Rooma 7 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Amurre Muusa a inno lakasoofure

¹ ꞌDooꞌd Kiriistokaaw, an atinhi amurre Muusa wihiche garattaane atin leeyyeeda, saggi amurretaas enenyet geeddi us jiro anto ikakhabto ma garattaan a?

² A mehe aranti ladiste, amurretaas mehe tadeeh ya, geeddi arankiche on jiro, arankaas kaldach on lakahide. Iꞌdaasenyi chirri arankiche buje, amurreti mindischo miinsan ka aranta a lafure gon.

³ ꞌDeerka chirri arame geeddi arankiche jiro arankoo addan leefiddiito, arantaas uskeeli iche aranki kiche ieheynan leeuꞌdurto iche gesse. Iꞌdaasenyi chirri arankiche buje, amurretaas mindischo miinsan ka a lafure. Chiꞌ arankoo addan diste laka uskeel iche yeesse mele.

⁴ Iꞌdaasu laka ꞌdooꞌd Kiriistokaaw, atin omoot Kiriisto ka amurre Muusa kola ma atin dakhatti, a mehe atin toolla a koo Kiriistohi Waakh omoot kasookahche, ꞌdee atin la wihi Waakh ꞌdoono dessaan.

⁵ A mehe geeddi wihi uurasseen goya kijiro uskeel imoono inno dakhtaan, amurretaas ildeerroti suujenye goyteen kijirto iche neybaasse, sarteen woyte, gurnaanki omoot keeno khabne.

⁶ Iꞌdaasenyi toolla amurre Muusa ma inno dakhatti. Amurretaas ka a inno lafure, ꞌdee kola jiti raagane goorat amurretaas chiiran inno iwoyte ma isohanni, jiti husube Rubeyti Munyee inno abisse iche raahna.

Amurreti Waakh uskeeleenna inno isoobabbakkaahissa

⁷ Toollaka wihi inno elanni kamalanni. Amurre Muusa rubeyche a uskeele nadeeh? Mele! Iꞌdaaru laka iꞌdaas mee! Amurretaas rubeycheeda ani wihi uskeel rumanka yahe iabisse. A mehe chirri amurre, “Wihi etoo addan amaanjeeran,” iidaahan, ani rubeyteey wihi etoo addane lamaanjeerti suujoonkicho ma abdi ba.

⁸ Iꞌdaasenyi uskeel aytoo amurretaase kasookoosse, maanjeeroti nool goyteey kadele. A mehe chiꞌ amurre ijirin, uskeel a wihi yumuy.

⁹ Ani rubeyteey goorat ꞌhor geeddi amurre Muusa wohoo ileeheynan laka a jire on. Iꞌdaasenyi inkoo an wihi aytoo amurre ꞌdiiꞌddo abde, iche uskeeli nool yeelin ꞌdoone.

¹⁰ An a iꞌdoo an umuy. Aloha amurre kootte incheenka jiti jiro ikeeno, iche ba jiti omooteete ikeenta.

¹¹ A mehe uskeel alohaas amurre kasookoosse, iekkeeste alohaas amurre ka iyigis.

¹² Maantaka amurre Muusa rubeyche a munya, alohiche laka a munya, a fissanyahiine, toro la a haagganyahiin.

¹³ ꞌDeerka amurretaas haaggane ani omoot ikeente? Mele, iꞌdaaru laka iꞌdaas mee. Uskeele iꞌdaas yeele, amurretaas haaggan kasookoosse, omoot keene ꞌdee uskeel saggi us rumanka uskeel iyahe laarga. Toro la alohi amurre saggi uskeel rumanka wihi weyti suuje iyahe iche inno tusaan.

Dihoti goyteen kijirto

¹⁴ Inno tuumman saggi amurre Muusa Waakh ikatimiy a garanna. Iꞌdaasenyi ꞌdabakkhi weeli enenyete an khabo Waakh ma kayamiite, ani iꞌdi bowꞌduu uskeele liiororiche.

¹⁵ Ani rubeyteey wihi an yeelo ma gardi ba. A mehe wihi an ꞌdoono ma yeelo, wihi an ꞌdiiꞌddanahe on yeela.

¹⁶ Toro la chirri an amurretaas ka saggi wihi an yeelo suuj iyahiin abde, waha mehe tusaan ya, an saggi amur ihaagganyahe a rummaacha.

¹⁷ Iꞌda ka ani mee suujoonka yeelo, iꞌdaasenyi a uskeeli goyteey kajiro.

¹⁸ Wihi an tissibo, walah haaggane goyteey kijiro mele, saggaas on u wihi uureey goya kijiro uskeele imoonaan. A mehe an haage yeelin imoona iꞌdaasenyi yeelin ma abuuꞌd.

¹⁹ A mehe wihi an yeelo, haaggi an yeelin ꞌdoono menye, suujoonki an yeelin iꞌdoonin iche yeela.

²⁰ Maantaka chirri an wihi an yeelin iꞌdoonin yeelo, waha mehe tusaan ya, ani mee wahaas yeelo, uskeeli goyteey kijiro, iche wahaas yeela.

²¹ Maantaka runta gaane jiroteey goyaka abde. Chirri an wihi haaggan yeelin ꞌdoono tuumman, suujoon la garabaaya on raaha.

²² A mehe ani maleey goyaka weyti amurreti Waakh kahamaada.

²³ Iꞌdaasenyi runtoo gaane miilassi sarteey hil kahaaggisso a jirta. Runtaas gaan ichoow runti gaane maleey ꞌdoono a iꞌdoo icho isdihaan. Toro la runtaas gaane sarteey goya kijirto bowꞌdati uskeeli goyteey kijiro ikayeessa.

²⁴ Wooy! Mal a ibuuhiche! Ayyo sarta omoot igeesso ikasoofura?

²⁵ Waakh weyti kalaꞌd ilaaba! A mehe Yeesso Kiriistohi Kamureene ka, Waakh a isoofure. Kola ꞌdeerka saggi an ijiro a iꞌda, maleey ka an a bowꞌdati amurreti Waakh. Iꞌdaasenyi wihi uureey goya kijiro uskeel imoono ka, ani a bowꞌdati miigti uskeel.