Abaroma 2 - Bibliya Yera 1951 1967 (Burundi)

Abayuda n’abo gutsindwa n’urubanza nk’abandi

¹ Ni co gituma utagira ico wireguza, wewe muntu wese uhinyura uwundi. K’uhinyura uwundi, uba witsindishije; kuko wewe umuhinyura ukora bimwe n’ivy’ akora.

² Ariko turazi yuk’ urubanza rw’Imana ar’ urw’ ukuri, urwo icira abakora ibisa birtyo.

³ Wewe ga muntu, uhinyura abakora ibisa birtyo, nawe ubikora, mbega wiyumvira yuk’ uzokira urubanza Imana ica?

⁴ Cank’ ukēngēra itunga ryo kugira neza kwayo n’iry’ imbabazi zayo n’iry’ ukwihangana kwayo? Ntuzi yuko kugira neza kw’Imana kugushikana ku kwihana?

⁵ Ariko kuk’ ufise umutima ukomantaye utihana, wirindiriza uburake buzoba ku musi wo kuraka, ah’ amateka abereye y’Imana azohishurirwa,

⁶ izokwishura umuntu wese ibikwiranye n’ivyo yakoze.

⁷ Abarondera ubgiza n’icubahiro no kudapfa, bahora bakora ivyiza bihanganye, izobishura ubugingo budashira.

⁸ Ariko ku bakēbana ntibumvire ivy’ ukuri, ariko bakumvira ukugabitanya, hazoba uburake no guhambarirwa

⁹ n’amarushwa n’ivyago ku bugingo bg’umuntu wese akora ibibi, uhereye ku Muyuda, ukageza ku Mugiriki.

¹⁰ Arik’ ubgiza n’icubahiro n’amahoro bizoba ku muntu wese akora ivyiza, uhereye ku Muyuda, ukageza ku Mugiriki,

¹¹ kukw Imana itarobanura abantu ku cubahiro.

¹² Abākoze ivyaha bose, batazi ivyagezwe, bazohona ivyagezwe bitarinze kwiyumvirwa; kand’ abākoze ivyaha bose bazi ivyagezwe bazotsindishwa n’ivyagezwe:

¹³ kukw abumvise ivyagezwe atari bo bagororoka imbere y’Imana, abāvyumviye ni bo bazotsindanishirizwa.

¹⁴ Abanyamahanga badafise ivyagezwe n’Imana iyo bakoze ibibgirizwa na vyo kubgabo, baba bihindukiye ivyagezwe naho batabifise:

¹⁵ kuko berekana igikorwa kibgirijwe n’ivyagezwe canditswe mu mitima yabo, ijwi ryo mu mitima yabo ribgiririkanya na co, ar’ icabona cavyo, kand’ ivyo biyumvira bifatanya kubarega canke kubaregura.

¹⁶ Ni ko bizoba ku musi Imana izocira amabanga y’abantu amateka muri Yesu Kristo, nk’uk’ ubutumwa bgiza nahawe buvuga.

¹⁷ Ko witwa Umuyuda, ukishimira ivyagezwe, ukirata Imana,

¹⁸ ukamenya ivy’ igomba, ukarobanura ibidahwana, kuko wigishijwe ivy’ ivyagezwe,

¹⁹ ukishima yuk’ ushobora kujana impumyi, kandi k’ur’ umuco w’abari mu mwiza,

²⁰ n’umuhanūzi w’abanyabgenge buke, n’umwigisha w’utwana, kuko mu vyagezwe ufise icerekana ubgenge n’ukuri:

²¹ nuko wewe wigisha abandi, mbega ntiwiyigisha? Wewe wihaniza abība, weho ntiwiba?

²² Wewe ubabuza gusambana, weho ntusambana? Wewe wanka ibishushanyo vy’ibigirwamana, weho ntiwiba ivyo mu nsengero zavyo?

²³ Wewe wirata ivyagezwe, mbega ntugayisha Imana kuk’ ubicumurako?

²⁴ Izina ry’Imana muritukisha mu mahanga, nk’uko vyanditswe.

²⁵ Kuko gukebga kugira ico kukumarira, iyo witondeye ivyagezwe: arikw iy’ ucumuye ku vyagezwe, ugukebga kwawe kuba gucitse ukudakebga.

²⁶ Non’ ūtākebge ni yitondera ibibgirijwe n’ivyagezwe, mbega kudakebga kwiwe ntikuzomuharūrwako nko gukebga?

²⁷ Kand’ ūtākebge umubiri ni yitondera ivyagezwe, azogutsindisha, wewe ucumura ku vyagezwe, ufise inyuguti zavyo no gukebga.

²⁸ Kuk’ Umuyuda wo ku rukoba atari we Muyuda; kand’ ugukebga kwo ku rukoba kwo ku mubiri atari kwo gukebga.

²⁹ Arik’ Umuyuda wo mu mutima ni we Muyuda, kandi gukebga n’ukw’ umutima, n’ukwo mu buryo bg’impwemu, atar’ ukwo mu buryo bg’inyuguti: ūmeze artyo ntashimwa n’abantu, arikw ashimwa n’Imana.