O Job 3 - Le Devleskero Lav Andre Romaňi Čhib Slovensko 2021

O vakeriben le prijaťeľenca Ešebno vakeriben le Joboskro

¹ Paľis pes o Job diňa anglal a prekošelas o džives, kana uľiľa.

² Phenďa:

³ „Mi našľol oda džives, kana uľiľom, a odi rat, so phenďa: ‚Uľola muršoro.‘

⁴ Oda džives mi ačhel kalo, mi našľol oda džives le Devleske andro ňebos a te na švicinel pre leste aňi jekh lučos le khameskro.

⁵ Mi lel peske les o kaľipen the o ciňos le meribnaskro, mi bešen pre leste o chmari, mi zaučharel les o kaľipen.

⁶ A odi rat mi zalen o kaľipena; te na el maškar o dživesa le beršeskre a te na pes rachinel aňi andre jekh čhon.

⁷ Mi el odi rat bi o čhave a te na šunďol andre ňisavo radišagos.

⁸ Mi prekošen odi rat ola, ko prekošen o džives, ola, ko džanen te uštavel le Levijatan.

⁹ Te na švicinen la račakre tosarutne čercheňa, te na pes doužarel o švetlos, a te na dikhel, sar vidňisaľola,

¹⁰ bo mange na zaphandľa o vudar andro per la dake, hoj te na avav pre kada svetos a hoj te na predživav kada pharipen.

¹¹ Soske na muľom akor, sar uľiľom? Soske na muľom, soča manca e daj ločhiľa?

¹² Soske man thovenas pro khoča? Soske man denas te pijel andral e koľin?

¹³ Se akana mange ča pašľiľomas a uľahas man smirom, sučomas a odpočovinďomas mange

¹⁴ le kraľenca the lengre radcenca, save peske ačhade o hrobki,

¹⁵ abo le vladarenca, saven sas somnakaj a pherdžarde peske o khera le rupoha.

¹⁶ Abo soske na somas parundo andre phuv sar čhavoro, so odgeľa la dake? Sar čhavoro, savo šoha na dikhľa o švetlos?

¹⁷ Ode o nalačhe manuša preačhen te kerel o nalačhipen a o strapimen peske odpočovinen.

¹⁸ Ode hine o bertenoša jekhetane andro smirom, imar na šunen o hangos le bacharengro.

¹⁹ Ode hine o čoro the o barvalo, ode hin o otrokos slobodno peskre rajestar.

²⁰ Soske hin o švetlos dino olenge, ko cerpinen, a o dživipen olenge, kas hin žaľa andro jilo?

²¹ Ajse džene užaren pro meriben, savo na avel, a roden les buter sar o garudo barvaľipen.

²² Hin len baro radišagos a thoven baripen, hoj meren a džan andro hrobos.

²³ Soske hin dino o dživipen le muršeske, saveske hin garudo leskro drom a saves o Del phandľa andre pre oda drom?

²⁴ Našťi chav, bo hin man furt žaľa; miro roviben avel avri sar paňi.

²⁵ Bo oda, sostar daravas, avľa pre ma a oda, sostar izdravas, pes mange ačhiľa.

²⁶ Nane man smirom aňi odpočinkos a miro pharipen šoha na preačhel.“