O Job 13 - Le Devleskero Lav Andre Romaňi Čhib Slovensko 2021

¹ „Savoro, so tumen dikhľan, dikhľom the me, savoro, so tumen šunďan, šunďom the me a achaľiľom oleske.

² Savoro, so tumen džanen, džanav the me, ňisoha pal tumende na zaačhav.

³ Ale me vakerava le Nekzoraleder Devleha a kamav te sikavel miro čačipen anglo Del.

⁴ No tumen man meľaren le klamišagoha. Tumen nalačhe doktorale!

⁵ Joj, te uľanas čhit, akor uľanas goďaver!

⁶ No ča šunen man avri, so phenav, a dikhen, sar man obraňinava.

⁷ Či kamen te vakerel o klamišagi, hoj te zaačhen vaš o Del? Kamen te klaminel leske pro lačho?

⁸ Kamen vaš leske te rušel? Chuden paš o Del?

⁹ Doperena mištes, te tumen preskuminela? Kamen les te klaminel, avke sar klaminen le manušes?

¹⁰ Čačes tumen pokarhinela, te počoral chudena paš leste.

¹¹ Či tumen na daran leskra slavatar a na avel pre tumende lestar e dar?

¹² Tumare goďaver lava hine sar o prachos andral o bov; o lava, savenca tumen braňinen, hine slaba sar čik.

¹³ Akana sikra čhiten, muken man te vakerel, a mi ačhel pes mange, so kamel!

¹⁴ Som pripravimen pre savoreste, the te del miro dživipen!

¹⁵ Kajte man murdarela, me man the avke mukav pre leste a obraňinava mire droma angle leste.

¹⁶ The oda ela miri zachrana, bo ňisavo bijedevleskro manuš anglal leste na avela.

¹⁷ Šunen mištes, so phenav; mire lava tumenge mi džan andro kana!

¹⁸ Akana som pripravimen man te braňinel, džanav, hoj man ela čačipen.

¹⁹ Kamel pes manca vareko te kerel? Te he, avava čhit a merava.

²⁰ Ča duj veci mange ker, Devla, a me man tuke na garuvava:

²¹ Odle mandar tiro vast a preačh man te daravel tira daraha!

²² Paľis vičin a me man dava anglal, abo me chudava te vakerel a tu mange odpheneha.

²³ Keci kerďom nalačhipen the bini? Sikav mange miri vzbura the miro binos.

²⁴ Soske garuves o muj a ľikeres man ňeprijaťeľiske?

²⁵ Trapineha e prajta odphurdľi la balvajatar? Džaha pro šuko phus?

²⁶ Bo zapisines tuke andre o nalačhe veci pre mande a des mange te skidel upre mire terňipnaskre bini.

²⁷ Phandes mange o pindre andro kaštune kľigina; pozorines savore mire droma a poznačines o stopi, khatar phirenas mire pindre,

²⁸ a vašoda mange rozperel o ťelos sar vareso kirno, sar o gada, save chal o moľos.“