Abalewi 27 - Bibliya Yera 1951 1967 (Burundi)

Ivyagezwe vyo gushitsa amasezerano

¹ Uhoraho abarira Mose,

² ati Barira Abisirayeli, ut’ Umuntu ni yashitsa isezerano yansezeraniye jewe Uhoraho, riherereye ku citwa izinamuntu, uwo yasezeranywe az’ acunguzwe igiciro uzocira.

³ Umuhungu cank’ umugabo, uhereye k’ūmaze imyaka mirongwibiri gushitsa k’ūshikanye mirongwitandatu, uzoba ukwiye kumucira shekeli z’ifeza mirongwitanu, zagezwe kuri shekeli ir’ Ahēra.

⁴ Ni yaba umukobga cank’ umugore, uzoba ukwiye kumucira shekeli mirongwitatu.

⁵ Kand’ uhereye k’ūmaze imyaka itanu gushitsa k’ūshikanye mirongwibiri, ni yaba umuhungu uzoba ukwiye kumucira shekeli mirongwibiri, ni yaba umukobga, umucire icumi.

⁶ Kand’ uhereye k’ūmaze ukwezi kumwe gushitsa k’ūshikanye imyaka itanu, ni yaba umuhungu uzoba ukwiye kumucira shekeli z’ifeza zitanu, ni yaba umukobga, umucire zitatu.

⁷ Kand’ uhereye k’ūrengeje imyaka mirongwitandatu, ni yaba umugabo uzoba ukwiye kumucira shekeli z’ifeza cumi na zitanu, ni yaba umugore umucire icumi.

⁸ Arik’ uwasezeranye ni yaba umworo, ntashobore ico waciriye, baze bamujane imbere y’umuherezi, uwo muherezi amucire ico akwiye: amucire igiciro gihwanye n’ico uwasezeranye ashobora gutanga.

⁹ Ni caba ar’ igitunzwe co mu vyo basanzwe bampakw ibimazi, ic’ ari co cose co muri ben’ ivyo umuntu azonshikanira jewe Uhoraho, ico kizoba icera.

¹⁰ Ntaz’ akiguze ico bidahuje, canke ngw agikābe ikindi, ari ciza ngw agikābe ikibi, cank’ ari kibi ngw agikābe iciza: na ho ni yagikāba ikindi, icākābge bo n’ico yagikāvye, vyompi bizoba ivyera.

¹¹ Kandi ni caba ar’ igitunzwe co mu bisanzwe bizira, co mu vyo batāhora bampakw ibimazi, az’ akijane imbere y’umuherezi;

¹² uwo muherezi agicire igiciro kimaze, gihwanye n’ukw ari ciza cank’ ari kibi; igiciro uwo muherezi azogicira, kize kibe ico.

¹³ Arik’ uwagitanze, ni yagomba kucicungurira, akigerekeko n’ikingana n’ikigira gatanu caco, nk’ uko caciriwe.

¹⁴ Umuntu ni yarobanura inzu yiwe, akayimpa ngw ibe iyera, umuherezi az’ ayicire igiciro imaze, gihwanye n’ukw ari nziza cank’ ari mbi; igiciro uwo muherezi azoyicira, kize kigume uko.

¹⁵ Arik’ uwayirobanuye akayitanga, ni yagomba kuyicungurira, ayigerekeko n’ikingana n’ikigira gatanu cayo, nk’uko yaciriwe, ibone kuba iyiwe.

¹⁶ Umuntu ni yarobanura igice co kw itongo ryo mw ishamvu yiwe, akakimpa, mu kuhacira uz’ urīmbūre imbuto yohabibga ukw ingana: ni haba hokwirwa n’ ingero yitwa homeru ya sayiri, uhacire shekeli z’ifeza mirongwitanu.

¹⁷ Nuko ni yahēra mu mwaka wa yubile, akarobanura iyo ndimiro yiwe, haze hagume ico giciro waciriye.

