2 Korinto 3 - Bibliya Yera 1951 1967 (Burundi)

Abakijijwe baba ar’ icete canditse Kristo

¹ Mbega dutanguye kwongera kwishimagiza? Canke turinda ivyete vyo kudushimagiza, mwandikiwe canke mwanditse, nk’uko bamwe bandi bagomba?

² Ni mwebge cete cacu, canditswe ku mitima yacu, ico abantu bose bamenya bagasoma.

³ Kuko muboneka ko mur’ icete Kristo yatwandikishije, nk’ukw igikorwa cacu kiri; kitandikishijwe wino, ariko candikishijwe Mpwemu w’Imana nzima; kitanditswe ku bisate vy’amabuye, ariko canditswe ku bisate ni vyo mitima y’inyama.

⁴ Uko ni ko twizigira Imana kubga Kristo,

⁵ s’uko dushobora ubgacu kwiyumvira ikintu cose nk’ah’ ari twebge candurutseko, ariko dushobozwa n’Imana;

⁶ ni yo yadushoboje kuba abakozi b’isezerano risha, yamara s’abakozi b’ivyandikishijwe inyuguti, ariko n’ab’ impwemu: kukw ivyandikishijwe inyuguti vyicisha, arikw impwemu ihesha ubugingo.

Ubgiza bg’ubutumwa buruta ubg’ ivyagezwe

⁷ Yamar’ ubgo bugabuzi bgandikishijwe inyuguti zikorogoshowe mu mabuye bgaganzwa n’urupfu, naho bgari bgazananye n’ubgiza. Arik’ ubgo bgiza, naho bgagenda bushira, bgatumye Abisirayeli badashobora gutumbera mu maso ha Mose.

⁸ None ko vyabaye birtyo, ubugabuzi buganzwa na Mpwemu ntiburushiriza cane kuzanana n’ubgiza?

⁹ Ubugabuzi bgo gutsindwa kw ar’ ubgiza, ubugabuzi bgo kugororoka burushiriza kugira ubgiza bg’akaburarugero.

¹⁰ Mber’ icari gisanganywe ubgiza nta bgiza kigifise, kuko haje ubgiza bukirengeye.

¹¹ Igishira ko cari n’ubgiza, igihoraho kirushiriza cane kugira ubgiza.

¹² Nuko ko dufise icizigiro kingana girtyo, tuvuga tutabobotereza na gatoya,

¹³ ntidusa na Mose, yitwikira mu maso, kugira ngw Abisirayeli ntibahange amaso iherezo ry’ubgariko buraherengetera.

¹⁴ Arikw imitima yabo irakomantara. Kuko gushitsa na bugingo n’ubu, ca citwikiro kikiriho mw isomwa ry’isezerano rya kera, ntikirakūrwaho, kuko muri Kristo ari ho giherera.

¹⁵ Ariko gushitsa n’ubu, ivya Mose iyo bisomwa ico citwikiro kiba ku mitima yabo:

¹⁶ yamara, iy’ umuntu ahindukiriye Umwami, ico citwikiro gica gikūrwaho.

¹⁷ Arik’ uwo Mwami ni we Mpwemu: kand’ aho Mpwemu w’Umwami ari, ni ho haba umwidegemvyo.

¹⁸ Tweho twese, ko tutitwikiriye mu maso, tukerekana nk’icirore ubgiza bg’Umwami, turahinduka, tugashushanywa n’iyo shusho, tukava mu bgiza tukaja mu bundi, nk’abahindurwa n’Umwami, ari we Mpwemu.