1 Samweli 19 - Bibliya Yera 1951 1967 (Burundi)

Yonatani avugira Dawidi kuri Sauli

¹ Bukeye Sauli abarira Yonatani umuhungu wiwe bo n’ abantu biwe bose ngo bice Dawidi. Ariko Yonatani mwene Sauli yakunda Dawidi cane.

² Nukw abūrira Dawidi, ati Data Sauli agomba kukwica; none rero wirinde: ejo uz’ ube ur’ ahantu hiherereye, wihishe.

³ Nanje nzogenda mpagararane na data ku musozi ah’ uzoba uri nyene, mvugane na we ivyawe; ni nagira ico numva cose nzokikubarira.

⁴ Bukeye Yonatani avugana na se Sauli, amushimira Dawidi; aramubarira, ati Mugenzi, ntuz’ ugirire nabi Dawidi umusavyi wawe, kukw ata kibi yakugiriye; mber’ ivyo yagukoreye vyabaye vyiza cane,

⁵ kuko yahevye amagara yiwe, akica wa Mufilisitiya, Uhoraho akarokora Abisirayeli uburyo bukomeye. Nawe ubibonye uranezerwa. None n’iki kigutera kugira nabi, ukavisha amaraso y’ūtācumuye, ngo wice Dawidi umuhōye ubusa?

⁶ Nuko Sauli yumvira Yonatani, aramurahira, ati Ndahiye uguhoraho kw’ Uhoraho akaba agipfuye!

⁷ Yonatani arahava ahamagara Dawidi, amwīgānira ivyo vyose. Nuko Yonatani arengukana Dawidi imbere ya Sauli, aguma ngaho nk’uko yahora.

Sauli yongera guhīga Dawidi

⁸ Bukeye hasubira kuba intambara; Dawidi aratabara, arwana n’Abafilisitiya, abatikiza agatikizo gakomeye; abasigaye barahunga.

⁹ Bukeye ya mpwemu mbi irungitswe n’Uhoraho iza kuri Sauli, avyagiye mu ngoro yiwe, afise icumu mu minwe; Dawidi amuvugiriza inanga.

¹⁰ Sauli agerageza gusākiza Dawidi icumu, ngo rirume ku nzu; Dawidi ararizibukira, amuva imbere, rinega ku nzu. Nuko mur’ iryo joro nyene Dawidi arahunga, aramukira.

¹¹ Maze Sauli atuma abantu ngo baje kwa Dawidi, bamuryamire, kugira ngo ni bgāca bamwice. Maze Mikali, muka Dawidi, aramubarira, at’ Iri joro n’utanyaga amagara, ejo bazokwica.

¹² Nuko Mikali acisha Dawidi mw idirisha, aramwururutsa, na we aca aratemesha, arahunga.

¹³ Mikali araheza ahitana terafimu, ayirambika ku buriri, ayishirakw ikijishano c’ ubushenza bg’impene mu mutwe, ayorosakw impuzu.

¹⁴ Nukw izo ntumwa Sauli yarungitse gufata Dawidi, Mikali arazibgira, at’ Ararwaye.

¹⁵ Hanyuma Sauli yongera gutuma izo ntumwa ngo barābe Dawidi, ati Mumuterurane n’uburiri mumudūgane, mumunzanire, ndamwice.

¹⁶ Nukw izo ntumwa zinjiye zisanga terafimu ari yo iri ku buriri, na ca kijishano c’ubushenza bg’impene kiri mu mutwe wayo.

¹⁷ Sauli abimenye, abaza Mikali, ati N’iki caguteye kumpenda urtyo, ukareka umwansi wanje, agacika? Mikali yishura Sauli, ati Yambgiye, ati Ndeka ngende, sinkwice.

¹⁸ Nuko Dawidi ni kwo guhunga agacika, akaja i Rama kwa Samweli, amwīgānira ivyo Sauli yamugiriye vyose. Hanyuma ahagurukana na Samweli, baja i Nayoti, bagumayo.

¹⁹ Maze babgira Sauli, bat’ Erega Dawidi ar’ i Nayoti i Rama.

²⁰ Nuko Sauli atuma abantu gufata Dawidi: bashitseyo, basanga abavugishwa n’Imana b’agakama bariko baravugishwa, na Samweli ahagaze ngaho nk’umukuru wabo; maze Mpwemu w’Imana aza kur’ izo ntumwa za Sauli, na zo zica ziravugishwa.

²¹ Babibgiye Sauli, atuma izindi ntumwa, na zo zishitse ziravugishwa. Arongera atuma izindi ubugira gatatu, na zo n’uko ziravugishwa.

²² Araheza arisidukira, aja i Rama, ashikira kw iriba rinini ry’i Seku, arabaza, ati Samweli na Dawidi bari hehe? Umuntu aramwishura, ati Bar’ i Nayoti i Rama.

²³ Aca agenda i Nayoti i Rama; maze Mpwemu w’Imana amuzako na we, agenda aravugishwa kurinda ashika i Nayoti i Rama nyene.

²⁴ Ashitseyo yīkiza impuzu ziwe, avugishirizwa imbere ya Samweli arambaraye hasi yambaye ubusa, yiriza umusi akēsha ijoro. Ni co catumye bavuga, bati Mbega Sauli na we yari mu bavugishwa n’Imana?