O Job 27 - Le Devleskero Lav Andre Romaňi Čhib Slovensko 2021

¹ O Job mek vakerelas dureder a phenďa kada:

² „Avke sar dživel o Del, savo mandar iľa o pravos, o Nekzoraleder, savo mange kerďa pharipen andro jilo,

³ medik ča dživava a ela andre ma o dichos le Devleskro,

⁴ mire mujestar na džala avri o nalačhipen a miri čhib na vakerela o klamišagos.

⁵ Šoha na phenava, hoj tumen hin čačipen! Medik na merava, furt ačhava pre oda, hoj som žužo!

⁶ Mire spravodľišagostar man zorales ľikerava a na mukava man lestar; miro jilo man na obviňinela, medik ča dživava.

⁷ Miro ňeprijaťeľis mi el mardo sar o bijedevleskro a oda, ko pre ma džal, avke sar o nalačho manuš!

⁸ Bo savi naďej hin le bijedevleskre manušes, sar merela? Sar lestar o Del lela o dživipen?

⁹ Či les o Del šunela, sar vičinela andral peskro pharipen?

¹⁰ Či radisaľola le Nekzoralederestar? Či furt lašarela le Devles?

¹¹ Sikavava tumenge, savi bari hin e zor le Devleskri; na garuvava tumenge andre, sar o Nekzoraleder Del gondoľinel.

¹² Se tumen savoredžene oda dikhľan! Ta akor soske vakeren kajse zbitočna lava?

¹³ Kada užarel le nalačhe manušes le Devlestar, kada chudena o bitanga le Nekzoraleder Devlestar:

¹⁴ Kajte les ela but čhave, merena andro mariben; a leskre potomken na ela so te chal.

¹⁵ Ola, ko predživena, merena le nasvaľibnastar; a mek aňi lengre vdovi pal lende na rovena.

¹⁶ Kajte skidela rup ajci sar prachos a gada ajci sar čik,

¹⁷ no o spravodľivo pre peste urela oda, so ov skidela, a leskro rup peske rozďelinena o ňevinna manuša.

¹⁸ O kher ačhavel slaboro sar pavučina, sar budkica, savi peske kerel o stražňikos pre maľa.

¹⁹ Sar o nalačho manuš džal te sovel, hino barvalo ale sar otkerel o jakha, leskro barvaľipen našľiľa.

²⁰ E bari dar les zalela sar e potopa; e zoraľi balvaj pre leste avela rači.

²¹ Lela les e zoraľi balvaj pal o vichodos a našľola, šulavela les pal leskro than.

²² Demela pre leste bi o jileskeriben, sar latar kamela so neksigeder te denašel het.

²³ Odi balvaj tapčinela peskre vastenca, hoj lestar te asal; kerela leske ladž, sar denašela pal peskro than.“