Lukas 21 - Riang

Paekz lu yah keu maaiz

¹ Meuz Yesuhz temz yawt boh ne awlz ihz maang keui sapz paekz lu tuhz teuk dangz paekz tuhz wat.

² Hnhz awlz yah keu maaiz phaanz hawkz sapz paekz tawng kyehz aarz khlaepz.

³ Hnhz daz, “Ohz daz mawn pehz nahz, yah keu maaiz phaanz ne sapz heungz leuz keuh klawhz ihz.

⁴ Kawp daz ihz keui phraez leh kaai daehz maang rae sapz, keuiz daz yah keu maaiz an phaanz ne leh hacz aamz an daehz maang an lo damz phawmz daehz ne lu.”

Wat ngaz luh

⁵ Teu paez Hnhz teur ka keui daz lawng wat laep baaiz, leh reu aangz an laep boh leh phrihz phrahz ihz lu keui cih mok. Keuiz daz Yesuhz lao,

⁶ “Pehz awlz boh reu aangz keu ni. Kraao reu aangz keu ni nam baetz hawkz kaai hawkz ne ngaz phraeoz, ngaz talz ya thengz hacz aamz.”

Phez longz

⁷ Keuh maanyz, “Tahz ehz, ngaz naeh ceun diz peuk naeh hoh? Meuz ngaz naeh ceun diz ne maang an pleung pleung naehz hoh?”

⁸ Yesuhz mial daz, “Pehz seu tih, yak aez ihz upz suamz pehz. Ihz tang heungz keui truz leh mus Ohz daz, ‘Daehz naeh Khris!’ Keuh daz, ‘Kraao a wa phraeoz.’ Keuiz daz yak tawiz keuh.

⁹ Meuz pehz ngarz tiukz siukz boh seuk weur keurz ta mial ne yak ngaat. An keu ni ngaz naeh aacz boh, keuiz daz maat phraeoz ti dutz.

¹⁰ Ihz seu kheuz boh seu kheuz ngaz teur tiukz, seu prih boh seu prih kaw ngaz teur naak.

¹¹ Reu yung keui ngaz khruhz baaiz klawhz ti, an coh nguat boh reung dengz penz keui kaw ngaz naeh klawhz ti. An laak laaiz boh rak seum doz baaiz keui ngaz naeh lang kaang raaoz.

¹² Meuz maat naeh ceun keu diz ne, ihz ngaz mat pehz, tekz suamz pehz. Keuh ngaz maap pehz tawiz crawp, leh pehz sapz tuhz thang. Pehz ngaz phraeoz aacz ngaai khunz boh ihz mawh kawp mus Ohz.

¹³ Kawp an keu diz pehz ngaz bawnz krai lawng Ohz.

¹⁴ Yak kawcz phawmz teuk aacz ngaz bawnz tawpz mial ceun nae.

¹⁵ Ohz ngaz aez pehz nahz mony reu ma, ihz thiangz pehz keui nam caang tawpz caang thiangz.

¹⁶ Mah paz, kuanz mai, ihz kaang, ceu kheuz, tang kuanz bohz keui ngaz aapz pehz aez yam.

¹⁷ Ihz ngaz ceuh pehz kawp Ohz.

¹⁸ Keuiz daz hukz kingz pehz seu senz kaw nam luh.

¹⁹ Pehz ngaz bawnz phawmz kawp pehz nyeun klakz klakz.

Weng Yerusalem ngaz luh

²⁰ Meuz pehz awlz siukz keui wit wit boh weng Yerusalem ne lo mas weng an diz ngaz luh.

²¹ Meuz ceun diz ihz naeh tuhz prih Yio keui aez tiunz raw kaai rang keui. Ihz naeh tuhz weng keui aez lae lan, ihz naeh tawiz nawk kaw yak aez keuh kut tuhz weng.

²² Kawp daz kraao seu ngihz an diz naeh seu ngihz aez taam ceun tuhz kyaamz lik taemz mok.

²³ Kraao an diz kreuk baaiz ta keun nyah keun meur boh keun nyah maang kuanz buhz. Phez taam longz Phraz Pen Caoh ngaz klaez kaai prih an ni boh tawsahz Phraz ngaz klaez sapz kaai ceu kheuz an ni.

²⁴ Ihz teur ka yam kawp waac. Ihz teur ka keui talz ihz mat lan nawk prih. Ihz an nam anz kheuz Yio keui paenz suamz weng Yerusalem thonz taw kraao keuh neuk.

Kuanz Ihz mial truz

²⁵ Meuz ceun diz ne kiarz, seu ngihz boh seuk muny keui ngaz naeh rak seum sangz. Ihz tuhz prih keu tehz keui doz ngaat, teuk krusz dangz toz kawp reus seuk mar omz boh paang laai raak keurz.

²⁶ Ihz keui doz baaiz rae yam teur wil kawp an ngaz naeh tuhz prih keu tehz. Taanz khoz lang plengz keui ngaz keusz.

²⁷ Meuz ceun diz Kuanz Ihz ngaz truz tang taanz khoz mawh boh bunz mawh tuhz peu eumz.

²⁸ Meuz an keu diz seun teungz naeh truz ne teur aacz daehz rawi ceng ngaw kingz pehz kawp daz reung dengz khyawt a wa naeh thatz.”

Pung taek teungz laangz wah

²⁹ Yesuhz lao keuh nahz mony pung taek, “Yawt teungz laangz wah boh teungz khaehz keui raez.

³⁰ Meuz pehz awlz lahz run kaw mas a wa thatz kiarz kawcz.

³¹ Naeh ceun khuz an diz meuz pehz awlz lawng keu ni ne lo mas prih Phraz Pen Caoh a wa naeh thatz baaiz.

³² Ohz daz mawn pehz nahz co ihz keu ni maat hacz, an keu diz ngaz naeh hacz aamz.

³³ Plengz boh keu tehz ngaz luh kaw mony reu ma Ohz nam luh.

Pao yawt rak rak

³⁴ Seu tih toz daehz. Yak takz phawmz tawiz seum suamz, yak cawc, yak kawcz phawmz ta suamz ta tiangz leuz peun. Meuz naeh ceun diz, seu ngihz an diz doz naeh ceun dakz keu piutz sapz kaai pehz.

³⁵ Kawp daz dakz an diz keu piutz sapz teuk khranz kaai ihz tuhz prih keu tehz hacz aamz.

³⁶ Pehz seu tih toz daehz rae suz tawngz pao aez daehz caang lawt thaz an ngaz naeh keu ni hacz aamz, aez daehz caang ceng aacz ngaai Kuanz Ihz.”

³⁷ Meuz seu ngihz an diz Yesuhz sawnz aez tuhz teu laangz wat, meuz teuk borz samz Hnhz raw lan kaai rang Olip.

³⁸ Ihz keui truz cu tawz teu laangz wat teuk ngup cao cao, aez daehz bawnz teuk ngarz traz Yesuhz.