1 Timoteyo 2 - Bibliya Yera 1951 1967 (Burundi)

Ukw abantu bakwiye gusenga

¹ Irya mbere y’ibindi vyose, ndabahanūra kwingingira abantu bose no kubasengera no kubasabira no kubashimira Imana:

² kandi cane‐cane abami n’abashizwe hejuru bose, kugira ngo twame mu mahoro dutekereje, twubaha Imana tur’ inyankamugayo rwose.

³ Ivyo ni vyo vyiza vyemerwa mu nyonga z’Imana Umukiza wacu,

⁴ igomba kw abantu bose bakizwa bagashika ku kumenya ivy’ ukuri.

⁵ Kuko har’ Imana imwe, kandi har’ Umuhūza umwe w’Imana n’abantu, na we nyene n’umuntu, ni Kristo Yesu,

⁶ yitanze kw incungu ya bose. Kand’ ivyo bishingirwe intahe mu bihe vyavyo,

⁷ ni co nashiriweho kuba umusiguzi n’intumwa (mvuze ukuri, simbeshe) n’umwigisha wo kwigisha abanyamahanga ukwizera n’ivy’ ukuri.

⁸ Nuko ndagomba kw abagabo basenga hose, batarika amaboko yera, bataratse, batagira ibihāri.

⁹ Kandi n’abagore nyene, ndagomba ko bambara imyambaro biberanye, bagendane isoni badahugumba kandi badashazisha gutsiba umushatsi, cank’ izahabu, cank’ imaragarita, cank’ impuzu z’igiciro kinini,

¹⁰ ariko bashazishe ibikorwa vy’ingeso nziza, nk’uko bikwiye abagore bavuga yuko bubaha Imana.

¹¹ Umugore yige atekereje agamburuka rwose.

¹² Ariko sinkundira umugore ko yigisha canke kw aganza umugabo, arikw atekereze.

¹³ Kuko Adamu ari we yabanje kuremwa, hanyuma Eva.

¹⁴ Kandi Adamu si we yahenzwe, arik’ umugore ni we yahenzwe, agwa mu bicumuro.

¹⁵ Yamar’ azokizwa kubg’ ukuvyara, ni bashishikara kwizera no kugira urukundo no kwezwa, bifatanye no kudahugumba.