O Job 40 - Le Devleskero Lav Andre Romaňi Čhib Slovensko 2021

¹ O RAJ pale vakerelas ko Job:

² „Kames tut te vesekedinel le Nekzoraledereha a te rodel pre leste o chibi? Tu, so obviňines le Devles, odphen mange!“

O Job odphenel le RAJESKE

³ O Job odphenďa le RAJESKE:

⁴ „Me na som ňič – sar tuke šaj odphenav? Chudav mange o muj.

⁵ Jekhvar prevakerďom, ale imar man na dava anglal; the dujtovar, ale imar na vakerava ňič.“

Dujto vakeriben le RAJESKRO

⁶ Akor o RAJ odphenďa le Joboske andral e burka:

⁷ „Ačh akana sar murš! Me tutar phučava a tu mange odpheneha.

⁸ Kames te phenel pre ma, hoj na som spravodľivo? Kames man te obviňinel, hoj tu te aves ňevinno?

⁹ Sal ajso zoralo sar me? Herminel tiro hangos avke sar miro?

¹⁰ Te he, akor tut ozdobin le šukaribnaha the la slavaha; uri tut upre rajikanes the andre pačiv.

¹¹ Čhiv avri tiri bari choľi! Dikh pre savore barikane a ker lenge ladž.

¹² Dikh pre savore barikane a pokorin len, rozpučin le nalačhen ode, kaj hine!

¹³ Začhiv len savoren andre phuv; zaphand len andro hrobos!

¹⁴ Paľis the me tut lašarava a udžanava, hoj tiro čačo vast tut zachraňinďa.

¹⁵ Dikh pro Behemot, saves stvorinďom avke sar the tut; chal e čar sar o bikos.

¹⁶ Dikh, savi zor les hin andro ťelos a save svali pro per!

¹⁷ Leskro chvostos hino sar o stromos cedros, o šľachi pre leskre čanga hine zorales peha prephandle.

¹⁸ Leskre kokala hine zorale sar o brondzos, o pindre sar o trastune slupi.

¹⁹ Ov hino jekh le nekzoraleder džvirendar, save o Del stvorinďa; ča leskro Stvoriťeľis les šaj domarel.

²⁰ O verchi les den te chal; ode, kaj pes savore maľakre džviri bavinen.

²¹ Pašľol tel o rastlini lotosi, hino garudo maškar o trsťini andro močaris.

²² O lotosi les zaučharen peskre ciňoha a všadzik pašal leste hin o paňale virbi.

²³ Na daral pes, sar avel o baro paňi; hino andro smirom, kajte o Jordan le zorale vlnenca leske demel dži andro muj.

²⁴ Šaj vareko korarel leskre jakha, hoj les te chudel? Abo šaj leske premarel o nakh le hakoha?

²⁵ Či šaj chudes la uďicaha le Levijatan? Abo šaj leske phandes e čhib le lanoha?

²⁶ Šaj leske precirdes e šparga prekal o cheva andro nakh? Šaj leske premares o muj le hakoha?

²⁷ Či pes tuke mangela, hoj te aves ke leste jileskro? Abo vakerela tuha šukares?

²⁸ Či tuha phandela e zmluva, hoj lestar te keres tiro otrokos pro furt?

²⁹ Bavineha tut leha avke sar le čirikleha? Priphandeha les pro lancos a deha tire čhajorenge?

³⁰ Dovakerena pes o kupci pro pľaci pal leskri cena? Rozďelinena peske les maškar peste?

³¹ Šaj leske premares e cipa la kopijaha a o šero la harpunaha?

³² Thov pre leste o vast a imar buterval oda na kereha! Šoha na bistereha pre oda mariben!“