1 Abami 9 - Bibliya Yera 1951 1967 (Burundi)

Uhoraho yiyereka Salomo ubugira kabiri

¹ Maze Salomo arangije kwubaka ingoro y’Uhoraho n’ingoro y’ubgami n’ivyo yagomvye gukora vyose,

² Uhoraho amwiyereka ubugira kabiri, nk’uko yamwiyerekeye i Gibeyoni.

³ Uhoraho aramubarira, ati Numvise ugusenga kwawe n’ukwinginga kwawe wingingiye imbere yanje; kandi nejeje iyi ngoro wubakiye izina ryanje ngo rihabe ibihe vyose; nzoyihozakw amaso n’umutima na ntaryo.

⁴ Nuko nawe ni wagendera imbere yanje nk’uko so Dawidi yagenda, ufise umutima w’ukuri kand’ utunganye, ugakora ivyo nakugeze vyose, ukitondera amabgirizwa yanje n’amateka nashinze;

⁵ nanje nzotuma ingoma yawe ihangama mu Bisirayeli ibihe vyose, nk’uko nasezeraniye so Dawidi, nkamubarira, nti Ntuzobura uwo gusubira ku ngoma y’ i Bgisirayeli.

⁶ Ariko ni mwanta, mukareka kunkurikira, cank’ abana banyu, ntimwitondere ivyagezwe vyanje n’amabgirizwa yanje nabashize imbere, mukaja gusaba izindi mana, mukaba ari zo musenga;

⁷ nuko nanje nzoherengeteza Abisirayeli mu gihugu nabahaye, kand’ iyi ngoro nejeje kubg’ izina ryanje nzoyishibura imve mu maso; kand’ Abisirayeli bazoba iciro ry’imigani n’agashinyaguro mu mahanga yose;

⁸ kand’ iyi ngoro nah’ ar’ agahambaye irtya, ūzoyica i ruhande wese azokwumirwa, avuze agahwa, at’ Ariko n’iki catumye Uhoraho agirira artya iki gihugu n’iyi ngoro?

⁹ Bazomwishura, bati N’uko bahevye Uhoraho Imana yabo, yakūye ba sekuruza mu gihugu ca Egiputa, bakaramatana n’izindi mana, bakazisenga, bakaba ari zo basaba; ni co catumye Uhoraho abateza ivyo vyago vyose.

Salomo aha ishimwe umwami Hiramu

¹⁰ Nuko hashize imyaka mirongwibiri, ari yo Salomo yubakiyemw’ ingoro zompi, iy’ Uhoraho n’iyiwe ubgiwe,

¹¹ umwami Salomo aha Hiramu ibisagara mirongwibiri mu gihugu c’i Galilaya; kandi Hiramu uwo, umwami w’i Tiro, ni we yari yarahaye Salomo ibiti vy’amasederi n’ivy’ akajwari n’amazahabu, nk’uko yagomba kwose.

¹² Bukeye Hiramu ava i Tiro aja kugendura ivyo bisagara Salomo yamuhaye; maze ntiyabishima.

¹³ Aramubarira, ati Mbega mugenzi wanje, ibisagara wampaye ubona ar’ ibisagara ki? Ni kwo kuhīta igihugu c’i Kabula; kandi ni ko hacitwa na bugingo n’ubu.

¹⁴ Kandi Hiramu yari yararungikiye umwami Salomo amazahabu italanto ijana na mirongwibiri.

Ibindi Salomo yubatse

¹⁵ Ubu ni bgo buryo umwami Salomo yashizeh’ abanyabikebere bo kwubaka ingoro y’Uhoraho n’ingoro yiwe ubgiwe n’i Milo n’uruzitiro rw’amabuye rw’i Yerusalemu, n’i Hasori n’i Megido n’i Gezeri.

¹⁶ Kandi Farawo umwami wa Egiputa yari yarateye i Gezeri, arahatsinda, arahaturira, ageseza Abanyakanani bāba mur’ ico gisagara, ahaha muka Salomo umukobga wiwe kw indongoranywa.

¹⁷ Nuko Salomo yubaka i Gezeri nyene, n’i Beti‐horoni ho hepfo,

¹⁸ n’i Bayalati n’i Tamari mu bugaragwa bgo mu gihugu c’Abayuda;

¹⁹ n’ibisagara vyose vy’ibigega vyiwe, n’ibisagara vyo kubīkamw’ imikogote yiwe, n’ivy’ abagendera ku mafarasi biwe, n’ amazu yose yagomvye kwubaka i Yerusalemu n’i Lebanoni no mu gihugu cose yaganza.

²⁰ Abantu bose b’amasigarira y’Abamori n’ Abaheti n’Abaferizi n’Abahiwi n’ Abayebusi, abatār’ Abisirayeli,

²¹ abuzukuruza babo bari barasigaye mu gihugu, abo Abisirayeli batāshoboye guherengeteza rwose, abo ni bo Salomo yatojemw’ abo gushinga ibikebere, abahindura abaja na bugingo n’ubu.

²² Ariko mu Bisirayeli bo, nta bo yahinduye abaja; ariko bār’ ingabo zo kuja mu ntambara, n’abagendanyi, n’abagabisha b’ingabo, n’ abatware, n’abagaba abagendera ku mafarasi n’imikogote.

²³ Abo ni bo bakoresha bakuru bāgaba ibikorwa vya Salomo; bose na bose bār’ amajana atanu na mirongwitanu, bārāba abantu mu bikorwa.

²⁴ Maze wa mukobga wa Farawo yimuka mu gisagara ca Dawidi, aja kuba mu ngoro Salomo yamwubakiye; maze Salomo yubaka i Milo.

²⁵ Kandi Salomo yahora atanga ibimazi vyo kwoswa n’ivy’ ishimwe gatatu‐gatatu mu mwaka, abitangira ku gicaniro yubakiye Uhoraho, akosereza n’imibavu imbere y’Uhoraho.

²⁶ Kand’ umwami Salomo abāzīsha amāto i Eziyoni‐geberi, hafi y’i Eloti, kw isēsero ry’Ikiyaga Gitukura mu gihugu c’Abanyedomu.

²⁷ Maze Hiramu arungika mur’ ayo māto abantu biwe b’ abasoza bamenyereye ivy’ ikiyaga, bafatanya n’abantu ba Salomo;

²⁸ baragenda baja i Ofiru, bakūray’ amazahabu italanto amajana ane na mirongwibiri, bayazanira umwami Salomo.