Teu Maan Caoh 16 - Riang

Timothi lan tawiz Paul boh Silas

¹ Paul lan phraeoz weng Derbe boh weng Listra, a diz maang teu paez hawkz mus hnhz daz Timothi, mah hnhz naeh ihz yum yam kheuz Yio, paz hnhz samz naeh kheuz Krik.

² Hnhz maang sre tawiz kuanz mai a weng Listra boh weng Ikoni.

³ Paul sunz nap hnhz lan tawiz daehz rae saetz aez cawkz hurz hnhz. Kawp ihz Yio moh a diz keui mas paz keuh Timothi naeh kheuz Krik.

⁴ Meuz keuh datz lan tawiz weng ne lao aez kuanz mai yum yam keui cih tawiz ceun mony reu ma teu maan boh ihz mawh cumz caoh teur tam mok tuhz weng Yerusalem.

⁵ Kawp ceun diz tawiz cumz caoh keui reung dengz yum keuh klakz khreumz rae ihz heungz truz klawhz seu ngihz.

Paul awlz pyatik ihz prih Makedoni raak daehz

⁶ Keuh datz lan a nae prih Phrikia boh a nae prih Kalatia kawp daz Khuanz Seu Ngamz nam aez keuh rawz traz tuhz prih Asia.

⁷ Meuz keuh phraeoz orz prih Misia ne khatz phawmz ngaz lan thaengz prih Bithinia, keuiz daz Khuanz Yesuhz nam aez keuh lan.

⁸ Keuh datz lan tuhz prih Misia phraeoz weng Troas.

⁹ Meuz borz an diz Paul awlz pyatik, ihz prih Makedoni ceng maanyz reung dengz kawr a daehz daz, “Lo truz prih Makedoni rae kawr ehz raez.”

¹⁰ Waaiz Paul awlz pyatik ne ehz kaw khriungz luat ta lan prih Makedoni kawp daz ehz loz phawmz daz Phraz Pen Caoh raak leh ehz aez rawz plaez reu oiz rak ihz prih an diz nahz.

Lidia plaak plaai tuhz weng Philippi

¹¹ Ehz lae thaz weng Troas tumz ceun luang lan tawz tawz klunz Samothrase, ceun kap siz samz phraeoz weng Neapolis.

¹² Tae a diz lan weng Philippi, an naeh weng mawh tuhz a nae prih Makedoni. Samz naeh weng khunz Rom keui upz peung. Ehz moh a diz heungz seu ngihz.

¹³ Kaai seu ngihz sinz ne ehz lae lan thaz nawk keur wah weng rae lan cu tawiz ti an ehz thaang maang ti suz tawngz waar omz mawh ne. Ehz keu dez lao aez keun nyah an naeh teur kawmz a diz keui nahz.

¹⁴ Tuhz keuh ne maang keun nyah hawkz mus hnhz daz Lidia, an naeh ihz weng Thiatira, an ka banz rong eurz. Hnhz naeh ihz koz kwaai Phraz Pen Caoh. Phraz Pen Caoh lawk phawmz hnhz aez hnhz kut phawmz teuk ngarz an Paul lao.

¹⁵ Waaiz hnhz boh ihz kaang keuh leh teuk sruz ne hnhz nap ehz daz, “Beuk pehz maatz ohz naeh ihz yum mawn Caoh Phraz kaw truz thangz kaang ehz naz,” krio daz aez ehz weng.

Paul kaar Silas klaez thang tuhz weng Phlippi

¹⁶ Naeh seu seu ngihz, meuz ehz lan ti suz tawngz ne ehz awlz keun nyah kyehz hawkz an naeh kuanz leng ihz keui. Keun nyah an diz kawp khuanz phiz kut rae caang mawz tak, cih aez tahz paz leng daehz keui bawnz paekz heungz baaiz.

¹⁷ Keun nyah an diz lan tawiz Paul boh ehz rae raak daz, “Keuh keu ni naeh peur cao Phraz Pen Caoh an trawng dutz, rawz aez pehz nahz traz khyawt.”

¹⁸ Keun nyah kyehz ne daz ceun diz heungz seu ngihz baaiz, cih teuk sukz phawmz Paul, Paul kaw waaiz yawt daz phiz an diz nahz, “Lae lan thaz a diz raez. Ohz leh mus Tahz Yesuhz Khris lao mih.” Phiz an diz kaw lae lan luat thaz keun nyah ne.