¹⁸ Na ho ni yarobanura iyo ndimiro yiwe inyuma ya yubile, umuherezi az’ acire uyo amahera, arīmbūye imyaka igisigaye gushitsa ku mwaka wa yubile wundi, amanure igiciro ku vyo waciriye.

¹⁹ Arik’ uwarobanuye iyo ndimiro, ni yagomba kuyicungurira, agerekeko n’ikingana n’ikigira gatanu cayo, nk’uko wayiciriye, ibone kuba iyiwe bgite.

²⁰ Na ho n’atāgomba kuyicungura, arikw akayigurira uwundi, nta kundi kuzoyicungura hanyuma:

²¹ arikw iyo ndimiro ni yakomōrwa n’umwaka wa yubile, izoba icitse iyera yanje, nk’iyatanzwe kuba inyegu yanje; izokwegukira umuherezi.

²² Kand’ umuntu ni yarobanura indimiro, akayimpa, ar’ iyo yaguze, itar’ iyo mw itongo ryo mw ishamvu yiwe;

²³ umuherezi az’ acire uyo igiciro gihwanye n’ico waciriye kuzoshitsa ku mwaka wa yubile: az’ atange kur’ uwo musi igiciro waciriye, kibe ikintu canje cera.

²⁴ Maze mu mwaka wa yubile, iyo ndimiro iz’ isubizwe uwayiguzweko, nyen’ ishamvu iryo tongo ririmwo.

²⁵ Kand’ igiciro cose uzohora ucira, kize kibe shekeli zagezwe kuri shekeli ir’ Ahēra: shekeli imwe ikwiye kubamw’ ingero yitwa gera mirongwibiri.

²⁶ Arikw ic’ uburiza co mu bitunzwe, ntihaze hagire umuntu akirobanura ngw agitange, kuko na kare ivy’ uburiza vyari bisanzwe ar’ ivyanje; ar’ inka cank’ intama, n’iyanje.

²⁷ Na ho ni caba ico mu bitunzwe bizira, uwo muntu az’ agicungure nk’uko waciriye, akigerekeko n’ikingana n’ikigira gatanu caco; ariko ni kitacungurwa, kize kigurwe nk’uko waciriye.

²⁸ Mugabo, ishikanwa ry’ikintu gitanzwe kuba inyegu yanje, ico umuntu azonshikanira akinyeguriye, mu vyo afise ivy’ ari vyo vyose, yaba umuntu, yaba igitunzwe, cank’ indimiro yo mw ishamvu yiwe, ntihaze hagire ben’ ico kigurwa canke ngo gicungurwe: ben’ iryo shikanwa ry’ikintu catanzwe kw inyegu n’icera cane kuri jewe Uhoraho.

²⁹ Uwo abantu baciriyekw iteka barunduye, ntaz’ acungurwe; aze yicwe ata kabuza.

³⁰ Mu vyeze mu gihugu, vyaba ivyo mu ndimiro, cank’ ivyamye ku biti, ikigiracumi c’ivyo vyose n’icanje, jewe Uhoraho: n’icera canje.

³¹ Maz’ umuntu ni yagomba gucungura ikigiracumi ciwe mur’ ivyo, ico agicunguje akigerekekw ikingana n’ikigiragatanu caco.

³² Kandi mu masho no mu mikuku, uko zigenda ziharūzwa inkoni, ikigiracumi co mur’ izo zose kize kibe icera canje, jewe Uhoraho.

³³ Umuntu ntaze yibaze kw ari nziza canke kw ari mbi, canke ngw ayikābe iyindi: na ho ni yayikāba iyindi, iyakābge bo n’iyo yayikāvye, zompi zizoba izera: īgira icumi ntiz’ icungurwe.

³⁴ Ivyo ni vyo vyagezwe Uhoraho yagereye Mose ku musozi Sinayi, ngw abishikirize Abisirayeli.