O Job 41 - Le Devleskero Lav Andre Romaňi Čhib Slovensko 2021

¹ „Te o manuš pačal, hoj chudela le Levijatan, ačhela sklamimen. Soča pre leste dikhela, takoj odperela.

² Ňiko nane ajso šmelo, hoj les te uštavel. Akor ko pes šaj ačhavel mange?

³ Ko man diňa vareso ešebno, hoj leske me mušinav te del pale? Se savoro tel o ňebos hin miro.

⁴ Phenava tuke pal leskre pindre, pal leskri bari zor the pal leskro baro the šukar ťelos.

⁵ Ko pal leste šaj cirdel tele leskri cipa? Ko šaj predemel leskro dvojito pancjeris?

⁶ Ko šaj phundravel o brani leskre mujeskre, se leskre dandendar avel bari dar?

⁷ Pre leskro dumo hine o šťiti andro šori, cesnones priphandle a zorale sar bara;

⁸ hine paš peste avke pašes, hoj aňi o luftos maškar lende na predžala.

⁹ Jekh paš aver hine prikikidle ke peste; hine spojimen, našťi len te rozďelinel.

¹⁰ Sar kichinel, demel avri o švetlos a leskre jakha hine lole sar o kham tosara.

¹¹ Andral o muj leske aven avri o jagale fakľi a chučkeren o iskri.

¹² Prekal o cheva andro nakh leske avel avri o thuv sar andral o roztačardo kotlos, tel savo labon o šuke kraki.

¹³ Leskro dichos rozlabarel o angara a andral o muj čhivel avri e jag.

¹⁴ Andre meň les hin e zor a e bari dar džal anglal leste.

¹⁵ O mas pre leskro ťelos chudel mištes, zorales a na čhalavel pes.

¹⁶ Leskro jilo hino sar skala, zoralo sar o mlinoskro bar.

¹⁷ Sar ušťel, o nekzoraleder lestar daran; sar ňičinel, daratar na džanen so te kerel.

¹⁸ Aňi e šabľa aňi e kopija aňi o šipi les ňič našťi keren.

¹⁹ O trast leske hin sar o phus, o brondzos sar o kirno kašt.

²⁰ O šipos andral o lukos na kerela, hoj te denašel; o bara andral e pariďa hine leske sar o plevi.

²¹ O budzogaňis leske hin sar e šuki čar; asal peske, sar andre leste čhiven o kopiji.

²² Pro per les hin ostra špici sar skľenčini, so muken pal leste o rihi andre čik.

²³ Ov kerel, hoj te taďol o oceanos sar andre piri, sar o olejos andro čaroro.

²⁴ Mukel pal peste bľišťaco drom; o moros dičhol, sar te les uľahas šiva bala.

²⁵ Nane pre phuv ňiko ajso sar ov; o džviros, savo ňisostar na daral.

²⁶ Uprunestar dikhel pre savore barikane stvoreňja; hino kraľis upral savore dziva džviri.“