¹⁹ Tahz paz leng keun nyah kyehz an diz keui mas daehz nam caang suamz tawiz hnhz leui rae mat Paul boh Silas botz lan cu aacz ngaai ihz mawh tawz teur laas.

²⁰ Meuz phraeoz a ihz mawh ne keuh daz, “Ihz keu ni naeh kheuz Yio rae ya weng ehz.

²¹ Kaar sawnz aez an pleung thungz ehz. Ehz naeh ihz prih Rom nam caang leh tawiz cih tawiz an kaar sawnz.”

²² Wungz ihz keui kaw teur aacz daehz seuk weur kawi kaar. Ihz mawh keui lao siarz thengz kreung rae leh kawn tiz kaar.

²³ Waaiz keuh tiz suhz baaiz ne sapz tuhz thang, lao tang tahz thang nahz aez yawt rak rak kaar.

²⁴ Ceun bawnz mony lao ne tahz thang leh kaar sapz lukz tuhz nao, sapz tang khoi cawng.

²⁵ Meuz kraao khinz sawmz ne Paul kaar Silas suz tawngz ngawk lupz phrawz Phraz Pen Caoh. Ihz klaez thang keui kaw teuk ngarz kaar.

²⁶ Meuz diz luat reu yung kruhz krang baaiz, ti tam teungz keun rang keui kaw keusz. Keur wah thang keui kaw lawk plaangz lan luat, nuarz hirz an mat kaai ihz klaez thang hacz aamz keui kaw seuk khawz hacz aamz.

²⁷ Tahz thang dangz truz kaw awlz keur wah thang keui seuk lawk boh ne thaang ihz klaez thang keui a wa lawt hacz rae truatz waac ngaz piamz mial daehz.

²⁸ Paul kaw raak keurz daz, “Yak piamz mial phawmz daehz, ehz hacz aamz naeh boh a niz.”

²⁹ Tahz thang kaw maanyz leh ngal an peun kleoz ne wang kut cu kupz teur ceus boh aacz ngaai Paul kaar Silas.

³⁰ Hnhz raak lae kaar thaz nawk thang ne maanyz, “Ohz ngaz bawnz cih naehz aez daehz bawnz reung dengz khyawt a?”

³¹ Kaar kaw daz, “Yum Tahz Yesuhz Khris raez, beuk mih yum kaw mih boh ihz kaang pehz bawnz reung dengz khyawt.”

³² Meuz diz kaar lao aez hnhz nahz boh ihz kaang keuh nahz mony reu ma Caoh Phraz.

³³ Borz an diz kraao an diz luat tahz thang haaoz aez ti suhz kaar. Hnhz boh ihz kaang keuh keui leh luat teuk sruz omz.

³⁴ Hnhz paangz leh Paul kaar Silas weng kaang daehz damz seum suamz. Kawp hnhz boh ihz kaang keuh bawnz yum Phraz Pen Caoh ne teur aacz daehz seuz baaiz.

³⁵ Ceun kap siz ne tahz tatz traz keui cao siukz daehz keui truz lao tahz thang daz, aez plawiz kaar.

³⁶ Tahz thang lao Paul nahz, “Ihz mawh keui a wa lao aez plawiz paarz. Kawp ceun diz rae, pehz a wa lan bawnz. Lan nimz nimz naz.”

³⁷ Keuiz daz Paul daz siukz keui nahz, “Aaiz naeh boh ihz prih Rom kaw, keuh tiz aaiz aacz ngaai ihz, nam caetz naehz samz sapz tuhz thang. Seu ni samz keuh sunz plawiz lae aaiz pras pras. Nam rak seum cih ceun diz. Aez toz keuh tahz truz plawiz aaiz raez.”

³⁸ Meuz ihz mawh keui ngarz tawz siukz lawng kaar naeh ihz prih Rom ne keuh kaw doz.

³⁹ Kawp ceun diz keuh truz tawngz paan Paul kaar Silas. Keuh plawiz kaar, upz khyawz wawn aez kaar lae thaz weng an diz.

⁴⁰ Waaiz kaar lae thaz thang ne lan kaang keuh Lidia, teur awlz tang kuanz mai keui, aez keuh nahz keum rang kaw lae lan thaz weng an diz.