2 Samweli 23 - Bibliya Yera 1951 1967 (Burundi)

Indirimbo Dawidi yaherukiyeko

¹ Aya ni yo majambo ya Dawidi aheruka: At’ Uku ni ko Dawidi mwene Isayi avuga, Ni k’uwashizwe hejuru avuga, Uwo Imana ya Yakobo yimikishije amavuta, Umuririmvyi w’umuhinga w’ Abisirayeli;

² Ati Mpwemu w’Uhoraho yavugiye muri jewe, Ijambo ryiwe ryari ku rurimi rwanje.

³ Imana y’Abisirayeli yaravuze, Igitandara c’Abisirayeli yarambgiye, It’ Ūganza abantu mu bugororotsi, Agatwara yubaha Imana,

⁴ Abarasira nk’umutwenzi iy’ utambitse, Nk’izuba iyo rirashe mu gatondo hatagira agacu, Ubgatsi bukamera hasi, imvura yāguye.

⁵ Non’ inzu yanje si kw imeze ku Mana? Kuko yasezeranye nanje isezerano ritazovaho, Ritunganye muri vyose, kandi rikomeye; Non’ agakiza kanje kose n’ ivyo nifuza vyose Ntizotuma bimera bikaba ibironge?

⁶ Arikw abantu bose b’abagesera bazoba nk’amahwa abantu bakinjura, Kukw ata wuyafatisha intoke;

⁷ Arik’ uwoyakorako Akwiye kugira icuma n’uruti rw’icumu; Umuriro uzoyatongorera aho nyene.

Ivy’ ubuhizi ingabo za Dawidi zakoze

⁸ Aya ni yo mazina y’abahizi Dawidi yar’ afise: Yoshebu‐bashebeti w’i Takemoni, ni we yar’ umukuru wa bamwe batatu; ni we yarāgūriye icumu abantu amajana munani, bahindikiranirah’ umusi umwe.

⁹ Uwa kabiri kuri we muri ba bahizi batatu ni Eleyazari mwene Dodayi Umwahohi. Yari kumwe na Dawidi igihe bahangāra Abafilisitiya bari bakoraniye kubarwanya. Maz’ Abisirayeli bahunze,

¹⁰ arahaguruka yica Abafilisitiya, ukuboko kwiwe kurateba kugwa ikinyānya, kwumira ku nkota. Uwo musi Uhoraho atanga intsinzi ikomeye; abantu baraheza bagaruka kuri Eleyazari, bazanywe no gukoba imivyimba gusa.

¹¹ Akurikirwa na Shama mwene Ageye Umuharari. Abafilisitiya bari bakoraniye i Lehi, ahār’ umurima w’inkore; nukw ingabo zihunga Abafilisitiya.

¹² Ariko we yihagararira muri wa murima, arawurwanira, yica Abafilisitiya; nuk’ Uhoraho atanga intsinzi ikomeye.

¹³ Umusi ur’ izina batatu bo muri bamwe mirongwitatu b’abahizi baramanuka, baja iyo Dawidi ari muri rya senga ry’i Adulamu; hāri mu gihe c’iyimbura, kand’ igitero c’Abafilisitiya cari gishagaje ku mwonga Refayimu.

¹⁴ Ico gihe Dawidi yari mw isenga, kandi har’ insago z’Abafilisitiya i Betelehemu.

¹⁵ Dawidi yumva akumbuye amazi yaho; aravuga, at’ Icompa nkabona uwompa ku mazi y’iriba ryo kw irembo ry’i Betelehemu, nkayanywa!

¹⁶ Maze ba bahizi batatu baca mu ngabo z’ Abafilisitiya, bavoma amazi mur’ iryo riba ryo kw irembo ry’i Betelehemu, barayazana, bayaha Dawidi; ariko yanka kuyanywa, ayavyagiza imbere y’Uhoraho.

¹⁷ Aravuga, at’ Ewe Uhoraho, biragahera ko nokora ntyo! Ndābe nnywe amaraso y’abantu bahevye amagara yabo? Ni co catumye yanka kuyanywa. Ivyo ni vyo vyakozwe na ba bandi batatu b’ abahizi.

¹⁸ Kandi Abishayi murumuna wa Yowabu umwana wa Seruwiya ni we yar’ umukuru wa bamwe mirongwitatu. Yarāgūriye icumu abantu amajana atatu, arabahindikiranya, aronka izina rya rurangiranwa mur’ abo mirongwitatu.

¹⁹ Yaravugangwa mur’ abo mirongwitatu nyene, bituma agirwa umukuru wabo. Ariko rero ntiyashikīra ba bandi batatu ba mbere.

²⁰ Kandi na Benaya mwene Yehoyada, umuntu w’umuhizi w’i Kabuseli, na we yari yarakoze ivy’ ubutōre; ni we yishe bene Ariyeli w’i Mowabu bompi; kandi yaramanutse yicira intambge mw isenga, ku musi shelegi yar’ iguye.

²¹ Yishe n’Umunyegiputa mwiza w’akaranga; uwo Munyegiputa yar’ afise icumu mu minwe, ariko we amanuka iy’ ari atwaye ubuhiri; amushikura iryo cumu, ararimwicisha.

²² Ivyo ni vyo Benaya mwene Yehoyada yakoze, aronka izina rya rurangiranwa muri ba bahizi mirongwitatu.

²³ Yaravugangwa mur’ abo mirongwitatu nyene, ariko ntiyashikīra ba bandi batatu ba mbere. Maze Dawidi amugira umukuru w’abashibamyi biwe.

²⁴ Asaheli murumuna wa Yowabu yar’ umwe muri bamwe mirongwitatu, hamwe na Eluhanani mwene Dodo w’i Betelehemu,

²⁵ na Shama w’i Harodi, na Elika w’i Harodi nyene;

²⁶ na Helezi w’i Paluti, na Ira mwene Ikeshi w’i Tekowa;

²⁷ na Abiyezeri w’i Anatoti, na Mebunayi w’i Hushati;

²⁸ na Salumoni w’i Ahohi, na Maharayi w’i Netofati;

²⁹ na Helebu mwene Bayana w’i Netofati nyene, na Itayi mwene Ribayi w’i Gibeya h’Ababenyamini;

³⁰ na Benaya w’i Piratoni, na Hidayi wo ku migezi y’i Gashi;

³¹ na Abi‐aluboni w’i Arubati, na Azimaveti w’i Bahurimu;

³² na Eliyaba w’i Shaliboni, na bene Yasheni, na Yonatani;

³³ na Shama w’i Harari, na Ahiyamu mwene Sharari w’i Harari nyene;

³⁴ na Elifeleti mwene Ahasubayi w’i Mayaka, na Eliyamu mwene Ahitofeli w’i Giloni;

³⁵ na Hesiro w’i Karumeli, na Parayi w’i Arubi;

³⁶ na Igali mwene Natani w’i Zoba, na Bani w’Umugadi;

³⁷ na Seleki w’Umwamoni, na Naharayi w’i Beroti, ari we yatwaza Yowabu umwana wa Seruwiya ibirwanishwa;

³⁸ na Ira w’i Ituri, na Garebu w’i Ituri nyene;

³⁹ na Uriya Umuheti; bose na bose bari mirongwitatu n’indwi.