro; bakore n’ibikorwa vy’ iryo hema.

⁸ Bazezwe ibintu vyose vyo mw ihema ry’ibonaniro, batumikire n’ishengero ry’Abisirayeli mu vyo ryagezweko, bakore n’ibikorwa vy’iryo hema.

⁹ Nukw Abalewi ubashikirize Aroni n’ abana biwe, arabahawe arabeguriwe, barobanuwe mu Bisirayeli.

¹⁰ Ushireho Aroni n’abana biwe, abe ari bo bazezwa igikorwa c’ubuherezi bgabo: kand’ uwundi wese atar’ uwo muri bo yovyēgēra akavyitamwo, aze yicwe.

¹¹ Uhoraho abarira Mose,

¹² ati Rāba jewe nisobanuriye Abalewi mu Bisirayeli bandi, ngo babe mu gishingo c’abana bose b’ubuzibūra bg’Abisirayeli: Abalewi bose bazoba abanje niharije.

¹³ Kukw abana bose b’imfura ar’ abanje: ku musi nicirakw abana bose b’imfura bo mu gihugu ca Egiputa, ni ho nirobanuriye imfura zose zo mu Bisirayeli nkazēza, iz’ abantu bo n’uburiza bg’ibitunzwe: bizoba ivyanje; nd’ Uhoraho.

Uhoraho avuga ko baharūra Abalewi

¹⁴ Uhoraho abaririra Mose mu bugaragwa bg’i Sinayi,

¹⁵ ati Harūra Abalewi, nk’ukw amazu ya ba sekuruza ari, nk’ukw imiryango yabo iri: uharūre izinamuhungu wese, uhereye ku bamaze ukwezi kumwe ukaja hejuru.

¹⁶ Nuko Mose arabaharūra, nk’ukw ijambo ry’Uhoraho ryavuze: agira nk’uko yabariwe.

¹⁷ Aba ni bo bana ba Lewi, ukw amazina yabo akurikirana: Gerushoni na Kohati na Merari.

¹⁸ Aya ni yo mazina ya bene Gerushoni, nk’ukw imiryango yabo iri: Libuni na Shimeyi.

¹⁹ Aba ni bo bene Kohati, nk’ukw imiryango yabo iri: Amuramu na Isihari na Heburoni na Uziyeli.

²⁰ Aba ni bo bene Merari, nk’ukw imiryango yabo iri: Mahili na Mushi. Iyo ni yo miryango y’Abalewi, nk’ ukw amazu ya ba sekuruza ari.

²¹ Abākomōtse kuri Gerushoni n’umuryango w’Abalibuni n’uw’ Abashimeyi: iyo ni yo miryango ya ba Gerushoni.

²² Abāharūwe bo muri bo, nk’ukw igitigiri c’izinamuhungu wese cari kiri, uhereye ku bamaze ukwezi kumwe no kuja hejuru, bār’ ibihumbi ndwi n’amajana atanu.

²³ Ab’ imiryango ya ba Gerushoni bāsagaza inyuma ya rya hema ahahera i burengerazuba.

²⁴ Umukuru w’ inzu ya ba sekuruza b’aba Gerushoni yari Eliyasafu mwene Layeli.

²⁵ Ivy’ ihema ry’ibonaniro aba Gerushoni bāzēzwa vyar’ ihema ry’imbere, n’ihema ryo hejuru, n’ico kurenza hejuru yaryo, n’ igihuzu cakinga ku muryango w’iryo hema ry’ibonaniro nyene,

²⁶ n’impuzu zo kubamba ngo zibe urugo, n’igihuzu cakinga mw irembo ry’urwo rugo rukīkūza ihema n’igicaniro, n’imigozi, n’ ibikorwa vyavyo vyose.

²⁷ Abākomōtse kuri Kohati n’ umuryango w’Abamuramu n’uw’ Abisihari n’uw’ Abaheburoni n’uw’ Abuziyeli: iyo ni yo miryango y’aba Kohati.

²⁸ Nk’ukw igitigiri c’izinamuhungu wese cari kiri, uhereye ku bamaze ukwezi kumwe no kuja hejuru, bar’ ibihumbi munani n’amajana atandatu: ni bo bāzēzwa ivy’ Ahēra.

²⁹ Ab’ imiryango y’aba Kohati bāsagaza ku ruhande rw’iryo hema ahahera i bumanuko.

³⁰ Umukuru w’inzu ya ba sekuruza b’aba Kohati yari Elisafani mwene Uziyeli.

³¹ Ivyo bāzēzwa yar’ isandugu n’ameza n’ico guterekwakw amatara, n’ibicaniro vyompi, n’ibintu vy’Ahēra vyo gukoresha, n’igihuzu co gukingīra Ahēra, n’ibikorwa vyavyo vyose.

