Žalmi 56 - Le Devleskero Lav Andre Romaňi Čhib Slovensko 2021

O Žalmos 56

¹ Oleske, ko ľidžal o bašaviben. Kavke te giľavel: „E holubica dural.“ O michtam le Davidoskro, sar les o Filišťinci chudle andro Gat.

² Devla, av ke ma jileskro, bo o ňeprijaťeľa pre ma džan a trapinen man džives so džives.

³ Calo džives pal ma phiren mire ňeprijaťeľa; but hine ola, ko pes manca maren, ó Nekbareder Devla.

⁴ Sar man darav, mukav man pre tute.

⁵ Andro Del, saveskro lav bararav – andre oda Del pačav a na darav man. So man šaj kerel o manuš?

⁶ Sako džives previsaren mire lava, ča furt gondoľinen avri, sar man te dukhavel.

⁷ Garuven pes paš o drom, hoj pre ma te chučen, užaren pre dojekh miro krokos, kamen mange te lel o dživipen.

⁸ Mar len vaš lengro nalačhipen! Andre tiri choľi, Devla, čhiv le naroden tele!

⁹ Tu džanes pal miri žaľa; skide savore mire apsa andro caklocis. Či nane zapisimen andre tiro zvitkos?

¹⁰ Sar ke tute vičinava, akor visaľona a džana het ola, ko pre ma džan. Me džanav, hoj o Del ačhel paš ma.

¹¹ Andro Del, saveskro lav bararav, andro RAJ, saveskro lav bararav,

¹² andre oda Del pačav a na darav man. So man šaj kerel o manuš?

¹³ Doľikerava tuke mire lava, Devla; anava tuke o paľikeribnaskre obeti.

¹⁴ Se tu man cirdňal avri le meribnastar a zachraňinďal man, hoj mange te na poddžan o pindre, hoj te šaj phirav anglo Del andro švetlos le dživipnaskro.