O Job 8 - Le Devleskero Lav Andre Romaňi Čhib Slovensko 2021

Ešebno vakeriben le Bildadoskro

¹ Akor o Bildad andral o Šuach odphenďa kavke:

² „Dži kana kavke vakereha? Se tire lava hine ča sar e balvaj.

³ Či sudzinel o Del načačipnaha? Abo či previsarel o Nekzoraleder o spravodľišagos?

⁴ Tire čhave mušinde te kerel binos anglo Del, a vašoda len o Del marďa, avke sar peske zaslužinde.

⁵ Ale te tu akana igen rodeha le Devles a zorales tut mangeha ko Nekzoraleder,

⁶ te sal žužo the čačejileskro, ta ov tuke pomožinela a dela tuke pale tira famelija a kerela, hoj tuke te džal savoro mištes.

⁷ Tiro barvaľipen, so tut sas, dičhola ciknoro angle oda barvaľipen, so tut paľis dela o Del.

⁸ Ča dophuč tut pal o manuša, so dživenas angle tute, a dodžan tut, pre soste avle lengre dada.

⁹ Se amen sam ča idžeskre a na džanas ňič, bo amare dživesa pre phuv hine ča sar ciňos.

¹⁰ Lendar šaj sikľos. On tuke phenena o lava, so len hin andro jile.

¹¹ Či šaj barol e rastlina papirus ode, kaj nane močaris? Šaj barol e trsťina bi o paňi?

¹² Mek sar barol a mek nane košimen, šučol avri sigeder sar čar.

¹³ Avke doperena ola, ko bisteren pro Del; e naďej ole manušengri, so pes na daran le Devlestar, našľola.

¹⁴ Oda, andre soste pačan, hin slaboro sar thav a oda, pre soste pes muken, hin sar pavučina.

¹⁵ Te pes oprinena pre late, či len birinela te ľikerel? Chudena pes latar, ale na ľikerela avri.

¹⁶ O nalačho manuš hino sar e švižo rastlina pro kham a leskre konarica pes rozcirden pal caľi zahrada.

¹⁷ Leskre koreňa pes prephanden le barenca; roden peske than maškar o bara.

¹⁸ Ale sar ela avricirdlo pal peskro than, oda than phenela: ‚Šoha kade na sas.‘

¹⁹ Dikh, kada hin savoro radišagos, so o nalačho manuš predživel; pre leskro than barona aver andral o prachos.

²⁰ He čačo, o Del na odčhivela le spravodľive manušes, no le nalačhe manušeske na podela o vast.

²¹ Ov tuke dela pale o asaben a tu vičineha radišagostar.

²² Ale tire ňeprijaťeľa ena urde andre ladž a o stani le nalačhengre našľona.“