Žalmi 108 - Le Devleskero Lav Andre Romaňi Čhib Slovensko 2021

O Žalmos 108

¹ E giľi. Le Davidoskro žalmos.

² Miro jilo tuke zorales pačal, Devla! Giľavava tuke a bašavava andral calo miro jilo.

³ Ušťi upre, harfo, citaro! Kamav te uštavel o kham.

⁴ Paľikerava tuke, RAJEJA, maškar o narodi a giľavava tuke maškar o cudzinci,

⁵ bo baro hin tiro verno kamiben dži upral o ňebos a tiro čačipen dži o chmari.

⁶ Devla, av barardo upral o ňebos; tiri slava mi el pal caľi phuv!

⁷ Zachraňin amen tire čače vasteha a šun man avri, hoj ola, kas kames, te aven spasimen.

⁸ O Del prevakerďa andral peskro Chramos: „Zviťazinava a radišagoha rozďelinava o foros Šichem a merinava avri e dolina Sukot.

⁹ Miro hin o Gilead, mange patrinel o Menaše, o Efrajim hin e prilba pre miro šero, e Judsko hiňi miro kraľiko žezlos.

¹⁰ O Moab hin miro lavoris, pro Edom čhivava miri sandalka, bo hino miro, upral e filišťiňiko phuv viskinava, sar zviťazinava.“

¹¹ Devla, ko man doanela andre lengro ohradzimen foros? Ko man ľidžala andro Edom?

¹² Či na tu, Devla? Ale tu amen odčhiďal a imar na ľidžas amare armadi.

¹³ Pomožin amenge te domarel amare ňeprijaťeľen, bo le manušeskri pomoca nane pre ňisoste.

¹⁴ Le Devleha zviťazinaha a ov uštarela pre amare ňeprijaťeľa.