Abalewi 21 - Bibliya Yera 1951 1967 (Burundi)

Ukw abaherezi bakwiye kwirinda kutiyanduza

¹ Uhoraho abarira Mose, ati Barira abaherezi bene Aroni, uti Ntihaze hagire umuherezi yiyandurisha ūpfuye wo mu bgoko bgabo;

² shit’ uwo mu muryango wo hafi, nyina, canke se, cank’ umuhungu wiwe, cank’ umukobga wiwe, canke mukuru we, canke murumuna we,

³ canke mushiki we akir’ imvyiruke, akimuzeyeko vyose, kukw atararongorwa: uwo we biremerwa ko yomwanduza.

⁴ Kw ar’ umukuru mw ihanga ryabo, ntaze yiyanduze ngo yiyonone.

⁵ Abaherezi ntibaze bimoshe inkomvorera, canke ngo bacācūre imitwe y’ubganwa bgabo, canke ngo bikebagure ku mibiri.

⁶ Baze bambere abera, jewe Imana yabo, ntibatukishe izina ryanje, Imana yabo; kukw ari bo bampēreza ibimazi, jewe Uhoraho, bitōngōrwa n’umuriro, ari zo mfungurwa zanje, Imana yabo: ni co gituma bakwiye kuba abera.

⁷ Ntihaze hagire uwābira maraya muri bo, cank’ uwamaze kwononekara, kandi ntihagire uwābīra uwirukanywe n’umugabo wiwe: kuk’ umuherezi ar’ uwera kuri jewe, Imana yiwe.

⁸ Ni co gituma mukwiye kumwita uwera, kukw ari we ampēreza imfungurwa, jewe Imana yanyu: az’ ababere uwera, kuko jewe Uhoraho, mbeza, nd’ uwera.

⁹ Kand’ umukobga w’umuherezi wese ni yiyononesha gusambana, azoba yambitse ibara se: az’ atabge mu muriro.

Uk’ umuherezi mukuru na we akwiye kwirinda

¹⁰ Umuherezi abaye mukuru muri bagenzi biwe, yasutswe amavuta mu mutwe yo kumurobanura, akaba yashikirijwe ibango ngo yambare ya myambaro, ntaz’ ahamburure umushatsi wiwe, canke ngo yitantamurirekw impuzu ziwe agandaye;

¹¹ ntaze yinjirire ku muvyimba n’umwe, canke ngw awiyandurishe, n’iyo woba uwa se cank’ uwa nyina;

¹² canke ngo binamusohokane ngw ave Ahēra, canke ngw ahumanye Ahēra hanje Imana yiwe; kukw ibango yaheshejwe no kurobanuzwa amavuta yanje Imana yiwe riri kuri we: ni jewe Uhoraho.

¹³ Kand’ uwo azokwābīra az’ abe inkumi yirongoreye.

¹⁴ Arik’ umupfakazi, cank’ uwirukanywe, cank’ uwamaze kwononekara, canke maraya, ntaz’ agire uwo yābīra muri bo, atar’ inkumi yirongoreye yo mu bgoko bgabo,

¹⁵ kugira ngo ntaz’ atume uruvyaro rwiwe ruhinduka uruhumanye mu bgoko bgabo: kukw ari jewe Uhoraho ndamweza.

Umuherezi afise agasembga abujijwe guhēreza ivyera

¹⁶ Uhoraho abarira Mose,

¹⁷ ati Barira Aroni, ut’ Umuntu wese azoba afise agasembga wo mu ruvyaro rwawe, ukw ibihe vy’ urunganwe rwanyu bizogenda bikurikirana, ntaze yēgēre ngw ampēreze imfungurwa, jewe Imana yiwe.

¹⁸ Umuntu wese afise agasembga ntaz’ anyīgire hafi: ar’ impumyi, ar’ ūcumbagira, ar’ ūfise izuru rihomberanye, ar’ ūfise urugingo rurutana n’urundi,

¹⁹ ar’ ūvunitse ikirenge cank’ igikonjo,

²⁰ ar’ ūfise inyonzo, ar’ uwabaye impfunya, ar’ ūfise agasembga ku jisho, ar’ ūfise amahere cank’ urukemba, ar’ ūmenetse amavya;

²¹ ntihaze hagire umuntu n’umwe wo mu ruvyaro rwa Aroni azokwigera yīgira hafi afise agasembga, ngw ahēreze ibimazi vyanje, jewe Uhoraho, bitōngōrwa n’umuriro: kw azoba arikw agasembga, ntaze yigire hafi ngw ahēreze imfungurwa zanje, jewe Imana yiwe.

²² Ashobora kurya ku mfungurwa zanje, Imana yiwe, ari ku zera cane, canke ku zera zindi.

²³ Mugabo ntaze yēgēre ca gihuzu gikingīra Ahēra cane, canke ngo yēgēre igicaniro, kukw azoba afise agasembga, kugira ngo yoye guhumanya ahēra hanje ah’ ari ho hose: kukw ari jewe Uhoraho ndabeza.

²⁴ Nukw ivyo vyose Mose abibarira Aroni n’abana biwe n’Abisirayeli bose.