O Job 23 - Le Devleskero Lav Andre Romaňi Čhib Slovensko 2021

Ochtoto vakeriben le Joboskro

¹ Akor o Job odphenďa kada:

² „The adadžives man igen sťažinav a vakerav pro Del. Stukinav dukhatar, no leskro zoralo vast man furt marel.

³ Oj, te ča džanľomas, kaj les te rodel; te šaj geľomas dži ke leste khere!

⁴ Anďomas leske avri miri veca a phenďomas leske pherdo lava pre miri obrana.

⁵ Akor man dodžanľomas, so mange odphenďahas, a achaľiľomas, so mange phenďahas.

⁶ Či pre mande chučiľahas avri caľa peskra zoraha? Na! Ov man šunďahas avri.

⁷ Ode paš leste o čačo manuš šaj dokazinel, hoj hino ňevinno; a ode uľomas oslobodzimen mire sudcastar pro furt.

⁸ Te džav pro vichodos, nane ode, te džav pro zapados, našťi les arakhav;

⁹ te kerel vareso pro severos, na dikhav les, te man visarav pro juhos, na dičhol les.

¹⁰ Ale ov džanel mire droma, khatar phirav; te man skušinela avri, dikhela, hoj som žužo sar o somnakaj.

¹¹ Mire pindre phirenas mištes pal leskre stopaja, ľikeravas man pre leskro drom a na odgeľom.

¹² Na omukľom o prikazaňje, so mange phenďa, o lava andral leskro muj mange važinav buter sar miro chaben.

¹³ Ov pes na čerinel – ko les šaj prevakerel? Se ov kerel oda, so kamel.

¹⁴ Doľikerela savoro, so prekal ma naplaňinďa, a les hin mek pherdo plani manca.

¹⁵ Vašoda man darav, sar avava angle leste; sar pre oda gondoľinav, darav man lestar.

¹⁶ O Del slabisarďa miro jilo; o Nekzoraleder man daraďa avri.

¹⁷ Ale kajte som andro kaľipen, na somas čhit; kajte o kaľipen učharel andre miro muj.“