Prislovja 20 - Le Devleskero Lav Andre Romaňi Čhib Slovensko 2021

¹ Te pijes but mol the aver pijiben, ačhes sprosto a kames tut te marel. Oda, ko mačol, nane goďaver.

² E dar le choľamen kraľistar hin sar e dar le zurive ľevostar, oda, ko les choľarela, šaj našavel peskro dživipen.

³ Hin pre pačiv le manušeske, te pes zľikerel le vesekedišagendar, ale o dilino sig demel avri choľaha.

⁴ Le leňive manušeske pes na kamel te orinel jesone, ale sar hin e žatva, rodel a nane les ňič.

⁵ Le manušeskre plani hin sar o paňi andre bari chaňig, no o goďaver manuš džanel oda te lel avri.

⁶ But manuša pes ašaren peskre pačivaľibnaha, ale ko arakhela muršes, saveske pes del te pačal?

⁷ O čačipnaskro ľidžal o žužo dživipen; bachtale hine o čhave, save pal leste ačhena.

⁸ O kraľis, savo bešel pro sudno stolkos, sprindžarel peskre jakhenca savoro, so hin nalačho.

⁹ Ko šaj phenel: „Me mange obžužarďom miro jilo; nane man ňisavo binos“?

¹⁰ Kala duj veci džungľon le RAJESKE: e falošno vaha the e falošno mira.

¹¹ Imar o čhavoro peskre skutkenca sikavel, či oda, so kerel, hin lačho the čačo.

¹² O RAJ amenge kerďa jakha, hoj te dikhas, the o kana, hoj te šunas.

¹³ Ma kam o soviben, hoj te na ačhes čoro! Ušťi, ker buči a čaľoha le marestar!

¹⁴ „Nane lačho, nane lačho!“ phenel oda, ko cinel, no sar džal het, imar pes oleha ašarel.

¹⁵ O somnakaj the o vzacna bara hine vzacna, ale o goďaver lava hine vzacneder.

¹⁶ Le o gada olestar, ko pes zaručinel vaš o cudzincos, a le e zaloha olestar, ko pes zaručinďa vaš e cudzinka.

¹⁷ O maro dochudlo le klamišagoha hin igen lačho, ale pro koňec pes tuke visarela pre poši andro muj.

¹⁸ Ker tire plani pal e porada; so buter akor, te džas andro mariben.

¹⁹ Oda, ko phirel a kerel pľetki, phenel avri o garude veci, vašoda tut ma ľiker oleha, ko but vakerel.

²⁰ Ko prekošel le dades abo la da, oda doperela avke sar e momeľi, so rači murďalol andre.

²¹ O barvaľipen, so dochudes igen sig, tuke pro koňec na anela o požehnaňje.

²² Ma phen: „Dava pale vaš o nalačhipen!“ Muk tut pro RAJ a rušela vaš tu.

²³ Le RAJESKE džungľol oda, ko važinel dvojitones; e falošno vaha nane lačhi.

²⁴ Le manušeskre kroki ľidžal o RAJ, akor, sar šaj o manuš achaľol peskre dromeske?

²⁵ Gondoľin mištes, medik phenes le Devleske, hoj les vareso deha, hoj paľis te na bajines, so phenďal.

²⁶ O goďaver kraľis avel pre oda, ko hin nalačhe, a marel len igen zorales.

²⁷ O svedomje le manušeskro hin sar e momeľi, so diňa o RAJ, hoj amenge te švicinel pre savoreste, so gondoľinas andro jilo.

²⁸ O verno kamiben the o čačipen chraňinen le kraľis; le lačhipnaha zoraľarel peskro tronos.

²⁹ O šukariben le ternengro hin lengri zor; no o šiva bala šukaľaren le phuren.

³⁰ O mariben the o modrini traden avri o nalačhipen a o rani žužaren le manušes andral.