1 Samweli 8 - Bibliya Yera 1951 1967 (Burundi)

Abisirayeli basaba Uhoraho ngw abahe umwami

¹ Maze Samweli ageze mu zabukuru, abahungu biwe abagira abacamanza b’Abisirayeli;

² imfura yiwe yitwa Yoweli, uw’ ubuheta yitwa Abiya. Baba abacamanza b’i Beri‐sheba.

³ Yamar’ abo bahungu biwe ntibāri n’ingeso nk’ iziwe, ariko bākebereje gukurikira inyungu mbi, bakarya ingurire, bakagoreka imanza.

⁴ Nukw abakuru b’Abisirayeli bose barakorana, baja i Rama kwa Samweli,

⁵ baramubarira, bat’ Ehe rāba urashaje, kand’ abahungu bawe ntibafise ingeso nk’izawe; none rer’ utwimikire umwami wo kuducīra imanza nk’ayandi mahanga yose.

⁶ Arikw iryo jambo ribabaza Samweli, ko bavuze ngo n’abahe umwami wo kubacīra imanza; araheza asenga Uhoraho.

⁷ Uhoraho abarira Samweli, ati Ni wemerere abo bantu ico bakwātse cose, kukw atari wewe banse, ariko ni jewe banse ngo simbe Umwami wabo.

⁸ Bakugiriye nk’uko bāngiriye muri vyose, uhereye umusi nabadūganye mbakūye muri Egiputa ukageza n’ubu; kuko bāntaye, bagasaba izindi mana.

⁹ None rero n’upfe kubemerera, arik’ ubihanikirize cane, ubamenyeshe ingeso z’umwami azobaganza uko zizobamerera.

Samweli abamenyesha uk’ umwami azobamerera

¹⁰ Nuko Samweli asigurira abantu bamusavye umwami ivyo Uhoraho yamubariye vyose.

¹¹ Aravuga, at’ Umve ubugene umwami agiye kubaganza azobagirira: azofata abahungu banyu abashinge gukora ivy’ imikogote yiwe n’ivy’ amafarasi yiwe, no kwiruka imbere y’imikogote yiwe;

¹² abandi azobashinga kuba abagabisha b’ingabo, bamwe igihumbi abandi mirongwitanu; abandi azobagira abarimyi n’abimbuzi biwe, n’abo gucura ibirwanishwa vyiwe vy’intambara n’ivyuma vy’imikogote yiwe.

¹³ Kand’ azofata abakobga banyu, abashinge kuba abasyi b’imbazi n’abatētsi n’abacumvyi.

¹⁴ Kand’ azofata imirima yanyu n’imizabibu yanyu n’imyelayo yanyu, ibiruta ibindi kuba vyiza, abihe abantu biwe.

¹⁵ Kand’ azobatoza ibigiracumi vy’impeke zanyu n’inzabibu kw amarari, abihe abīshikira biwe n’abantu biwe.

¹⁶ Kand’ azobanyaga abagurano banyu b’abahungu n’abakobga, yikubitire intorwa mu nka zanyu no mu ndogoba, abikoreshe ibikorwa vyiwe.

¹⁷ Kand’ azobatwara ikigiracumi c’imikuku yanyu, namwe azobagaba ukw agomba.

¹⁸ Maz’ umusi muzobibona muzoborōzwa n’uwo mwami mwitoreye; arik’ uwo musi nta co Uhoraho azobishura.

¹⁹ Arikw abantu banka kwumva ivyo Samweli ababariye, baravuga, bati Nta co biriko, turagomba umwami wo kutuganza,

²⁰ kugira ngo natwe tumere nk’ayandi mahanga yose, tugire umwami wo kuducīra imanza no kutuja imbere no kuturwanira mu ntambara.

²¹ Samweli yumvise ivyo abantu bavuze vyose, abishikiriza Uhoraho.

²² Uhoraho aramwishura, ati N’ubemerere, ubimikire umwami. Maze Samweli abarira Abisirayeli, ati Mwese ni mwītāhire mu bisagara vy’i wanyu.