Lukas 23 - Riang

Ihz leh Yesuhz aapz khunz Pilat

¹ Wungz ihz keui hacz aamz ceng rae leh Yesuhz lan cu khunz Pilat.

² Keuh maap Yesuhz daz, “Ehz mat Hnhz kawp daz Hnhz an ni cih aez ihz keui pleung reung dengz, daz tang yak thaamz khawn khunz Kaesar, daz Daehz naeh Khris naeh Khunz.”

³ Khunz Pilat maanyz Hnhz, “Mih naeh Khunz Yio haz?” Yesuhz kaw lao, “Naeh ceun mih daz ne.”

⁴ Khunz an diz lao beunz caangz boh wungz ihz keui daz, “Ohz nam awlz reung dengz kawi naehz kaai Hnhz.”

⁵ Keuiz daz keuh baaiz lao samz samz daz, “Hnhz an ni sawnz aez ihz seuk weur tiukz sirz tuhz prih Yio, tae leh prih Kalile taw phraeoz a niz.”

Ihz phuhz Yesuhz tawz khunz Herot

⁶ Meuz khunz Pilat ngarz ceun diz ne maanyz, “Hnhz naeh ihz prih Kalile haz?”

⁷ Meuz hnhz mas Yesuhz naeh ihz eungz khunz Herot upz peung ne phuhz Yesuhz lan tawz khunz Herot, meuz phangz an diz khunz Herot naeh tuhz weng Yerusalem.

⁸ Meuz khunz Herot awlz Yesuhz ne seuz phawmz baaiz kawp daz hnhz sunz awlz Yesuhz a wa ceu nawhz. Hnhz mang sunz awlz an laak laaiz Yesuhz cih plaez.

⁹ Khunz Herot maanyz Yesuhz heungz baaiz, keuiz daz Hnhz nam tawpz hawkz hawkz.

¹⁰ Beunz caangz boh ihz mawz kyaamz keui ceng maap mawn Hnhz baaiz.

¹¹ Khunz Herot boh siukz hnhz keui ngot keulz Hnhz, plang Hnhz. Keuh kap aez Hnhz nahz kreung laep kaw phuhz mial tawz khunz Pilat.

¹² Kaai seu ngihz an diz khunz Herot boh khunz Pilat penz kuanz bohz, meuz aacz an diz kaar teur naeh raan su daehz.

Tatz traz aez Yesuhz yam

¹³ Khunz Pilat raak teur cuhz beunz caangz, ihz peur aacz boh ihz keui,

¹⁴ hnhz daz keuh nahz, “Pehz leh Hnhz truz cu ohz naeh ceun ihz peur aacz seuk weur tiukz. Ohz a wa caetz Hnhz aacz ngaai pehz kaw ohz nam awlz reung dengz kawi naehz ceun pehz maap.

¹⁵ Khunz Herot kaw nam awlz rae phuhz mial tawz ehz. Hnhz an ni nam cih naehz an theukz yam.

¹⁶ Kawp ceun diz ohz ngaz leh kawn nuarz tiz Hnhz rae plawiz mial.”

¹⁷ Kawp daz meuz phangz pawiz ne khunz tomz plawiz ihz wit teun akz.

¹⁸ Ihz keui raak daz, “Piamz thengz Hnhz! Plawiz ehz nahz Barapbas!”

¹⁹ Barapbas samz naeh ihz klaez thang kawp seuk weur tiukz tuhz weng rae piamz ihz.

²⁰ Khunz Pilat sunz plawiz Yesuhz rae lao plaez thaengz keuh.

²¹ Keuiz daz keuh yeung raak daz, “Tawkz piamz Hnhz kaai keun rang! Tawkz piamz Hnhz kaai keun rang!”

²² Khunz Pilat kaw lao keuh ta waiz laehz, “Kawp naehz? Hnhz cih pleung naehz? Ohz nam awlz reung dengz kawi naehz an theukz yam. Ohz ngaz leh kawn nuarz tiz Hnhz rae plawiz mial.”

²³ Keuiz daz reus ihz maanyz piamz Yesuhz kaai keun rang ne raak bawrz baaiz usz rae pae lan.

²⁴ Kawp ceun diz khunz Pilat kaw tatz traz tawiz ceun ihz maanyz.

²⁵ Hnhz plawiz ihz an naeh tuhz thang, an seuk weur tiukz rae piamz ihz an ihz maanyz, samz aapz aez keuh nahz Yesuhz teur keuh sunz cih.

Piamz Yesuhz kaai lakz klawngz klaengz

²⁶ Meuz siukz keui leh lan Yesuhz ne, keuh takz leh Simon an naeh ihz prih Siren an truz thaz pruh rae ngaz kut tuhz weng. Keuh cao hnhz baekz keun rang klawngz klaengz, aez lan tawiz puatz Yesuhz.

²⁷ Ihz wungz mawh keui lan tawiz Yesuhz, pa tang keun nyah phawmz kawcz yaam krai tawiz Hnhz.

