O Job 29 - Le Devleskero Lav Andre Romaňi Čhib Slovensko 2021

Dešto vakeriben le Joboskro

¹ O Job mek vakerelas dureder a phenďa kada:

² „Oj, te mange uľahas avke sar andre ola čhona varekana, sar andre ola dživesa, sar man o Del stražinelas;

³ sar upral miro šero švicinelas leskri momeľi a delas man o švetlos, sar predžavas le kaľipnaha.

⁴ Andre ola dživesa somas terno the zoralo, o Del sas miro prijaťeľis a chraňinelas miro kher,

⁵ o Nekzoraleder mek sas manca a mire čhave sas pašal mande,

⁶ lanďuvavas andre šmetanka a andral miro lisos džalas avri o olejos le prudoha.

⁷ Sar phiravas andre brana le foroskri maškar o phuredera a sar mange zabešavas pre miro than,

⁸ o terne murša man dikhenas a džanas pre sera, o phure ušťenas upre a ačhenas.

⁹ O raja preačhenas te vakerel a chudenas peske o muja.

¹⁰ O vladci ačhenas čhit a e čhib lenge andro muj priľepisaľolas.

¹¹ Oda, ko man šunelas, pal ma mištes vakerelas a oda, ko man dikhelas, man lašarelas,

¹² bo zachraňinavas le čore manušes, sar peske mangelas e pomoca, a pomožinavas the la širotake, savake na sas ko te pomožinel.

¹³ Oda, ko merelas, mange žehňinelas a la vdovake keravas o radišagos andro jilo.

¹⁴ O spravodľišagos pre mande uravas sar o gada; o čačipnaskro dživipen sas pre ma sar o plašťos le turbanoha pro šero.

¹⁵ Mire jakhenca dikhavas vaš o koro a mire pindrenca phiravas vaš o bango.

¹⁶ Le čorenge somas dad a pro sudos zaačhavas vaš o cudzincos.

¹⁷ O špicovata danda le nalačheske phagavas avri, andral o danda leske cirdavas avri e korisť.

¹⁸ Vašoda mange phenďom: ‚Merava mange khere a dživava ajci dživesa, keci hin o zrnka andre poši.

¹⁹ Avava sar o stromos, kaskro koreňis hino furt andro paňi a pre kaskre konara bešel e rosa caľi rat.

²⁰ O manuša man furt lašarena a miri zor te chudel o lukos man šoha na omukela.‘

²¹ O manuša man šunenas a sas čhit, sar užarenas pre miri rada.

²² Sar me dovakeravas, on pes imar na denas anglal; mire lava pre lende kvapkinenas sar paňi;

²³ užarenas pre lende avke sar pro brišind a phundrade mujenca len pijenas sar o jaruno brišind.

²⁴ Šukares pre lende asavas akor, sar pes daranas a slabisaľonas; o švetlos mire mujeskro len delas zor.

²⁵ Me len ľidžavas a ačhiľom lengro vodcaske. Sas man ajsi pačiv sar le kraľis maškar peskre slugaďa; sar oda, ko del radišagos olen, ko hine andre žaľa.“