O Job 14 - Le Devleskero Lav Andre Romaňi Čhib Slovensko 2021

¹ „Dojekh manuš dživel ča sikra a hin les pherdo pharipen.

² Kvitňisaľol sar e kvitka a šučol avri, našľol sar o ciňos a na ľikerel avri.

³ A tu, Devla, dikhes pre kajso manuš? Anes les anglal tu pro sudos?

⁴ Ko šaj kerel le nažuže manušestar žužo manuš? Ňiko!

⁵ Le manušeske hin dine leskre dživesa a tu rachines leskre čhona, tu leske thoďal o hraňici, save našťi predžal.

⁶ Ma dikh pre leste, de leske te odpočovinel, medik leske na predžala o džives sar le robotňikoske, savo kerel e phari buči.

⁷ Se the le stromos hin naďej, te les čhinena tele, barola pale a leskro nevo konaris zoraľola.

⁸ Kajte leskro koreňis phurola andre phuv a leskro kmeňos merela andro prachos,

⁹ soča voňinela o paňi, takoj pučinela avri a mukela o konara sar e nevi rastlina.

¹⁰ Ale sar merel o manuš, ačhel te pašľol; phurdel avri peskro dichos, a kaj hino?

¹¹ Avke sar o paňi našľol andral o jazeros, sar o paňi andre jarka cikňol a šučol avri,

¹² avke the o manuš, te peske pašľiľa, imar na ušťela. Medik ľikerela o ňebos, o manuša pes na prekerena a andral peskro soviben na ušťena.

¹³ Joj, te man garuďalas andro Šeol a mukľalas man ode, medik tut na pregeľahas e choľi! Ó, te man diňalas varesavo časos a paľis tuke pre ma leperďalas.

¹⁴ Te varesavo manuš merel, či obdživela pale? Sako džives andre miri phari služba užarav, kana imar oda predžala!

¹⁵ Akor tu vičinďalas a me man tuke diňomas anglal; igen kamľalas le manušes, saves kerďal le vastenca.

¹⁶ Bo akor pozorinďalas mire kroki, ale na rachinďalas mange o bini.

¹⁷ Mire bini zakerďalas andre andro gono a mire nalačhipena učharďalas andre.

¹⁸ Ale avke sar o verchos rozperel a krušisaľol, sar pes e skala čhalavel pal peskro than,

¹⁹ avke tu zňičines le manušeskri naďej; avke sar o paňi rozphagerel o bara a sar o zorale prudi len peha e phuv.

²⁰ Domareha les jekhvar a pro furt a mušinel te džal; čerineha leskro muj a bičhaveha les het.

²¹ Te ela leskre čhaven pačiv, na dodžanela pes oda; te ena teledikhle, na džanela ňič.

²² Šunel e dukh ča pre peskro ťelos a hin les žaľa ča vaš peske korkoreske.“