1 Korinto 11 - Bibliya Yera 1951 1967 (Burundi)

Ivy’ ukwitwikira kw’abagore mu makoraniro

¹ Munyigāne, nk’uko nanje nīgāna Kristo.

² Ndabashima, kuko munyibuka muri vyose, mukagumya ivyo nabashikirije, nk’uko nabibahaye.

³ Ariko ndagomba ko mumenya k’umutwe w’umugabo wese ari Kristo, kandi k’umutwe w’umugore ar’ umugabo, kandi k’umutwe wa Kristo ar’ Imana.

⁴ Umugabo wese iy’ asenga cank’ avugishwa n’Imana umutwe wiwe utwikiriye, aba awuteye isoni.

⁵ Arik’ umugore wese iy’ asenga cank’ avugishwa n’Imana, adatwikiriye umutwe, aba awuteye isoni: kukw ari bimwe rwose no kumobga.

⁶ Ni hagira umugore atitwikira mu mutwe, bamukerere n’umushatsi: namb’ ar’ ibiteye isoni k’umugore akererwa umushatsi canke kw amobga ni yitwikire mu mutwe.

⁷ Umugabo ntakwiye kwitwikira mu mutwe, kukw ar’ ishusho y’Imana n’ubgiza bgayo: arik’ umugore n’ubgiza bg’umugabo.

⁸ Kuk’ umugabo atamutse ku mugore, arik’ umugore ni we yamutse ku mugabo.

⁹ Kand’ umugabo ntiyaremwe kubg’ umugore, arik’ umugore ni we yaremwe kubg’ umugabo.

¹⁰ Ni co gituma umugore akwiye kwambara mu mutwe ikimenyetso co kugabga, kubg’ abamarayika.

¹¹ Ariko mu Mwami wacu, umugore agenda ku mugabo, ni ko n’umugabo agenda ku mugore.

¹² Nk’uk’ umugore yamutse ku mugabo, ni k’umugabo avyarwa n’umugore: ariko vyose vyamuka ku Mana.

¹³ Ni mwiyumvire ubganyu uko biri. Mbega birakwiye k’umugore asenga Imana atitwikiriye mu mutwe?

¹⁴ Akameremere kacu mbega ntikabigisha yuk’ umugabo yotega umushatsi, womutera isoni,

¹⁵ kandi k’umugore, iy’ ateze umushatsi, uba ar’ ubgiza bgiwe? Kuko yahawe umushatsi ng’ube umwambaro wo mu mutwe.

¹⁶ Ariko namba har’ umuntu agomba kuvyura ibihāri, twebge ntidufise umugenzo nk’uwo, kandi n’amashengero y’Imana ntawufise.

Ukw ab’i Korinto bāgayishije ivy’ Ingaburo Yera

¹⁷ Arik’ uko mbabarira ibi, simbashima, kuko mudakoranira iciza, ariko mukoranira ikibi.

¹⁸ Ica mbere, iyo mukoraniye mw ikoraniro, numva yuko mwitandukanya, kandi ngira ngo muri bimwe‐bimwe vyoba ari ko biri.

¹⁹ Kuko n’ibice bitobura kuba muri mwebge, ngw abemewe muri mwebge baseruke.

²⁰ Nukw iyo mukoranye, burya ntikuba ar’ukurya ingaburo y’Umwami wacu.

²¹ Kuko mu kurya, umuntu wese yisangiza ivyiwe agacura abandi: maz’ umwe agasonza, uwundi akaborerwa.

²² Mbega yemwe: ntimufise ingo zo kurīramwo no kunyweramwo? Canke mukēngēra ishengero ry’Imana, mugatētereza abadafise? Ndababgire iki? Ndabashime? Kur’ ivyo simbashima.

Paulo abibutsa uko Yesu yatanguje Ingaburo Yera

²³ Kukw ico nahawe n’Umwami wacu ari co nabashikirije namwe, yuk’ Umwami Yesu mw ijoro yaguzwemwo yābiriye umutsima,

²⁴ akawushimira Imana, akawumanyagura, akavuga, at’ Uyu n’umubiri wanje ubatangiwe, murahora mugira murtya kugira ngo kibe icibutso canje.

²⁵ N’igikombe akigenza artyo, bahejeje kurya, arababgira, at’ Iki gikombe n’isezerano risha ryo mu maraso yanje; murahora mugira murtya uko muzonywako, kugira ngo kibe icibutso canje.

²⁶ Uko murya uwo mutsima kand’ uko munywera kur’ ico gikombe, muba mumenyekanisha urupfu rw’Umwami wacu, kugeza ah’ azozira.

Kurya Ingaburo y’Umwami wacu uko bidakwiye

²⁷ Ni co gituma, umuntu wese azorya umutsima w’Umwami wacu, cank’ azonywera ku gikombe ciwe, uko bidakwiye, azotsindwa n’urubanza rw’uko yakēngereye umubiri n’amaraso vy’Umwami.

²⁸ Arik’ umuntu yibaze ukw ameze, abone kurya kur’ uwo mutsima, no kunywera kur’ ico gikombe.

²⁹ Kuk’ ūrya cank’ ūnywa, atamenye umubiri w’Umwami wacu, arya kand’ anywa ibimuzanira gutsindwa n’urubanza.

³⁰ Ni co gituma muri mwebge benshi bagira intege nke, abandi bakarwaragurika, kand’ abatari bake bakaba bārapfuye.

³¹ Arikw iyo twimenye uko turi, ntidutsindwa n’urubanza.

³² Arikw iyo dutsinzwe n’urubanza duhanwa n’Umwami, kugira ngo ntituze dutsindwe n’urubanza rudashira hamwe n’ab’ isi.

³³ Nuko, bene Data, uko mukoraniye kurya, murorērane.

³⁴ Umuntu ni yasonza, ararya i we, kugira ngo ntimukoranire gutsindwa n’urubanza. Ibisigaye nzobiroranya aho nzozira.