Rooma 4 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Kakhuufnaanki Aburaaham Waakh kakhuufe

¹ Kamalda bal, aacchiheenki Aburaaham layadeeh ayta ka mehe isabche?

² Chirri rumanka Waakh wihi Aburaaham yeele ka usu eti fissan iekkaache, wihi us keeylajo a khaba gon. Iꞌdaasenyi Waakh ortiis ka, Aburaaham walah us yeele us keeylajo mele.

³ Chiirnaanneti Waakh mehe kachiiran? “Aburaaham wihi Waakh yidahye rummeeste, Waakh la usu eti fissan iekkaache.”

⁴ Wihi inno garanni, eti hil haaggicho a laguta. Toro la wihi laguto wihi liisoomure menye, a wihi usu muꞌdan.

⁵ Iꞌdaasenyi weeli enenyet jeenteti wihi us haaggicho menye, jeenteti us Waakkhi ꞌdooꞌdi uskeel leh ꞌdooꞌdi fiffissan iekkaacho ikakhuufo, iche Waakh eti fissan iekkaacha.

⁶ Saggaas on u karnati Dawuud layadeeh, eti rumanka Waakh imaale eti fissan iekkaacho a cheeke. Eti iꞌdee jeenteti holi us dowo mee Waakh eti fissan iekkaacho. Wihi us essi la kallaayo,

⁷ “Eti Waakh imaale a ki Waakh hugunꞌdarritiis ikakute, toro uskeeliis hiyyaaye!

⁸ Eti Waakh imaale la a ki Kamur jirtuu uskeeliis iekkaan!”

⁹ Kamalda bal, ꞌdooꞌdi Waakh imaale a ki yaafohi Yaꞌhuude khandiiti kalday a, bal ki yaafohi Yaꞌhuud ieheynane ikhandiyan laka? Wihi inno elanne a mehe ya, Aburaaham jeenteti us Waakh ikakhuufe, iche Waakh usu eti fissan iekkaache.

¹⁰ Kakhuufnaanki Aburaaham Waakh kakhuufo la maantoh sagga liikeekkaache? Geeddi Aburaaham liikhandiyin a, bal inkoo lakhandiye yimiy? Waakh Aburaaham inkoo lakhandiye menye, geeddi liikhandiyine eti fissan iekkaache.

¹¹ Sumatti Aburaaham khandi ka lasunte mehe tussa ya, geeddi liikhandiyin on Waakh usu eti fissan iekkaache, jeenteti us Waakh ikakhuufo on u. Aburaaham ꞌdeerka a iꞌdoo us ooyohi ꞌdooꞌdi Waakh kakhuufo yitah chiꞌicho liikhandiyin laka. Iꞌdi Aburaaham u jeenteti icho Waakh ikakhuufaan, iche Waakh ꞌdooꞌdi fiffissan iekkaacha.

¹² Aburaaham la toro iꞌdoo ka a ooyohi ꞌdooꞌdi khandihi lakhandiiti kalday on menye, iꞌdaasenyi a ki lakhandiye toro la dabat aacchiheenki Aburaaham layadeehe Waakh kakhuufe raaho.

¹³ Wihi inno garanni, Waakh goorat Aburaaham ichoow nyaakhut nyaakhut Aburaaham ayyinti us igooche a mehe ya, harra tuummane dalhaan. Aburaaham jeenteti us amurre Muusa iraaho ayyinta ma iꞌheline, iꞌdaasenyi jeenteti us Waakh ikakhuufe usu eti fissan liiekkaache, iche Waakh ayyinta igooche.

¹⁴ A mehe chiꞌ ayyinti Waakh gooche eti amurretaas raaho kalday dalho, kakhuufnaanki weeli enenyet Waakh kakhuufo walah us yahe mele gone, ayyinti Waakh enenyet igooche laka walah iche tahe mele gon.

¹⁵ Iꞌdi tahe amurre Muusa holi Waakh on keenta. A mehe chirri amurretaas ijirin, amurre lajebcho mele gon.

¹⁶ Maantaka ayyinti Waakh ꞌdooꞌdiis igooche, ꞌdooꞌdi usu kakhuufo on ꞌhela ꞌdee haaggi Waakhe buure ka nyaakhut nyaakhut Aburaaham tuumman iꞌdaanu rumanka lasiicha. Ayyintaas la nahi amurre Muusa raahno kalday menye, ꞌdooꞌdi tuummane saggi Aburaaham Waakh ikakhuufe Waakh ikakhuufo laka a miinsantahe. Jita ka Aburaaham a ooyohi inno tuummane,

¹⁷ iꞌdi liichiiruu, “An ooyohi yaafohi ittaawenye kaayeele.” Aburaaham Waakh ortiis ka a ooyoheenna. Waakkha us rummeeste a Waakkhi enenyet omoot kasookahcho toro la wihi goorat nolol ikhabin noolaacho.

¹⁸ Aburaaham chirri us khajjeel waaye laka, us Waakh on rummeeste toro khajjeel kakhabe. Waakh ꞌdeerka usu ooyohi yaafohi ittaawe kayeele iꞌdi Kamur usu iyidah u, “Nyaakhut nyaakhutaah ꞌdeerka a ittaawa.”

¹⁹ Geedda ka Aburaaham a araarrowe, sartiis la a iꞌdoo iche tumuy, iꞌdi tahe us geeddi guꞌh kudoo a eleele. Toro la arantiisti Saara layadeeh a mahan. Chuꞌus waha dakkhan kamasse laka, kakhuufnaanki us Waakh kakhuufo ma kaꞌharin ba.

²⁰ Aburaaham injire ayyinti Waakhe us rummeesti ka uurlammaal ma khabin. Iꞌdaasenyi kakhuufnaanki us Waakh kakhuufo ka a miigowe, toro la Waakh koolo ikeene.

²¹ Iꞌdi tahe wihi us tissibo a mehe ya, Waakh ayyinti us enenyet igooche tuumman buuhin a yabuuꞌd.

²² Jeentetaase, “Waakh Aburaaham eti fissan iekkaache.”

²³ Toollaka ayta chiirane, “Waakh Aburaaham eti fissan iekkaache,” tadeeh, Aburaaham kalday mee ichiirantahe.

²⁴ Iꞌdaasenyi ayta inno laka a inno ichiirantahe. Chiꞌinno Waakkhi Yeessohi Kamureene omoot kasookahche inno rummeysanni, Waakh inno laka ꞌdooꞌdi fiffissane inno iekkaacha.

²⁵ Waakh Yeesso a soodiibe, jeenteti uskeeleen iyumuyye, Waakh la usu omoot kasookahche, ꞌdee Waakh ꞌdooꞌdi fiffissan inno iekkaacha.