Rooma 5 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Waakh ꞌdooꞌdi fiffissane inno iekkaacha

¹ Maantaka Waakh kakhuufnaanki inno usu kakhuufno ka, ꞌdooꞌdi fiffissane inno iekkaache gone, Yeesso Kiriistohi Kamureene ka Waakh nebey a ikhabna.

² Kiriisto ka ichoow kakhuufnaanki inno usu kakhuufno ka, haagga Waakhe buurenye inno ꞌhelle iche katololla. Inno la khajjeeli weynaanti Waakh inno siisso iche keeylajna.

³ Wahaas kalday menye, sinayyohi inno ꞌhello laka a keeylajna. Iꞌdi tahe wihi inno garanni, sina a inno gargaarta, ꞌdee garrahsanna.

⁴ Garrahsi la jiro ka sohoti haaggane Waakh jilhaati keena, sohota haaggan la khajjeele keena.

⁵ Khajjeela inno khabno ka, rubeye ma inno jebto. Iꞌdi tahe Waakh Rubeytiisti Munyee a inno siiche, ꞌdee iche la ꞌdooninti Waakh rubeyoheen goya buuhissa.

⁶ A mehe geeddi inno uliba miigtoo rucchule inno iskaribno awteen u ikhabin laka, Kiriisto innohi Waakh ꞌdiiꞌdne a inno iyumuy. Waha la a maanti Waakh on gooche.

⁷ Weyti ꞌhool tahe chirri etoo issoobahcho meessi etoo fissan kayamuut. Iꞌdaasenyi etoo a geeddi us issoobahcho us meessi etoo weyti haaggan u roorro laan kayamuut.

⁸ Iꞌdaasenyi Waakh saggane geeddi us inno ꞌdoono inno tusa, ꞌdooꞌdi uskeel leh nahaayi, Kiriisto inno iyumuy.

⁹ Diig Kiriisto ka, Waakh ꞌdooꞌdi fiffissane inno iekkaache gone, geeddoo meheenye Kiriisto ka holi Waakh inno lakariba?

¹⁰ Iꞌdi tahe inno chiiyti Waakh nahaayi, Waakh omootti Weeliis ka ankiis inno keene. Toolla Waakh ankiis inno keene la, geeddoo meheenye jiroti Weeli Waakh ka inno lariba!

¹¹ Waha kalday la menye, Yeesso Kiriistohi Kamureene ka Waakh a keeylajna, a mehe Kiriisto ka Waakh ankiis a inno keene.

Omoot Aadame keene, jiro la Kiriisto keena

¹² Maantaka uskeel maanti goorat us harra soogele etoo kaldache keene, uskeeli etaas la omoote ꞌdub kasookhabe. Omoottaas weeli enenyet tuumman itaaꞌhte, a mehe weeli enenyet tuumman uskeel a yeele.

¹³ Rumanka geeddi amurre Muusa enenyet liisiin laka, weeli enenyet tuumman uskeel on yeele, iꞌdaasenyi inti amurre ikajirin, uskeel ma leekkaacho gon.

¹⁴ Chiꞌiche iꞌdaas tahe laka, uus maanti Aadam harrata kijire ichoowka maanti Muusa, omoot on weeli enenyet dakhatte. Aadam amuri Waakhe raahiwwaaye. ꞌDooꞌdi uskeeli Aadam yeele iyeelin laka, omoot on dakhatte. Toollaka Aadam a iyookkoti Kiriistohi yomboka yimiy.

¹⁵ Iꞌdaasenyi siinta Waakh inno siiche iꞌdi amurreti lajebcho Aadam yeele mee. A mehe chirri ꞌdooꞌdi ittaawe amurreti lajebcho etaas kalday yeele ka tuume, haaggi Waakhe buurenye inno imunneynan ichoow siinta eta kaldaye Yeesso Kiriisto keene geeddoo meheenye ꞌdooꞌdi ittaawe ikakhubta.

¹⁶ Toro siinta Waakh ichoow wihi uskeeli etoo kalday yeele keeno iꞌdoo kalday mee. A mehe inkoo Aadam uskeeloo kalday yeele, Waakh usu a hukkume, sina igooche. Iꞌdaasenyi inkoo uskeel buuraate, siinti inno imunneynan timiy. Siinta ka la Waakh ꞌdooꞌdi fiffissane inno iekkaacha.

¹⁷ A mehe jeenteti amuroo kaldaye lajebcho goorat eta kalday yeele u, omoote etaas kalday ka tuum a inno dakhatta. Iꞌdaasenyi wihi Yeesso Kiriisto inno iyeele, geeddoo meheenye wahaas kussanyahiin. Siinta haaggi Waakhe buurenye inno imunneynan ichoow siinti us ꞌdooꞌdi fiffissan inno iekkaacho a inno siiche. Siinta ka ꞌdooꞌd jiroti soorinnaane ꞌhela.

¹⁸ ꞌDeerka saggaas amuroo kaldaye lajebcho hukkunki Waakh weeli enenyet tuumman hukkumo sina igoocho keenuu, saggaas on u, wihi kaldaye fissane etoo kalday yeele keeneen ka Waakh weeli enenyet tuumman ꞌdooꞌdi fiffissane iekkaacha, jiro siicha.

¹⁹ A mehe saggi etoo kaldaye Waakh raahin ꞌdiiꞌde ka, ꞌdooꞌdi ittaawe ꞌdooꞌdi uskeel lehe lakayeele, saggaas on u etoo kaldaye Waakh raahe ka, Waakh ꞌdooꞌdi ittaawe ꞌdooꞌdi fiffissane kayeela.

²⁰ Amurre Muusa a lakasookhaye ꞌdee amurreti lajebcho kakhayanta, iꞌdaasenyi maanti uskeel kakhayme, weyti ꞌdirihiissa haaggi Waakhe buurenye inno imunneynan kakhayme.

²¹ Iꞌda ka saggi uskeeli weeli enenyet yeele omoot ikeene idakhtuu, saggaas on haaggi Waakhe buurenye inno imunneynan weeli enenyet idakhta, ꞌdee Waakh Yeesso Kiriistohi Kamureene ka ꞌdooꞌdi fiffissan inno iekkaacha, toro jiroti jirtuu imassan ꞌhella.