2 Samweli 2 - Bibliya Yera 1951 1967 (Burundi)

Dawidi yimikwa n’ab’ umuryango wa Yuda

¹ Hanyuma y’ivyo, Dawidi asiguza Uhoraho, ati Mbega ndūge, nimukire mu gisagara kimwe mu vy’i Buyuda? Uhoraho aramwishura, at’ Ego me dūga. Dawidi ati Nje hehe? Aramwishura, ati Ja i Heburoni.

² Nuko Dawidi adūganayo n’abagore biwe bompi, Ahinowamu w’i Yezireli, na Abigayili yahora ari muka Nabali w’i Karumeli.

³ Adūgana n’abantu biwe, umuntu wese n’abo mu rugo rwiwe; bimukira mu bisagara vy’i Heburoni.

⁴ Bukeye abantu b’i Buyuda baraza, bahimikira Dawidi bamusutsekw amavuta, ngw abe umwami w’ umuryango w’Abayuda. Bukeye babarira Dawidi, bat’ Ab’i Yabeshi‐gileyadi ni bo bāhamvye Sauli.

⁵ Nuko Dawidi atuma intumwa ku b’i Yabeshi‐gileyadi, muti Muragahezagirwa n’Uhoraho, kubg’ ico kigongwe mwagiriye Sauli shobuja, mukamufuba!

⁶ Nuko rer’ Uhoraho abagirire ikigongwe ababere umwizigirwa; nanje nyene nzobishura ico kigongwe mwāgize, kuko mwāgenjeje murtyo.

⁷ None rero, mwigumye, mube abagabo: kuko Sauli shobuja yāpfuye, kand’ ab’ umuryango w’Abayuda banyimikishije amavuta ngo mbe umwami wabo.

Intambara ya Dawidi na Ishibosheti

⁸ Kandi Abuneri mwene Neri, umugabisha w’ingabo za Sauli, yari yarajanye Ishibosheti mwene Sauli, aramujabutsa amujana i Mahanayimu.

⁹ Aramwimika ngw abe umwami w’i Gileyadi n’ uw’ Abashuri n’uw’ i Yezireli n’ uw’ Abefurayimu n’uw’ Ababenyamini n’uw’ Abisirayeli bose.

¹⁰ Kandi Ishibosheti mwene Sauli, igihe yima ngw abe umwami w’ Abisirayeli, yar’ amaze imyaka mirongwine; amara imyaka ibiri ari ku ngoma. Arikw ab’ umuryango w’Abayuda bo, bākondoreye inyuma ya Dawidi.

¹¹ Kandi Dawidi igihe yamaze i Heburoni ar’ umwami w’umuryango w’ Abayuda, n’imyaka ndwi n’amezi atandatu.

¹² Bukeye Abuneri mwene Neri, n’abantu ba Ishibosheti mwene Sauli, bava i Mahanayimu baja i Gibeyoni.

¹³ Yowabu umwana wa Seruwiya na we, n’abantu ba Dawidi, baragenda bahūrira na bo ku kidengeri c’i Gibeyoni; nuko baricara, bamwe hakurya y’ ico kidengeri, abandi hakuno.

¹⁴ Abuneri abarira Yowabu, at’ Abasore ni bave hasi, bakinishe inkota twirorērere. Yowabu at’ Ego me ni bave hasi.

¹⁵ Nuko bava hasi, baraza barahūra, baringanije igitigiri: abo ku ruhande rw’Ababenyamini na Ishibosheti mwene Sauli bar’ icumi na babiri, kand’ abo ku ruhande rwa Dawidi na bo bar’ icumi na babiri nyene.

¹⁶ Bose barasūmirana, umuntu wese asūmira agakanu ka mugenzi we, bazibagurana inkota mu mbavu; bacurikirana hamwe. Ni co catumye aho hantu bahīta Helukati‐hasurimu: ni hafi y’i Gibeyoni.

¹⁷ Uwo musi haca haba intambara ihambaye cane; Abuneri n’Abisirayeli baraneshwa, bahunga abantu ba Dawidi.

¹⁸ Kand’ abana ba Seruwiya ukw ari batatu, Yowabu na Abishayi na Asaheli, ni ho bāri; kandi Asaheli yar’ impayamaguru nk’ingeregere yo mw ishamba.

¹⁹ Maze Asaheli yōma kuri Abuneri, adakebereje i buryo cank’ i bumoso ngw amuve inyuma.

²⁰ Maze Abuneri akebutse inyuma, aramubaza, ati Mbega ni wewe ga Asaheli? Na we aramwishura, ati Ni jewe.

²¹ Abuneri aramubarira, ati Kebereza i buryo cank’ i bumoso, ugire uwo mu misore ufata, abe ari we wambura ibirwanishwa vyiwe. Ariko Asaheli yanka gukevya ngw amuve inyuma.

²² Abuneri asubira kubarira Asaheli, ati Ca hiyo, ureke kunkurikira; mbeg’ urinde kuntera kukwica? Nkwishe noshobora nte guhūza amaso na Yowabu mukurwawe?

²³ Ariko na ho nyene yanka gukebereza i ruhande, bituma Abuneri amuzibura umuhunda w’icumu ku nda, riseruka inyuma, Asaheli yikubita hasi, agwa aho nyene. Maz’ abantu bashitse aho Asaheli aguye, baca bahagararaho.

²⁴ Ariko Yowabu na Abishayi bakurikira Abuneri; izuba rirenga bafashe ku musozi Ama, urābana n’i Giya ku nzira ija mu bugaragwa bg’i Gibeyoni.

²⁵ Maz’ Ababenyamini biyegeraniriza kuri Abuneri, bīrema akarwi kamwe, batonda ku mpinga y’umusozi.

²⁶ Maze Abuneri atera akamo Yowabu, aramubaza, ati Mbeg’ inkota izokwama iririka na ntaryo? Ntuzi yukw amaherezo hazovamw’ intuntu? None mbeg’ uzogeza ryari kutabogoza abantu ngo bave inyuma ya bene wabo?

²⁷ Yowabu aramwishura, ati Ndahiye uguhoraho kw’Imana, iy’ utagira ico uvuga, bgari kurinda buca abantu batarareka gukurikirana bene wabo.

²⁸ Nuko Yowabu aca avuza inzamba, abantu bose barahagarara, ntibakomeza gukurikirana Abisirayeli canke kubarwanya ukundi.

²⁹ Nuko Abuneri n’ingabo ziwe bakesha iryo joro bajanye ikiyaya Araba; bajabuka Yorodani, bajana i Bitironi hose, bararuha bashika i Mahanayimu.

³⁰ Yowabu na we arahindukira, areka gukurikirana Abuneri; amaze gukoranya ingabo zose za Dawidi, asanga habuzemw’ abantu cumi n’icenda bo na Asaheli.

³¹ Arikw ingabo za Dawidi zari zishe abantu amajana atatu na mirongwitandatu mu Babenyamini no mu ngabo za Abuneri.

³² Nuko baterura Asaheli, baramujana bamuhamba i Betelehemu mu mva ya se. Yowabu n’ingabo ziwe baraheza bagenda ijoro ryose; buca bashitse i Heburoni.