1 Samweli 31 - Bibliya Yera 1951 1967 (Burundi)

Urupfu rwa Sauli

¹ Nukw Abafilisitiya batera Abisirayeli, Abisirayeli barabahunga, bahindikirana ku musozi Gilibowa.

² Abafilisitiya bakinagiza Sauli n’abahungu biwe, bica Yonatani na Abinadabu na Milikishuwa abahungu biwe.

³ Urubgamba rusugereza Sauli, abanyamiheto bamushingiriza imyampi, bamurandura umutima.

⁴ Maze Sauli abarira ūmutwaje ibirwanishwa, ati Sokōra inkota, uyinsogote, zirya ntakebga zoye kunshikīra ngo zinsogote, zinshinyagurire. Arik’ ūmutwaje ibirwanishwa aranka, kuko yari yagize ubgoba bginshi. Sauli ni kwo gufata iyiwe nkota, ayīsukako.

⁵ Uno yamutwaza ibirwanishwa abonye ko Sauli apfuye, na we yīsuka kuri rwiwe, bagwa hamwe.

⁶ Uko ni ko Sauli yapfuye, n’abahungu biwe batatu, n’uwamutwaza ibirwanishwa, bo n’ingabo ziwe zose, bapfa kur’ uwo musi nyene.

⁷ Maz’ ingabo z’Abisirayeli zo hakurya y’umwonga n’izo hakurya ya Yorodani, babonye kw Abisirayeli bahunze, kandi ko Sauli n’ abahungu biwe bapfuye, bata ibisagara vyabo, barahunga; Abafilisitiya baraza, baravyinjira.

⁸ Bukeye bgaho, Abafilisitiya baje gukoba imivyimba, basanga Sauli n’abahungu biwe batatu barambaraye ku musozi Gilibowa bapfuye.

⁹ Bamuca izosi, bamukoba ibirwanishwa, batuma intumwa mu gihugu c’Abafilisitiya iyo kiva kikagera, ngo bakwize inkuru mu nsengero z’ibigirwamana vyabo no mu bantu.

¹⁰ Ibirwanishwa vyiwe babishira mu rusengero rwa Ashitaroti, umuvyimba wiwe bawēnētsa ku ruzitiro rw’amabuye rw’igisagara c’i Beti‐shani.

¹¹ Maz’ ab’i Yabeshi‐gileyadi bumvise ivy’ Abafilisitiya bagiriye Sauli,

¹² abahizi bose barahaguruka, bagenda ijoro ryose, bamanura umuvyimba wa Sauli ku ruzitiro rw’i Beti‐shani, bo n’iy’ abahungu biwe; bashitse i Yabeshi bayituririraho.

¹³ Maze bābīra amagufa yabo, bayahamba musi y’igiti c’umwesheli i Yabeshi nyene, baca barisonzesha kumara imisi ndwi.