Yoohana 7 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso Daawti Yaꞌhuude Gaayimo Liigelo irta

¹ ꞌDaꞌddaboka, Yeesso boroofenhi Gaalilaaya ka, kolba ilkerengeettoo irte. Jeenteti weynaanti Yaꞌhuud ogoos iyowattuu, boroofenhi Yaꞌhuudiya ma iran.

² Iꞌdaasenyi maanti yaafohi Yaꞌhuud Daawti Gaayimo Liigelo gelaan a soodowwaatte.

³ Walaalinye Yeesso wihi iche Yeesso itidah, “Inta katabe boroofenhi Yaꞌhuudiya iro, ꞌdee abattitaah laka wihi ittaawenye weeli enenyet yeelin iubaaꞌdane at yeesso a agarto.

⁴ Eti rumanka magah ꞌdoono, wihi us yeelo ma dagcho. Maantaka at wahanyeyyoha a haaggissa gone, tab giꞌde enenyet tuumman a kaargo.”

⁵ Walaalinyetiis jeenteti iche usu irummeysanne iꞌdaas itidah.

⁶ Maantaka Yeesso wihi us iyidah, “Ibeenki an irdi uliba a ankhanyahe. Atin la a geeddi atin ibeenki atin ꞌdoontaan on irattaan. A mehe atin ibeen atin leesuuje mele.

⁷ ꞌDooꞌdi wahanyeyyohi harratane sussuuje raaho walah us atin kaꞌdiiꞌdo mele, iꞌdaasenyi ani a iꞌdiiꞌda. Wihi us ikaꞌdiiꞌdo la, a jeenteti jiti icho kajiraane an cheeko a suuj ikadowo.

⁸ Atin nyaama ilkerengeetti weene Yeerusaleem irda, daawtaas gela. An daawtaas ma irdi. Iꞌdi tahe ibeenkeey uliba a ankhanyahe.”

⁹ Inkoo us wahaas yidah ka, boroofenhi Gaalilaaya geeddoor fiddiye.

¹⁰ Inkoo walaalinyetiis daawtaas iratte ka, Yeesso laka irte. Iꞌdaasenyi ꞌdóoꞌd ma istusine, dagsi on ka irte.

¹¹ Weynaanti Yaꞌhuud la Yeesso daawtaas goyaka yowatte, ꞌdooꞌd, “Yeesso mehe agarteen?” idowte.

¹² Urur goyaka nyunnyuutoti usu miinsan kahte. ꞌDooꞌd gaasoo mehe essa ya, “Us a eti haaggan.” Gaasoo la mehe laabeen ya, “Mele, us enenyete ekkeesta.”

¹³ Iꞌdaasenyi etoo kaldaye issoobahcho, runtiis kayeyyeedo ma jiro. Iꞌdi tahe ꞌdooꞌd tuumman weynaanti Yaꞌhuude karoora.

¹⁴ Inkoo daaw ukkuriche leeleele ka, Yeesso minki Waakhe buure gele, ꞌdooꞌd Yeedi Waakh abinnaan sookhabte.

¹⁵ Weynaanti Yaꞌhuud, chiꞌche saggi us ꞌdooꞌd walah iabcho daagte ka, weyti girmeysatte, wihi iche worsatte, “Eta injire sukkuul iiran, intoh kharata geeddee kaꞌhele?”

¹⁶ Yeesso wihi us ilaabe, “Waha an ꞌdooꞌd abcho, yeedeey on menye, a yeedi eti isooergate kayimiy.

¹⁷ Eti tuummane wihi Waakh ꞌdoono yeelin ꞌdoono, usú waha an atin abcho Waakh kayimaateen ommos usú yeedeey on tahe a abta.

¹⁸ Eti wihi awtiissa on ꞌdooꞌd abcho, magahe isiyowta. Iꞌdaasenyi eti magahi eti sooergate koolo iꞌdoono, a eti rummaate, walah khollokkhane usu miinsan mele.

¹⁹ Muusa amurre ma atin siinna? Iꞌdaasenyi etiin amurretaas raaho mele. A iꞌdoh ani ogoos imarantaan?”

²⁰ Urur chirraakka wihi us Yeesso ilaabe, “Ati ginna kidakhatta. Ayyo ogoos kimarma?”

²¹ Yeesso la wihi us icho iyidah, “Wohoo kaldaye weeli enenyet yeelin iubaaꞌdane yeele, atin tuumman la girmeysatteen.

²² Muusa goorat hugunki atin yeeletiin kakhandiitaan a atin siiche. Rumanka hugunka Muusa ma kiimaatan, iꞌdaasenyi aacchinyetiinna kasoouummame. Jeentetaase yeeletiin Seeri Lanaso laka ikhandiitaan.

²³ Chirri yeele Seeri Lanaso lakhandiyo, ꞌdee amurre Muusa liijebin, a iꞌdohe jeenteti an Seeri Lanaso enenyet sartiis tuumman isamaachuu ihollowtaan?

²⁴ Taba uurassiin goyaka walah wihi atin kaagartaan kalday ka uskeel iigoonna, jiti fissan ikagoocha.”

Yeesso a Ki Lasubhe?

²⁵ ꞌDooꞌdoo ilkerengeetti weene Yeerusaleem wihi us yidah, “Us eta, eti weynaane ogoos maranto menya?

²⁶ Ulla kalla ꞌdow kayeyyeeda, weynaanti Yaꞌhuud la walah iche itadeeh mele. Sarka saggi rumanka us Ki Lasubhe iyahe garatta?

²⁷ Iꞌdaasenyi eta inti us kayimiy a garanna. Ki Lasubhe la maanti us yamiit, et inti us kayamiit garti mele.”

