Rooma 8 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Jiroti Rubeyti Waakh dakhatti

¹ Maantaka ꞌdooꞌdi icho ichoow Yeesso Kiriisto ba wohoo kalday yahiin, Waakh icho ma hukkumo, sina la ma igoocho.

² Iꞌdi tahe runti gaan Rubeyti Waakh Yeesso Kiriisto ka jiro kikeenta, runtaas gaan la uskeeli omoot keeno a kaasoofurta.

³ Wihi amurre Muusa yeelin iubaaꞌdan jeenteti wihi uurasseen goya kijiro uskeel imoono ꞌdarsicheen u, Waakh a yeele. Waakh weeliiski kaldaye sooerge, soorriyoti uskeel yitah. Weeliiska la iꞌdi weeli enenyet u sarti weeli enenyete uskeel lehe khabe. Waakh ꞌdeerka uskeeli weeli enenyet sartiis kijiro hukkume sina igooche,

⁴ ꞌdee jiroteen ka wihi fiffissane amurretaas inno kaꞌdoonto tuum labuuhicha. A mehe wihi uurasseen goya kijiro uskeel imoono ichoow jiroteen ma israahaane, Rubeyti Waakh ichoow jiroteen a israahaan.

⁵ ꞌDooꞌdi jiroticho ichoow wihi uurassicho goya kijiro uskeel imoono israahaan, wihi icho kamassaan a wahaas uurassicho goya kijiro uskeel imoono on. Iꞌdaasenyi ꞌdooꞌdi jiroticho ichoow Rubeyti Waakh israahaan, wihi icho kamassaan a wihi Rubeyti Waakh imoonto.

⁶ Malassi ꞌdooꞌdi wihi uurassicho goya kijiro uskeel imoono dakhtaan, omoote ꞌhela. Iꞌdaasenyi mali Rubeyti Waakh dakhatti, jiro ichoow nebeye ꞌhela.

⁷ A mehe malassi ꞌdooꞌdi wihi uurassicho goya kijiro uskeel imoono a chiiyti Waakh. Malassi iꞌdaase amurreti Waakh ma raahaane, toro la raahin ma yabuuꞌdiin.

⁸ ꞌDooꞌdi wihi uurassicho goya kijiro uskeel imoono dakhtaan, koloo kalday laka Waákh ma kahamaadicho.

⁹ Iꞌdaasenyi Rubeyti Waakh goytiinna fiddiita gone, ꞌdeerka wihi uurassiin goya kijiro uskeel imoono ma atin antaane, Rubeyti Waakhe atin anatta. Eti tuummane Rubey Kiriisto ikhabin koo Kiriisto mee gon.

¹⁰ Kiriisto goytiinna kijira gone, chirri sartiin jeenteti uskeel u tamuut, jeenteti Waakh ꞌdooꞌdi fiffissan atin iekkaachuu, Rubeyti Waakh jiro a atin siissa.

¹¹ Toro la chirri rumanka Rubeyti Waakhe Yeesso omoot kasookihisse goytiin fiddiito, saggaas Waakh Kiriisto omoot ikasookahche, saggaase Rubeyta goytiin fiddiito ka, sartiinta tamuut jiro ikasoolaaba.

¹² Maantaka ꞌdooꞌd Kiriistokaaw, wihi rumanka Waakh inno kaꞌdoono, uus koloo kalday laka jiroteen ichoow wihi uurasseen goya kijiro uskeel imoono israahin.

¹³ A mehe chaꞌat wihi uuraah goya kijiro uskeel imoono on raahto, rumanka a tamuut. Iꞌdaasenyi chaꞌat Rubeyti Munyee ka uskeeli uuraah imoono tagiis a jirta.

¹⁴ Iꞌdi tahe ꞌdooꞌdi tuummane Rubeyti Waakh woyto, a nyaakhuti Waakh.

¹⁵ Iꞌdi tahe Rubeyti Waakhe atin ꞌhesseen ti toro bowꞌdati burꞌdowto atin kayeesso mee. Atin Rubeyti Waakhe iꞌdi teyyanohi Waakh atin kayeesso iche ꞌhesseen. Inno la Rubeytaas ka Waakh a iooyna, “Aabba, Aabbahaanya!” inadeeh.

¹⁶ Rubeyti Waakh ichoow rubeyoheen saggi inno rumanka nyaakhuti Waakh inahe a isleecheekaan.

¹⁷ Inno a nyaakhutiissa gone, wihi Waakh nyaakhutiis siicho a muꞌdannahe. Toro wihi Waakh Kiriisto siicho laka a leeꞌhella. A mehe chirri rumanka inno sinati usu lakawaariche leegisanno, weynaanti usu laweynaacho laka a leegisanna gon.

Weynaanti Waakhe inno liisoobabbakkaahicho

¹⁸ An wihi an kamalde a waha, sinayyohi toolla harrata ka inno khabno ichoow weynaanti buurenye Waakh ꞌdee inno isoobabbakkaahicho ma isiyeyno.

¹⁹ Harrati goorat Waakh soouume tuumman maanti Waakh ꞌdooꞌdi rumanka nyaakhutiis yahe soobabbakaahicho weyti sugta.

²⁰ Iꞌdi tahe harrataas Waakh soouume ti suusahto iche lakayeele. Wahaas la wihi iche ꞌdoonto menye, a wihi Waakh gooche. Iꞌdaasenyi khajjeeli lakhabe kalla,

²¹ harrataas Waakh soouume tuumman suusakki hide a lakasoofura, nyaakhuti Waakhe jiroti haaggane suusah hidin iubaaꞌdan ꞌhele ikhayta.

