O Job 18 - Le Devleskero Lav Andre Romaňi Čhib Slovensko 2021

Dujto vakeriben le Bildadoskro

¹ Akor o Bildad andral o Šuach odphenďa kada:

² „Kana imar preačhena te vakerel? Chuden goďi, a paľis vakeraha!

³ Soske amen len sar dobitkos? Soske sam andre tumare jakha diline?

⁴ Či vaš tuke, so tut korkoro dukhaves tira choľaha, ela e phuv zamukľi? Abo či pes e skala čhalavela pal peskro than?

⁵ Le nalačhe manušeske o švetlos murdaľola andre a o plameňis leskra jagakro preačhela te labol.

⁶ Andre leskro stanos o švetlos kaľola a e momeľi paš leste labola avri.

⁷ Leskre kroki sas zorale, ale slabisaľona; perela pro plani, save ov korkoro kerďa.

⁸ Bo leskre pindre les cirden andre sita a uštarel pre pasca.

⁹ Zachudel leske e peta, e slučka les zacirdel zorales.

¹⁰ O lanos hino leske garudo pre phuv a pro chodňikos hiňi thoďi e pasca.

¹¹ Pal dojekh sera pre leste avel e dar, džal pal leste pre dojekh krokos.

¹² Leskri zor slabisaľol bokhatar a furt pal leste phirel e bibach.

¹³ O nasvaľiben leske chal tele e cipa; o nekgoreder meribnaskro nasvaľiben chal tele leskre vasta the pindre.

¹⁴ Cirdena les avri andral leskro stanos, pre savo pes mukelas, a anena les andre nekbareder dar.

¹⁵ Leskro stanos labol avri; e sira pes čhivel ode, kaj bešelas.

¹⁶ O koreňa telal leske kirňona a o konara upral leske šučona avri.

¹⁷ Pre phuv pes pre leste bisterela a ňiko peske pre leskro nav na leperela.

¹⁸ Čhivena les avri andral o švetlos andro kaľipen; tradena les avri andral o svetos.

¹⁹ Na ela les potomki, ňisave čhave maškar peskre manuša; ňiko, ko predžiďiľahas ode, kaj bešelas.

²⁰ Andre leskro bibachtalo džives o manuša pal o zapados predarana a pro vichodos izdrana daratar.

²¹ He čačo, avke oda hin le kherenca, kaj bešen o nalačhe manuša; kajso hin o koňec olengro, ko na prindžaren le Devles.“