³² Eleyazari mwene Aroni umuherezi ni we yagizwe mukuru kuri ba bakuru b’Abalewi, ngw abgirize abājējwe ivy’ Ahēra.

³³ Abākomōtse kuri Merari n’umuryango w’Abamahili n’uw’ Abamushi: iyo ni yo miryango y’aba Merari.

³⁴ Abāharūwe bo muri bo, nk’ukw igitigiri c’izinamuhungu wese cari kiri, uhereye ku bamaze ukwezi kumwe no kuja hejuru, bār’ ibihumbi bitandatu n’amajana abiri.

³⁵ Umukuru w’inzu ya ba sekuruza b’aba Merari yari Suriyeli mwene Abihayili; abo ni bo bāsagaza ku ruhande rw’iryo hema ahahera i burārūko.

³⁶ Aba Merari, ivyo bāshingiwe kuzēzwa zar’ imbaho z’iryo hema, n’ibiti vyo gusobeka muri zo, n’inkingi zaryo, n’ibitereko vyo kuzinegamwo, n’ibintu vyaryo vyose, n’ibikoreshwa vyaryo vyose;

³⁷ n’ibirimbi vy’ urugo rwo kurikīkūza, n’ibitereko vyavyo vyo kubinegamwo, n’ imambo zavyo n’imigozi yavyo.

³⁸ Abāshinga amahema yabo imbere y’iryo hema ahahera i burasirazuba, yari Mose bo na Aroni n’abana biwe; ni bo bāzēzwa igikorwa c’Ahēra, n’ibindi bākora kubg’ Abisirayeli; kand’ uwundi wese atar’ uwo muri bo yovyēgēra akavyitamwo, yar’ akwiye kwicwa.

³⁹ Abāharūwe bo mu Balewi, abo Mose na Aroni bāharūye, nk’uk’ Uhoraho yabibabariye, bār’ ibihumbi mirongwibiri na bibiri, nk’ukw imiryango yabo iri, izinamuhungu wese, uhereye ku bamaze ukwezi kumwe ukaja hejuru.

⁴⁰ Uhoraho abarira Mose, ati Harūra izinamuhungu wese mu bana b’imfura b’Abisirayeli, uhereye ku bamaze ukwezi kumwe ukaja hejuru, ubaharūre nk’ukw amazina yabo ari.

⁴¹ Unshingūrire Abalewi, ubashire mu gishingo c’imfura zose z’Abisirayeli: nd’Uhoraho; kand’ unshingūrire n’amasho n’imikuku vy’Abalewi, ubishire mu gishingo c’ivy’ uburiza bgose bg’amasho n’imikuku vy’Abisirayeli.

⁴² Nuko Mose aharūra imfura zose zo mu Bisirayeli, nk’uk’ Uhoraho yamubariye.

⁴³ Abahungu b’imfura bose bāharūwe, uhereye ku bamaze ukwezi kumwe no kuja hejuru, nk’ukw igitigiri c’amazina yabo kiri, abāharūwe bār’ ibihumbi mirongwibiri na bibiri n’amajana abiri na mirongwirindwi na batatu.

⁴⁴ Uhoraho abarira Mose,

⁴⁵ ati Shingūra Abalewi, ubashire mu gishingo c’imfura zose z’Abisirayeli, n’amasho n’imikuku vy’ Abalewi ubishire mu gishingo c’ivyabo; Abalewi babe abanje niharije: nd’Uhoraho.

⁴⁶ Kand’ abana b’imfura b’Abisirayeli basigaye, ukw ar’ amajana abiri na mirongwirindwi na batatu, basāgutse ku gitigiri c’Abalewi,

⁴⁷ uz’ ubāke shekeli zitanu kw incungu, umuntu umwe‐umwe ku mutwe wiwe; shekeli uzokwāka zize zibe izigezwe kuri shekeli ir’ Ahēra: shekeli imwe irimwo gera mirongwibiri.

⁴⁸ Ayo mahera acunguye abasāgutse uyahe Aroni n’abana biwe.

⁴⁹ Nuko Mose yāka amahera y’incungu abo bāsāgutse ku bācunguwe n’Abalewi:

⁵⁰ amahera yātse abo bana b’ imfura b’Abisirayeli aba shekeli igihumbi n’amajana atatu na mirongwitandatu na zitanu, zigezwe kuri shekeli ir’ Ahēra.

⁵¹ Ayo mahera y’incungu Mose ayaha Aroni n’abana biwe, nk’ukw ijambo ry’Uhoraho ryavuze, nk’uk’ Uhoraho yageze Mose.