Tiito 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Wihi haaggan yeela

¹ Tab ꞌdooꞌd Kiriisto kasooꞌheliche, ꞌdooꞌdi anto khabo ichoow karnatohi sirgaal ba a inkaanyiteene wihi liiꞌdoono kol tuumman a raaheene wihi haaggan la a itannabteene a yeeleen.

² Toro la kasooꞌheliche iicho enenyet hamanne, nebey a kafiddiyeene, ꞌdooꞌdi samacchaare a yitaaheene, enenyet ortiis ka a isnuglaacheen.

³ Iꞌdi tahe inno rubeyteen laka ꞌhor ꞌdooꞌdi ꞌdalammeenye yeed idaagine leekkeeste, bowꞌdati wahanyeyyohi noole uurasseen imoonaane toro kahamaadicho on eheet. Jiroteen wihi buuhe a suujoon ichoow kalꞌdarri. A inno laꞌdiiꞌde inno laka ꞌdooꞌdi addan a ꞌdiiꞌdne.

⁴ Iꞌdaasenyi maanti Waakkhi ꞌDoorribeheene uuri ꞌdabakhe inno tuste weeli enenyet ꞌdoonintiis tuste ka,

⁵ inno ribe. Waha la jeenteti inno wohoo fissan iyeelle menye, a jeenteti uurnugleeli Waakh on. Usu Rubeyti Munyeenye jiroteen dikhto, delmaatti husub ichoow jiroti husub inno siisso ka, a inno ribe.

⁶ Waakh la Yeesso Kiriistohi ꞌDoorribeheene ka, a inno ibuuhiche Rubeyti Munyee tuum inno isookhube.

⁷ Haaggi Waakhe buurenye inno imunneynan ka, ꞌdooꞌdi fiffissan a inno iekkaache. Waakh waha dakkhane yeele ꞌdee ꞌdooꞌdi jiroti jirtuu imassanne inno khajjeello dalho nateeh.

⁸ Yeedassaas an idah a wihi lakakhuufo. Atihi yeedassaas katirriinsatti ꞌdee ꞌdooꞌdi Waakh rummeeste kol tuumman haag yeelo iche ꞌdoona. Wahanyeyyoha la enenyet a ihaagganyahiine toro la a iroonyahiin.

⁹ Iꞌdaasenyi iriirti ꞌdalam ichoow magahenyeti aacchinye ichoow jaakh ichoow amurre Muusati islaleeiriiro kaseeh. Iꞌdi tahe waha a wihi ilmarhaatteete indigir laa.

¹⁰ Eti goytiin ka enenyet seley goggoocho, koli oraat ichoow koli lammaatteet tootoocha, chuꞌus iꞌdaas yeelo sirbi lakigessa idaha. Chirri us uliba sookuto kafirda.

¹¹ Taba waha tissiba, eti iꞌdee a khollokkhanyahe, uskeeliis ka la sina isigoocha Waakh ortiis ka.

Waansihi ꞌdaꞌddaboot ichoow bariito

¹² Uus an Arteema ommos Tuuchiko kisooergo, dowwa ilkerengeetti Nikaboolis ka iamiit. Iꞌdi tahe ꞌdee maanti hayohi roffo yitaaheen, ilkerengeettaase anihi fiddiyo gooche.

¹³ Geeddi at tabuuꞌd hol dowe, Seenahi wakiile ichoow Aboollo gargaare luhlo iyeel.

¹⁴ Wihi an ꞌdooꞌdeen kaꞌdoono a ichohi geeddi icho yabuuꞌdiin haag yeelin abtaane, ꞌdee ꞌdooꞌdi rumanka gargaar ꞌdoono gargaareene, ꞌdee iicho jiroti indigir laa jirin.

¹⁵ ꞌDooꞌd Kiriistoki inta ka ileejiro tuumman a atin soobariitiche. ꞌDooꞌdi Kiriisto kakhuufo inno ꞌdoono bariiti. Waakh ba atin tuumman atin imaala.