EZEKIYELI 18 - Bibliya Yera 1951 1967 (Burundi)

Umuntu wese ni we azokwibarizwa ivyo yakoze

¹ Ijambo ry’Uhoraho ryongera kunzako,

² riti N’iki gituma mucira uyu mugani mu gihugu c’i Bgisirayeli, ngo Ba se barya inzabibu z’ibitumbge, amenyo y’abana akajiginyurwa?

³ Ndahiye ukubaho kwanje, ni k’Umwami Uhoraho agize, ntimuzokwongera kuronka inyanduruko yo guca uwo mugani mu Bisirayeli.

⁴ Eh’ abantu bose n’ abanje; nk’uk’ umwana ar’ uwanje, ni ko na se ar’ uwanje: umuntu akora icaha ni we azopfa.

⁵ Arik’ umuntu namb, ar’ umugororotsi, agakora ibitunganye n’ ibikwiye,

⁶ akaba atārīriye mu bitabo ku misozi, ntiyunamurire amaso ibigirwamana vy’inzu ya Isirayeli, kand’ akaba atononnye umugore wa mugenzi we, akaba atēgereye umugore mu gihe ari mu miziro;

⁷ atāgize uwo agunga, arikw akaba yarashubije ingwati nyeneyo; atāgize uwo anyaga ku gahahazo, arikw akaba yaragaburiye ūshonje, akambika impuzu uwambaye ubusa;

⁸ akaba atāgurāniye kuzohabga ay’ inyungu, canke ngo yake ibirenzeko na bikeya, arikw agatinyisha ukuboko kwiwe ivyaha, agaca ururoranye ku muntu na mugenzi we,

⁹ akagendera mu vyagezwe vyanje, akitondera amabgirizwa yanje ngw akore ivy’ ukuri; ben’ uyo aba ar’ umugororotsi, ntazobura kubaho, ni k’Umwami Uhoraho agize.

¹⁰ Arikw avyaye umwana akaba umwambuzi, akaba n’umwicanyi, akagira ico akora muri ben’ ivyo,

¹¹ ntagire ico akora co mu vyari bikwiye, arikw akarīra mu bitabo ku misozi, akonona umugore wa mugenzi we,

¹² akagunga impahazwa n’umukene, akanyaga ku gahahazo, akima ingwati nyeneyo, akunamurira amaso ibigirwamana, kand’ agakora ibizira,

¹³ akagurānira kuzohabga ay’ inyungu, akāka ibirenzeko: ben’ uyo mbega yobaho? Eka ntiyobaho: ko yoba yarakoze ivyo bizira vyose, ntiyobura gupfa; kand’ amaraso yiwe azoba kuri we.

¹⁴ Nuko rero n’uyo na we yovyara umwana, akitegereza ivyaha vyose vya se yakoze, agatinya, ntakore ibisa na vyo,

¹⁵ kand’ akaba atārīriye mu bitabo ku misozi, ntiyunamurire amaso ibigirwamana vy’inzu ya Isirayeli, ntiyonone umugore wa mugenzi we,

¹⁶ ntāgire uwo agunga, ntāgire uwo yaka ingwati, ntānyage ku gahahazo, arikw akaba yaragaburiye ūshonje, akambika impuzu uwambaye ubusa,

¹⁷ agatinyisha ukuboko kwiwe ngo ntigufyonderanye impahazwa, akaba atāgurāniye kuzohabga ay’ inyungu, ntiyake ibirenzeko, arikw agashitsa amabgirizwa yanje, akagendera mu vyagezwe vyanje: uyo ntazopfa azira ibigabitanyo vya se, mbere ntazobura kubaho.

¹⁸ Ariko se wiwe, kuko yahahaza cane, akanyaga mugenzi we ku gahahazo, agakora ibitaroranye mu bgoko bgabo, uyo ni we azopfa azize ibigabitanyo vyiwe.

¹⁹ Yamara muravuga ng’ Umwana n’iki kimubujije kuzira ibigabitanyo vya se? Ereg’ umwana ni yakora ibitunganye n’ibikwiye, akitondera ivyagezwe vyanje vyose, akabishitsa, ntazobura kubaho.

²⁰ Umuntu akora icaha ni we azopfa: umwana ntazozira ibigabitanyo vya se, na se ntazozira ibigabitanyo vy’umwana wiwe; ubugororotsi bg’umugororotsi azobuharūrwako, ivyaha vy’umunyavyaha azobiharūrwako.

²¹ Arik’ umunyavyaha ni yahindukira akava mu vyaha vyiwe vyose yakora, akitondera ivyagezwe vyanje vyose, agakora ibitunganye n’ibikwiye, n’ukuri azobaho, ntazopfa.

²² Ibicumuro vyiwe vyose yacumuye nta na kimwe kizokwibukwa ngo gishirwe kuri we; azobeshwaho n’uko yakoze ivy’ ukugororoka.

²³ Mbega mugira ngo mpimbarwa n’uk’ umunyavyaha apfa? ni k’ Umwami Uhoraho abaza; ikimpimbara s’uko yohindukira akava mu ngeso ziwe akabaho?

²⁴ Arik’ umugororotsi ni yahindukira akava mu bugororotsi bgiwe, agakora ivy’ ukugabitanya, akīgāna ibizira vyose umunyakibi akora, mbega yobaho? Mu bikorwa vy’ubugororotsi vyose yakoze, nta na kimwe kizokwibukwa: ubuhemu bgiwe yagize, n’ivyaha vyiwe yakoze, ni vyo azopfa azize.

²⁵ Yamara muravuga, mut’ Inzira y’Umwami Imana ntiroranye. Enda ni mwumve, mwa b’inzu ya Isirayeli: mbega mugira ngw inzira yanje ni yo itaroranye? Non’ izanyu nzira si zo zitaroranye?

²⁶ Umugororotsi ni yahindukira akava mu bugororotsi bgiwe, agakora ivy’ ukugabitanya, azopfa abizize; ibigabitanyo vyiwe yakoze ni vyo azopfa azize.

²⁷ Ariko kandi, umunyavyaha ni yahindukira akava mu vyaha vyiwe yakora, agakora ibitunganye n’ ibikwiye, azokiza ubugingo bgiwe urupfu.

²⁸ Kuko yīrīmbūye agahindukira akava mu bicumuro vyiwe vyose yakoze, n’ukuri azobaho, ntazopfa.

²⁹ Yamar’ ab’ inzu ya Isirayeli baravuga, ngw Inzira y’Umwami Imana ntiroranye. Mwa b’inzu ya Isirayeli, mbega mugira ngw inzira yanje ni yo itaroranye? Non’ izanyu nzira si zo zitaroranye?

³⁰ Ni co gituma, yemwe ab’ inzu ya Isirayeli, ngira mbacire urubanza, umuntu wese nk’ukw inzira ziwe zimeze, ni k’Umwami Uhoraho agize. Ni mugaruke, muhindukire muve mu bicumuro vyanyu vyose, ibigabitanyo vyoye kubazanira kugesezwa.

³¹ Ni mute kure ibicumuro vyanyu vyose mwacumuye, mwironkere umutima musha n’impwemu nsha: n’iki gituma mugomba gupfa, yemwe ab’ inzu ya Isirayeli?

³² Erega simpimbarwa n’ urupfu rw’ūpfuye, ni k’Umwami Uhoraho agize: nuko ni muhindukire, mubeho.