O Job 4 - Le Devleskero Lav Andre Romaňi Čhib Slovensko 2021

Ešebno vakeriben le Elifazoskro

¹ Akor o Elifaz andral o Teman odphenďa kavke:

² „Te tuha vareko kamľahas te vakerel, zľidžaha oda? Ale ko pes šaj zľikerel, hoj te na phenel vareso?

³ Dikh, tu sikavehas but dženen a o slaba vasta zoraľarehas.

⁴ Tire lava ačhavenas pro pindre oles, ko perelas; tu dehas zor le khočen, so poddžanas.

⁵ Ale sar oda pharipen akana avľa pre tute, našťi ľikeres avri; demaďa pre tu a predaranďiľal.

⁶ Či nane tiri istota oda, hoj lašares le Devles, a tiri naďej oda, hoj džives žužes anglo Del?

⁷ No ča gondoľin, či muľa varekana vareko, ko sas ňevinno? Kaj sas o čačipnaskre zňičimen?

⁸ Andre miro dživipen dikhľom kada: Ola, ko sadzinen o nalačhe veci a rozčhivkeren o bini sar o zrnka, skidena oda upre.

⁹ Soča pre lende o Del dichinela, našľona a e balvaj leskra choľatar len zňičinela.

¹⁰ O nalačhe hine sar o ľevos, so hino choľamen a kerel vika, ale o Del lenge phagerel o danda, hoj te čhiten.

¹¹ O nalačhe hine sar o ľevi, so meren bi o chaben a lengre terne pes rozdenašen.

¹² Ale ke ma avľa počoral o lav a miro kan olestar sikra šunďa.

¹³ Akor, sar avel pro manuša o zoralo soviben, sas man o nalačhe sune,

¹⁴ chudňom te daral a izdravas; savore kokala mange razisaľonas.

¹⁵ Varesavo duchos mange pregeľa pašal o muj a o bala mange pro ťelos ačhile upre.

¹⁶ Zaačhiľa, ale me les na sprindžarďom, ča varesavi podoba mange ačhelas anglo jakha. Sas cichones a šunďom o hangos:

¹⁷ ‚Či šaj avel o manuš spravodľiveder sar o Del? Abo či šaj avel o murš žužeder sar leskro Stvoriťeľis?

¹⁸ Te o Del pes na mukel aňi pre peskre sluhi a peskre aňjelenge rachinel e chiba,

¹⁹ akor sar oda ela olenca, ko hine la čikatar a o zakladi len hin andro prachos? On ena zňičimen sigeder sar o moľos,

²⁰ tel jekh džives ena murdarde, našľona pro furt a ňiko olestar aňi na džanela!

²¹ Perena tele sar o stani, savengre koľiki hine avricirdle, merena bi oda, hoj te dochuden o goďaveripen.‘ “