O Job 11 - Le Devleskero Lav Andre Romaňi Čhib Slovensko 2021

Ešebno vakeriben le Cofaroskro

¹ Pre oda o Cofar andral e Naama odphenďa kavke:

² „Či na kampel pre savore kala lava te odphenel? Mušinel le bebľošis furt te el čačipen?

³ Kerela tiro bebľišagos oda, hoj aver džene ena čhit? Či ňiko tuke na priphenela, sar tuke keres pheras?

⁴ Bo phenďal le Devleske: ‚Miro sikaviben hino bi e chiba a andre tire jakha som žužo.‘

⁵ Oj, ča te vakerďahas o Del, te otkerďahas peskre vušta pre tu

⁶ a sikaďahas tuke o garude goďaveripena, bo o goďaveripen šaj te dikhel pal o buter seri. Akor dikhľalas, hoj o Del tuke odmukľa ajse bini, pal save aňi na džanehas.

⁷ Či šaj preskumines le Devles? Či šaj arakhes avri savoro prindžaripen pal o Nekzoraleder?

⁸ Se hino učeder sar o ňebos. Akor so šaj keres? Hino teleder sar o Šeol. Akor so šaj džanes?

⁹ Merinel buter sar e phuv a hino buchleder sar o moros.

¹⁰ Te o Del avela a dela tut te phandel andre a zvičinela o sudos, ko les šaj ačhavela?

¹¹ Se ov džanel, save manuša hine falošna. Sar dikhel lengro nalačhipen, či oda mukel ča avke?

¹² Ale o dilino manuš chudela goďi ča akor, sar le dzive somariske uľola manuš.

¹³ No, te tu phundraveha tiro jilo a nacirdeha tire vasta ke leste,

¹⁴ te ela binos andre tire vasta a odčhiveha les, te na domukeha o nalačhipen andre tiro stanos,

¹⁵ akor bi e ladž šaj hazdeha upre tiro muj, ačheha zorales a na daraha tut.

¹⁶ Akor bistereha pre tiro trapišagos, lepereha tuke pre leste sar pro paňi, so odčuľiľa het.

¹⁷ A o dživipen švicinela buter sar o džives pro dilos, o kaľipen ela sar o tosara.

¹⁸ Akor tu pačaha, bo ela tut naďej, aveha ochraňimen a pašľoha tuke andro smirom.

¹⁹ Džaha tuke te pašľol a ňiko tut na daravela avri; but džene tuke kamena te el pre dzeka.

²⁰ Ale o jakha le nalačhengre korisaľona, na ela len kaj te denašel a lengri naďej ela ča o posledno dichos.“