O Job 10 - Le Devleskero Lav Andre Romaňi Čhib Slovensko 2021

¹ „Mira dušake džungľol o dživipen. Dava mandar avri savoro, so man trapinel, andral o pharipen mira dušakro prevakerava.

² Phenava le Devleske: ‚Ma odsudzin man! De mange te džanel, soske pre mande džas!‘

³ Mištes tuke hin te trapinel a te odčhivel e buči, so kerďal tire vastenca? Ale o plani le nalačhengre tuke hin pre dzeka?

⁴ Či tut hin le manušeskre jakha? Či dikhes avke sar amen?

⁵ Či hine tire dživesa sar o dživesa le manušeskre? Či hin tire berša sar o berša le muršeskre,

⁶ hoj kames pre ma te arakhel e vina a rodes pre ma o binos?

⁷ Kajte džanes, hoj na som vinnovato a hoj man ňiko našťi cirdel avri tire vastendar?

⁸ Tire vasta man kerde a sforminde. A akana man kames calkom te zňičinel?

⁹ Mangav tut, ma bister, hoj man kerďal čikatar. Visareha man pale pro prachos?

¹⁰ Či man na čhiďal avri sar o thud a zahusťinďal sar o ciral?

¹¹ Urďal pre ma o mas the e cipa, prephandľal mange o kokala le žilenca.

¹² Tu man diňal dživipen a presikaďal mange tiro kamiben; starinehas tut pal ma a ľikerehas miro duchos.

¹³ Ale kada garuvehas andro jilo; džanav, hoj kada tuke sas pre goďi:

¹⁴ Tu ča užares, hoj te dikhes, či kerava binos, a na mukes man bi o trestos.

¹⁵ Vigos mange, te som vinnovato! Ale kajte uľomas spravodľivo, aňi akor man našťi ľidžav upre, bo e ladž man zalel andre a som začhido le pharipnaha!

¹⁶ Te man hazdav upre, aves pre ma sar ľevos a pale man dukhaves tira strašna zoraha.

¹⁷ Ačhaves pre mande neve švedken a choľisaľos pre mande furt buter; tire utoki pre ma aven jekh pal aver!

¹⁸ Akor soske man iľal avri andral o per mira dake? Šaj muľom ode a ňiko man na dikhľahas!

¹⁹ Uľomas avke, sar te šoha na uľomas; andral o per uľomas preľigendo andro hrobos.

²⁰ Či man nane ča frima dživesa? Vašoda preačh, muk man sikra te radisaľol,

²¹ medik na džava andro svetos, kaj hin o kaľipen the o ciňos le meribnaskro, khatar imar na avava pale;

²² medik na džava andro svetos, kaj hin igen baro kaľipen, o nekbareder kaľipen, kaj nane ňisavo poradkos, kaj mek the o švetlos hin sar kaľipen.“