²² Wihi inno garanni, harrati goorat Waakh soouume tuumman ichoowka uliba, iꞌdi wohoo chiisenye bolkhuu, weyti ooyta.

²³ Harrataas Waakh soouume kalday ma ooyto, innohi gurnaanki oraate Rubeyti Munyee khabno laka a ooyna. Geeddi inno ibeenki Waakh nyaakhutiis inno kayeelo toro la us sarteenti omoote hidde ribnaanki ꞌdaꞌddaboot ribo sugno, goyteen ka a ooyna.

²⁴ A mehe Waakh a inno ribe, khajjeeli wihi soosohti inno siiche. Iꞌdaasenyi chirri inno wihi inno berri khajjeello indoheen kaagarro, waha khajjeel mee gon. Etoo wihi us ꞌhele a khajjeela?

²⁵ Chirri inno wohoo inno iꞌhelin khajjeel kakhabno la, inno a garrahsanna, wahaas sugna.

²⁶ Toro Rubeyti Munyee laka ꞌdarriteen ka a inno gargaarta. Wihi tahe, inno saggi inno Waakh iwahanni ma garanni. Iꞌdaasenyi Rubeyti Munyee iche Waakh inno ihawwaassatta, wihi iche ooyto Waakh idowto la, wihi af ka idaahan layabuuꞌd mee.

²⁷ Waakkhi uurassi weeli enenyet fiiricho la, mali Rubeyti Munyee a garta, a mehe wihi Rubeyti Munyee ꞌdooꞌdi Waakh Waakh ihawwaassatti ichoow wihi Waakh ꞌdoono a israahaan.

Yeesso Kiriisto ka soorin a khabna

²⁸ Wihi inno garanni a mehe ya, walah tuumman ka Waakh ꞌdooꞌdi usu ꞌdoono wihi haaggan a iyeela. ꞌDooꞌdaas la a ki Waakh saggi us igooche iwahe.

²⁹ Iꞌdi tahe Waakh uumaccho on ka ꞌdooꞌdi kiise garte, toro la ꞌhor on ꞌdooꞌdaas saggi us iꞌdi Weeliis ikayeelo gooche. Ulla iꞌdane yeele, ꞌdee Weeliis ꞌdooꞌdi ittaawenye Kiriisto rummeeste goyaka teyyan yateeh.

³⁰ Toro la ꞌdooꞌdaas us ꞌhor saggi us iꞌdi weeliis ikayeelo gooche, wahe. ꞌDooꞌdaas us wahe la ꞌdooꞌdi fiffissan iekkaache. ꞌDooꞌdaas us ꞌdooꞌdi fiffissan iekkaache la, saggi us weynaantiis ileegismo iayyiche.

Yeesso Kiriisto ꞌdooninti Waakh inno ikhabo geeddiche inno tusa

³¹ Haagga tuumman a khabna gone, ꞌdeerka mehe nidaahe? Chiꞌ Waakh ankeen jiro, ayyo inno tirrima?

³² Waakh Weeliis laka ma inno karimmanne, soorriyoteenna yitah! Waakh Weeliis a inno siiche. Maantaka haaggiiski buure ka walah tuumman usu a inno leesiicha.

³³ Icho ayyo maanta ꞌdooꞌdi Waakh rubeytiis soobahsate uskeeloo kacheekta? Waakh rubeytiis ꞌdooꞌdaas ꞌdooꞌdi fiffissane iekkaache.

³⁴ Ayyo uskeel inno igoocha? Yeesso Kiriistohi yumuyye, wahaas ꞌdirihicho ka la omoot lakasookahche, toolla la anki dahanti miigeete Waakh jiro, Waakh a inno ihawwaasta.

³⁵ Mehe inno ichoow ꞌdooninti Kiriisto inno ꞌdoono seley inno bahcha? Sinati inno ꞌhello, ommos wihi miigenye inno kijirro, ommos sinayyohi inno loomhicho, ommos raarah, ommos miskiinnoon, ommos wohoo inno burꞌdoocho, ommos omoot, wohoo kaldaye inno ichoow ꞌdoonintiis ba seley inno bahcho ma jiraan!

³⁶ Iꞌdi liichiiruu, “Nah jeentetaah u kol tuumman omoot on afiche raahna, iꞌdi iiyti khalme liiwoyo, iche nah liiwoya.”

³⁷ Mele gon! Chirri wahanyeyyoha tuumman inno isoobahaan laka, inno ꞌdooninti Kiriisto inno ꞌdoone ka, a ꞌdooꞌdi tuum soorin leh!

³⁸ An wihi an tissibo a mehe ya, walah jirtuu dakkhan ꞌdooninti Kiriisto inno ꞌdoono inno kagoocho mele. Omoot ommos jiro ommos herti Waakh ommos ginnayyo ma inno kagoochaan. Wihi toolla jiro ommos wihi sooyomboocho ommos miigti Seytaan laka ma inno kagoochaan.

³⁹ Wihi sereyta daayan sartiis kijiro ommos harrata iliche kijiro laka ma inno kagoochaan. Wihi Waakh soouume tuumman goyaka laka, wohoo kaldaye ꞌdooninti Waakh Yeesso Kiriistohi Kamureene ka inno ꞌdoono inno kagoon yabuuꞌd ma jiraan.