²⁸ Yeesso minki Waakhe buure ka ꞌdooꞌd walah abche, riire, wihi us yidah, “Atin rumanka eti an ahe ichoow inti an kiimiy a garattaan on a? An ma issooerganne, iꞌdaasenyi ki isooergate a ki rum leh. Atin la usu ma garattaan.

²⁹ Iꞌdaasenyi an usu a garda, iꞌdi tahe an usu kiimiyye, usu la isooergate.”

³⁰ Waha ka ꞌdooꞌd Yeesso khaban leheete, iꞌdaasenyi et usu khabte mele. Iꞌdi tahe ibeenki liichiire lakhabti, uliba a ankhanyahe.

³¹ Iꞌdaasenyi urur goyaka ꞌdooꞌdi ittaawe Yeesso rummeeste, wihi icho yidaaheen, “Ki Lasubhe maanti us yamiit, wahanyeyyohi ittaawenye miigti Waakh tuso eta yeele kussan a yeela?”

Weynaanti Yaꞌhuud iskartoo eregta Yeesso sookhabatta

³² Farissaayo ururi woriis kanyunnyuwo daagte. ꞌDeerka kuhaaniyyohi wewween ichoow Farissaayo ba, iskartoo Yeesso khabatti ergeen.

³³ Yeesso la wihi us iyidah, “An geeddoor on atin leejira, ꞌdee yomboka eti isooergate inokhda.

³⁴ Atin a iyowattaane, iꞌdaasenyi ma iꞌhessaan. Iꞌdi tahe inti an kajiro ma tamiitiin.”

³⁵ Weynaanti Yaꞌhuud isinokhatte wihi iche isworsatte, “Inta us irti, inno usu ikaꞌhelin a intoh? Inti ꞌdooꞌdeen kijiro yaafohi Yaꞌhuud ieheynan goya kataasanyahe iche irta yaafohi Yaꞌhuud ieheynan wori Waakh abcha?

³⁶ Yeeda us, ‘Atin a iyowattaane, ma iꞌhessaane toro inti an kajiro la ma tamiitiin,’ essi a mehe?”

Yeesso a eti bicchehi jiro lakeelo

³⁷ Ibeenki weyti khummane ꞌdaꞌddaboote daawe massatti ka, Yeesso tolossate riire, wihi us yidah, “Eti tuummane sugub khabo, ani a iyimaate, amba sugub bahchaa.

³⁸ Iꞌdi Chiirnaanneti Waakh tadeeh u, ‘Eti tuummane ani irummeeste, a iꞌdoo indohi biccheete ꞌdulo, jiroti jirtuu imassan lakeelo, uuriis kasoobahaan.’”

³⁹ Yeesso yeedaas ka la, wihi us woriis kayeyyeedo, a Rubeyti Munyeenye, ꞌdooꞌdi usu rummeeste sooꞌhelo. Geeddaka uliba Waakh ꞌdooꞌdi Kiriisto rummeeste Rubeyta Munyee ma siin. A mehe Yeesso geeddaakka goobi Waakh ka ma laweynaan.

Enenyet jeente Yeessuu seley gowa

⁴⁰ Urur goyaka ꞌdooꞌd gaasoo yeeda daage wihi us yidah, “Eta rumanka, a eti Waákh íyeyyeedo goorat Waakh ayyiche, Waakh, ‘A sooerga,’ yidah.”

⁴¹ Gaasoo la mehe essaan ya, “Usu a Ki Lasubhe.” Iꞌdaasenyi gaasoo mehe worsateen ya, “Ki Lasubhe saggoh boroofenhi Gaalilaaya ikayamiit?

⁴² Chiirnaanneti Waakh, Ki Lasubhe hiiy karnati Dawuud layadeeh ichoow ilkerengeetti Beꞌdeleheeme Dawuud yiille kayamiit ma tadeeh a?”

⁴³ Jeente Yeessuu, ꞌdooꞌd seley goggowe.

⁴⁴ Gaasoo ichehi khabatti ꞌdoonta, iꞌdaasenyi et khabti mele.

Weynaanti Yaꞌhuud Yeesso rummeysan ꞌdiiꞌdda

⁴⁵ Chirri iskare nokhatte ka, Farissaayo ichoow kuhaaniyyohi wewween ba wihi icho iskar worsateen, “A iꞌdoh Yeesso isookhaatina?”

⁴⁶ Iskare la wihi iche tidah, “Et injire saggi eta iyeyyeedo nah daagne mele.”

⁴⁷ Farissaayo toro wihi iche iskar itidah, “Atin laka a atin baabiiche?

⁴⁸ Etoo weene ommos Farissaayeenye usú rummeeste a agarteen?

⁴⁹ Mele! Iꞌdaasenyi urura amurre Muusa wihichekoo rucchul laka igaran a falanyahe.”

⁵⁰ Etoo Farissaayeenye goycho kajiro Nikodeemo layadeehe goorat ꞌhor Yeesso iirte la wihi us icho worsate,

⁵¹ “Amurreteen enenyet geeddi wihi us yeelo liikadaagine toro liikagaran on uskeel igoossa?”

⁵² Wihi icho ilaabeen, “Ati laka boroofenhi Gaalilaaya katimiy? Bal Chiirnaanneti Waakh goya tabe, ꞌdee saggi ꞌdooꞌdi Waákh íyeyyeedo koo kalday laka injire boroofenhi Gaalilaaya ikiimaatan abo.”

Chiirnaanneti Yeedi Waakhe uumaccheenye lakakhuufo Yoohana 7:53-8:11 ma khabaan.

⁵³ Ebba ꞌdeerka goobiis irte.