²⁸ Yesuhz waaiz lao keuh nahz, “Keun nyah weng Yerusalem keui aez, yak yaam kawp Ohz! Yaam ta pehz boh ta kuanz pehz nahz raez.

²⁹ Seu ngihz ihz keui ngaz daz, ‘Keun nyah manz, klungz an nam ti keun meur boh buhz an nam ti peun buhz kuanz keui naeh an rak mawn,’ ne ngaz phraeoz.

³⁰ Meuz phangz an diz ihz keui ngaz daz rang keui nahz, ‘Yaatz sapz ehz,’ daz pukz keui nahz, ‘Reupz ehz.’

³¹ Beuk keuh cih kaai khaehz imz thanz teur ni kaw meuz khaehz an diz hawngz ne ngaz naeh seu naez?”

³² Ihz raai keu aarz kaw leh lan piamz tawiz Yesuhz.

³³ Meuz keuh phraeoz ti Klakz Kingz ne leh Yesuhz tawkz kaai keun rang klawngz klaengz, ihz raai keu aarz kaw tawkz plaakz takz dahz hawkz, takz kaaiz hawkz.

³⁴ Yesuhz daz, “Plawiz lawt aez keuh raez, Paz! Keuh nam mas daehz cih naehz lawh.” Keuh teuk klaez ceu kawk teur baengz leh kreung Yesuhz.

³⁵ Ihz keui ceng yawt boh. Ihz peur aacz keui ngot keulz Hnhz daz, “Hnhz an ni khyawt ihz, beuk Hnhz naeh Khris kaw aez khyawt mial Daehz raez.”

³⁶ Siukz keui cih peuk pyaak Hnhz, truz cu Hnhz rae aez Hnhz nahz omz seu pit praang.

³⁷ Keuh daz Hnhz nahz, “Beuk Mih naeh Khunz Yio kaw khyawt mial Daehz raez!”

³⁸ Taemz mok lik lang kol Hnhz daz, “Hnhz an ni naeh Khunz Yio.”

³⁹ Ihz raai hawkz an talz ihz tawkz mok kaw mony Hnhz daz, “Mih nam anz Khris haz? Khyawt toz Daehz boh khyawt aaiz raez.”

⁴⁰ Keuiz daz ihz raai thaengz hawkz samz nal daz, “Mih nam doz Phraz haz? Mih kaw talz taam tang daehz ceun Hnhz.

⁴¹ Aaiz kiungz boh talz kawp daehz pleung, keuiz daz Hnhz nam cih pleung naehz.”

⁴² Hnhz lao Yesuhz nahz, “Tang tang ohz, meuz Mih truz tuhz prih Daehz ne.”

⁴³ Yesuhz mial daz hnhz nahz, “Ohz daz mawn mih nahz, meu ni mih naeh kawmz Ohz tuhz prih Paradiso.”

Yesuhz yam

⁴⁴ Meuz diz naeh kraao seu ngihz teun cang, bimz lang tang prih taw phraeoz waiz na ri teuk borz.

⁴⁵ Prih bimz seuk ngih, pahz kangz tuhz wat ne seuk siarz lae aarz plaakz.

⁴⁶ Yesuhz raak keurz daz, “Paz, Ohz leh khuanz Daehz aapz tihz Mih.” Hnhz daz ceun diz kaw plotz phawmz Daehz.

⁴⁷ Meuz ihz mawh siukz awlz an naeh keu diz ne lupz phrawz Phraz Pen Caoh daz, “Hnhz an ni naeh mawn ihz keu sangz.”

⁴⁸ Meuz wungz ihz hacz aamz an yawt boh lawng a wa naeh keu diz kaw beutz seu ongz daehz, phawmz kyehz weng kaang daehz.

⁴⁹ Ihz tomz Yesuhz boh keun nyah tawiz puatz Hnhz thaz meuz prih Kalile samz ceng teun yaan teuk soz an keu diz.

Saangz keo Yesuhz

⁵⁰ Meuz phangz an diz tuhz prih Yio, weng Arimathe ne maang ihz mawh rumz hawkz, mus hnhz daz Yosep, hnhz naeh ihz rak ihz keu sangz.

⁵¹ Hnhz naeh ihz mang prih Phraz Pen Caoh rae hnhz nam prawm tawiz ceun keuh tatz traz boh an keuh cih.

⁵² Hnhz kut maanyz toz yam Yesuhz tawz khunz Pilat.

⁵³ Waaiz an diz, hnhz leh teuk klaez thaz keun rang klawngz klaengz, wian nahz banz khyawz teun mehz. Samz lan mok tuhz tham peun lu reu aangz, an yaeh maat ti saangz keo seu pawk.

⁵⁴ Seu ngihz an diz maen kaai seu ngihz phit, a wa thatz seu ngihz sinz.

⁵⁵ Keun nyah an truz tawiz Yesuhz thaz prih Kalile keui lan tawiz Yosep, yawt toz yam Yesuhz mok ceun nae tuhz tham.

⁵⁶ Keuh weng raenz nam man hawm boh meoz an hawm keui. Kaai seu ngihz sinz ne keuh preumz tawiz traz.