Yuḥanna 20 - Ṯarifiṯ 2020

Imeḥḍaren war tifen ca Siḏiṯneɣ Ƹisa ḏeg unḍeȓ

¹ Ḏi nhar amezwaru n ssimana, ṯusa-d Maryam ṯamagdaliṯ ɣar yifri n unḍeȓ n Ƹisa zic. Tuɣa ƹaḏ ṯaǧest, ṯufa azru itwakkes x yifri n unḍeȓ.

² Ṯuzzeȓ-d ṯusa-d ɣar Simƹan Buṭrus ḏ umeḥḍar nneɣni wenni iƹizzen x Ƹisa aṭṭas, ṯenna-asen qa ysin Ƹisa zeg yifri n unḍeȓ, war nessin mani ṯ ggin.

^3-4 Iffeɣ Buṭrus ḏ umeḥḍar nni nneɣni ruḥen s ṯazzȓa s ṯnayen iḏsen ɣar yifri n unḍeȓ. Ameḥḍar nni izwar-as i Buṭrus yuweḍ ḏ amezwaru ɣa yifri n unḍeȓ.

⁵ Isijj x yifri yufa ȓecfen imars ḏinni walakin war yuḏif ca.

⁶ Iḏeffar-iṯ-iḏ Simƹan Buṭrus ixḍeȓ, yuḏef ḏeg yifri n unḍeȓ. Itwaȓa ȓecfen nni

⁷ yufa ȓqabb iy zi tuɣa iɣeṭṭa uzeǧif n Ƹisa war iǧi ca ag ȓecfen, iḍfes waḥḏes.

⁸ Ȓexddenni yuḏef umeḥḍar nni izwaren ɣar yifri n unḍeȓ, iẓra manayenni yumen.

⁹ Walakin niṯni ƹaḏ war fhimen ca zi Lkitab belli labud aḏ ikkar Ƹisa zi ȓmewṯ.

¹⁰ Ssenni rewwḥen imeḥḍaren.

Siḏiṯneɣ Ƹisa itmeḍhar-d i Maryam ṯamagdaliṯ

¹¹ Maryam ṯbedd ɣar ṯewwarṯ n yifri n unḍeȓ ṯeqqim ṯetru. Wami ṯetru ṯsijj x yifri n unḍeȓ

¹² ṯufa ṯnayen n lmalaʼikaṯ s warruḍ ḏ acemȓaȓ icten ṯeqqim ɣar uzeǧif icten ṯeqqim ɣar iḍaren mani tuɣa ṯeǧa ddat n Ƹisa.

¹³ Nnant-as: "A ṯamɣarṯ min cem yuɣin ṯetruḏ?" Ṯenna-asent: "Ysin Siḏi, war ssineɣ mani ṯ sersen."

¹⁴ Ṯenna manayenni ṯexzar ɣar ḏeffar ṯufa ḏinni Ƹisa, walakin nettaṯ war ṯessin ca netta ḏ Ƹisa.

¹⁵ Inna-as Ƹisa i Maryam: "A ṯamɣarṯ min cem yuɣin ṯetruḏ, mixef ṯrezzuḏ?" Maryam tɣir-as ḏ bab n jarda nni, ṯenna-as: "A Siḏi meȓa ḏ cek iy ṯ iysin, in-ayi mani ṯ ṯserseḏ ḥima aṯ ysiɣ."

¹⁶ Inna-as Ƹisa: "A Maryam!" Ȓexddenni ṯeƹqeȓ-iṯ ṯenna-as s wawaȓ n israʼiliyen: "A Rabuni!" (Zaƹma )

17 Inna-as Ƹisa: "War ḏayi teṭṭef ca, qa nec ƹaḏ war gaƹƹḏeɣ ca ɣar Baba. Ruḥ ɣar ayṯma inu, in-asen qa nec aḏ gaƹƹḏeɣ ɣar Baba ḏ Babaṯwem, ɣar Arebbi inu ḏ Arebbi nwem."

¹⁸ Ṯruḥ Maryam ṯamagdaliṯ ṯessiweḍ-asen ȓexbar i imeḥḍaren ṯenna-asen qa ẓriɣ Siḏiṯneɣ issiweȓ-d akiḏi aqa min ḏayi inna...

Siḏiṯneɣ Ƹisa itmeḍhar-d ṯȓaṯa n ṯwaȓaṯin i imeḥḍaren nnes

¹⁹ Nhar n ȓḥad munen imeḥḍaren ɣar ṯmeddiṯ, ṯiwwura qqnent ggwḏen zeg israʼiliyen. Yusa-d Ƹisa ibedd ḏi ȓwesṭ inna-asen: "Sȓam xawem."

²⁰ Inna-asen manaya, isbeyyen-asen-d ifassen nnes ḏ uɣezḏis nnes. Farḥen imeḥḍaren wami ẓrin Siḏiṯsen.

²¹ Inna-asen ƹaweḏ Ƹisa: "Sȓam xawem. Mammec ḏayi d issekk Baba, ammu nec akenniw ssekkeɣ."

²² Wami inna manaya iṣṣuḍ xasen inna-asen: "Qebȓeṯ Arruḥ iqeddsen.

²³ Wenni umi ṯsemḥem i ddnub nnes, aḏas twasemḥent. Wenni umi war ṯesmiḥem ca, war ḏas twasmiḥent ca."

²⁴ Walakin ijjen zi ṯenƹac n imeḥḍaren nnes umi qqaren Tuma tȓaɣan-as Acniw, war kisen iǧi ca wami d yusa Ƹisa.

²⁵ Nnan-as imeḥḍaren nni nneɣni qa neẓra Siḏiṯneɣ! Ikkar Tuma inna-asen: "Meȓa war ẓriɣ ca lʼaṯar n imesmiȓen ḏeg ifassen nnes aḏ ggeɣ ḍaḍ inu ḏeg umcan n imesmiȓen nni, aḏ serseɣ fus inu x uɣezḏis nnes, war timneɣ ca."

²⁶ Menbaƹd i ṯmeniyyam, munen imeḥḍaren ƹaweḏ ɣar ḏaxeȓ, ṯiwwura qqnent akiḏsen Tuma. Yusa-d Ƹisa ibedd ḏi ȓwesṭ nsen inna-asen: "Sȓam xawem!"

²⁷ Inna-as i Tuma: "Egg ḍaḍ nnec ḏanita, xzar ifassen inu. Sers fus nnec x uɣezḏis inu. War tcekka ca; Lla, amen."

²⁸ Indeq-d Tuma inna-as: "A Siḏi inu, ay Arebbi inu!"

²⁹ Inna-as Ƹisa: "Aȓ wami ḏayi ṯeẓriḏ, ƹaḏ iy ṯumneḏ? Ssaƹḏ n yinni war ḏayi ẓrin ca, umnen."

³⁰ Igga Ƹisa aṭṭas n lmuƹjizaṯ nneɣni zzaṯ i imeḥḍaren nnes, niṯenti war urint ca ḏi Lkitab-a.

³¹ Ṯimesȓayin-a urint ḥima aḏ tamnem belli Ƹisa netta ḏ Lmasiḥ Mmis n Arebbi bac meȓa ṯumnem aɣarwem ṯiȓi ṯuḏarṯ ḏeg yisem nnes.