2 Samweli 11 - Bibliya Yera 1951 1967 (Burundi)

Icaha ca Dawidi

¹ Nuk’ umwaka utashe, ku gacikamvura, mu gihe abami bākunda kuja mu ntambara, Dawidi agomora Yowabu n’abantu biwe n’Abisirayeli bose, bageseza Abamoni, baziguza n’i Raba. Ariko Dawidi ubgiwe yisigarira i Yerusalemu.

² Maz’ umusi ur’ izina ku mugoroba, Dawidi amaze kwibambura ku kirwa, agendagenda hejuru ku ngoro yiwe; maz’ akiri hano hejuru, aja abona umugore arikw ariyuhagira, kandi yari mwiza ateye igomwe.

³ Nuko Dawidi atuma kubaza uwo mugore uw’ ari we. Baramubarira, bati Si Batisheba mwene Eliyamu, muka Uriya Umuheti?

⁴ Nuko Dawidi atuma intumwa zo kumuzana, aca arenguka i we, bararyamana, kuko yari yihumanuye avuye mu miziro; hanyuma asubira i muhira.

⁵ Nya mugore asamye inda, atuma kuri Dawidi, ut’ Afise inda.

⁶ Maze Dawidi atuma kuri Yowabu, uti Murungikire wa Muheti Uriya. Nuko Yowabu aca arungika Uriya kwa Dawidi.

⁷ Uriya amushikiriye, Dawidi amubaza inkuru za Yowabu n’iz’ ingabo, n’uko bigenda mu ntambara.

⁸ Maze Dawidi aramubarira, ati Manuka uje i wawe, woge ibirenge. Nuko Uriya asohoka mu ngoro y’umwami, bamukurikiza ingaburo agaburiwe n’umwami.

⁹ Ariko Uriya yīrārira hamwe n’abanyarugo ba shebuja bose, mw irebe ry’ingoro y’umwami, ntiyamanuka ngw aje i we.

¹⁰ Maze babariye Dawidi, bat’ Erega Uriya ntiyatashe i muhira; Dawidi aca abaza Uriya, ati Mbega ntiwar’ uvuye ku rugendo? None k’utāgiye kurāra i wawe?

¹¹ Uriya yishura Dawidi, at’ Isandugu y’Imana n’Abisirayeli n’Abayuda ko barāra mu nsago, kandi databuja Yowabu n’ abantu bawe, mugenzi, bakaba bashagaje mu gahinga; none jewe ngende i wanje, nīrīre, nīnywere, ndārane n’umugore wanje? Ndakurahiye, eka ni wewe ndahiro nyene, sinorikora!

¹² Maze Dawidi aramubarira, ati Sībira hano n’uyu musi, ejo nzokurekura ugende. Nuko Uriya asībira i Yerusalemu uwo musi na bukeye.

¹³ Maze Dawidi aramurengukisha ngw aze kurya no kunywa ar’ imbere yiwe, aramuboreza; hageze mw ijoro, Uriya aja kuryama ku gisegure ciwe hamwe na ba banyarugo ba shebuja, ariko ntiyamanuka ngw aje i we.

¹⁴ Bukeye mu gitondo Dawidi yandikira Yowabu icete, akirungikana Uriya nyene.

¹⁵ Yandika mur’ ico cete, ati Muherereze Uriya imbere ah’ urugamba rukaze, muheze mwīgire inyuma mumute, kugira ngo bamutere apfe.

¹⁶ Nuko rero Yowabu, igihe asubiye gutera ico gisagara, aherereza Uriya ahantu azi ko har’ abahizi.

¹⁷ Maz’ abantu bo muri nya gisagara barasokoroka, barwanya Yowabu; abantu bamwe bo mu ngabo za Dawidi barapfa, hapfamwo na Uriya wa Muheti.

¹⁸ Maze Yowabu atuma kumenyesha Dawidi ivy’ intambara uko bimeze;

¹⁹ abarira intumwa, ati Ni wamara kudondera umwami inkuru zose z’uko bimeze mu ntambara,

²⁰ umwami ni yaramuka aratse, akakubaza, ati N’iki cabateye kurwana mwegereje igisagara murtyo? ati Mbega ntimwari muzi ko batoretse kubarasa bahagaze ku ruzitiro?

²¹ Akanakubaza, ati None ni nde yishe Abimeleki mwene Yerubayali? ati S’umugore yamuteye ingasire, yihagarariye ku ruzitiro, akagwa aho nyene i Tebesi? ati N’iki cabateye kwegereza uruzitiro murtyo? Uz’ uheze umubarire, ut’ Erega na wa muntu wawe w’Umuheti Uriya, na we yarapfuye.

²² Nukw iyo ntumwa iragenda; ishitse, idondera Dawidi ivyo Yowabu yamutumye vyose.

²³ Iramubarira, it’ Abantu baho bāradutwariranije, badushikana no mu gahinga, ariko turaruha tubīgiza inyuma kurinda tubashikanye kw irembo ryabo.

²⁴ Kand’ abanyamiheto bari bahagaze ku ruzitiro baturasa, twebge abantu bawe; hapfa bamwe bo mu bantu bawe, mwami, kandi hapfuye na wa muntu wawe w’Umuheti, Uriya.

²⁵ Maze Dawidi yishura iyo ntumwa, at’ Uz’ ubarire Yowabu, ut’ Ivyo ntibikubabaze, uti Kukw inkota mu kwica ipfa uwo ihubiyeko; uti None rero shimika, uvyure akanyarigabo mu kurwanya ico gisagara, ukineshe. Ukw abe ari k’umurindisha.

²⁶ Maze muka Uriya yumvise k’ umugabo wiwe yapfuye, aramuririra.

²⁷ Hanyuma agandutse, Dawidi atuma kumuzana i we, aramucūra; bavyarana umwana w’umuhungu; arikw ivyo Dawidi yakoze vyababaje Uhoraho.