Prislovja 31 - Le Devleskero Lav Andre Romaňi Čhib Slovensko 2021

O lava le Lemueloskre

¹ O goďaver lava le kraľiskre Lemueloskre – o lava dine le Devlestar, savenca les e daj bararelas avri.

² Ó, čhavo miro! Čhavo miro, saves anďom pro svetos! Šun, čhavo miro, saves mangavas le Devlestar!

³ Ma de avri tiri zor pre oda, hoj pašľoha le džuvľenca, bo oda zňičinďa but kraľen.

⁴ Nane oda šukares, Lemuelina, na pasinel le kraľenge te pijel e mol, aňi le vladarenge o aver pijiben,

⁵ bo sar pijen, bisteren pro zakoni a previsaren o pravos savore čore manušengro.

⁶ Den te pijel oles, ko imar merel, a e mol olen, ko hine andro pharipen.

⁷ Mi pijel, hoj te bisterel pre peskro čoripen, a te na leperel peske pro pharipen.

⁸ Phundrav tiro muj vaš oda, ko hino ňemo, the vaš o čačipen savore slabengro.

⁹ Phundrav tiro muj, sudzin čačipnaha a ruš vaš o čore the vaš ola, so len ňič nane!

Pal e lačhi romňi

¹⁰ Ko šaj arakhel lačha romňa? Odi romňi mol buter sar o perli!

¹¹ O rom lake pačal andre savoreste, angle late les hin sa, so leske kampel.

¹² Kerel leske o lačhipen, a na o nalačhipen, calo lakro dživipen.

¹³ Starinel pes, hoj te avel furt dos vlna the ľanos, a radišagoha kerel buči peskre vastenca.

¹⁴ Hiňi sar e loďa olengri, ko cinen the bikenen, so dural anel o maro.

¹⁵ Ušťel sigeder, sar vidňisaľol, hoj te del te chal peskra famelija a te rozďelinel e buči peskre služkenge.

¹⁶ Rodel peske e maľa a cinel la; olestar, so peskre vastenca zarodňa, sadzinel e viňica.

¹⁷ Kerel igen phares a hin la zorale vasta pre buči.

¹⁸ Džanel, hoj oda, so kerel, anel e chasna; e lampa lake na murdaľol andre dži rači.

¹⁹ Peskre vastenca chudel e pacica te kerel o thav a korkori peske kerel o pochtana.

²⁰ Le čoreske otkerel peskri burňik a peskre vasta nacirdel ke oda, kas nane.

²¹ Jevende andro šil pes na daral pal peskri famelija, bo savoren andre lakro kher hin te urel o tate veci.

²² Sivel peske o uraviben pro hadžos, a lakre gada hin le šukar fijalove ľanostar.

²³ Lakre romes mištes džanen paš e foroskri brana, kaj zabešel la phuvakre vodcenca.

²⁴ Sivel o pochtana a bikenel len; le kupcenge bikenel o sirimi.

²⁵ Hiňi urďi andre zor the andre pačiv a na daral pes avre dživesestar.

²⁶ O muj phundravel goďaha a pre čhib la hin o kamibnaskro sikaviben.

²⁷ Dodikhel mištes pre savoreste andro kher a šoha nane leňivo.

²⁸ Sar ušťen lakre čhave, žehňinen lake, the lakro rom la ašarel.

²⁹ Phenel lake: „But džuvľa hine lačhe romňija, ale tu sal savorendar nekfeder!“

³⁰ Ma de tuha te thovel avri oleha, hoj e džuvľi hiňi tuke pre dzeka, bo o šukariben našľola, ale kampel te ašarel ola džuvľa, savi pes daral le RAJESTAR.

³¹ Den kajsa džuvľa pačiv vaš lakri buči a ašaren la anglal savorende vaš oda, so kerďa!