Rooma 2 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Waakh enenyet tuumman a hukkuma

¹ Maantaka atihi etoo addan uuraah goyaka hukkunto, wihi ati isikaayyeeddo ma khabto. Iꞌdi tahe walahbaaw at etoo addan uuraah goyaka kahukkunto, a iꞌdoo at uskeel isigoosso. Iꞌdi tahe wihi etaas yeelo on at laka yeessa.

² Wihi inno garanni a mehe ya, Waakh chuꞌus ꞌdooꞌdi wihi iꞌdee yeelo hukkumo us sina igoocho, us wihi rummaat on yeela.

³ Maantaka chirri atinhi weeli enenyete eti wihi iꞌdee yeelo uurassiin ka hukkuntaane iꞌdaasenyi atin rubeytiin wahaas yeessaan, kol atin hukkunki Waakh atin hukkumo kabahsattaane koogtahiin?

⁴ Ommos uuri ꞌdabakhenye Waakh atin ikhabo ꞌdarraawtaan? Rumanka us a Waakkhi walah ikanyaamine toro la samacchaare. Atin saggi uuri ꞌdabakhenye Waakh atin ikhabo, atin iwoyo, ꞌdee atin uskeeliin kasoonokhattaan ma garattaan a?

⁵ Iꞌdaasenyi matahenyetiin a mimmiige toro la uurassiin ka uskeeli atin kasoonokhattaan a ꞌdiiꞌddaan. Jeentetaas u atin sinati berri ibeenki Waakh holiis atin tuso toro jiti rummaat ka enenyet hukkumo, a isibuuraassaan.

⁶ A mehe Waakh weeli enenyet tuumman ebba geeddi us walah yeele guta.

⁷ Waakh eti tuummane garrahsati haag on yeelo, jita ka la Waakkhi usu koolicho, inkaanyit tuso toro la jiroti ituumin siicho yowti, jiroti jirtuu imassanne siicha.

⁸ Iꞌdaasenyi eti tuummane wihi awtiis kalday on yowti, toro la wihi rummaat ꞌdiiꞌdo, khollookh on raaho, Waakh a kabolkha, hol tusta.

⁹ Waakh sina ichoow bolokh eti tuummane suujoon yeelo a tusa, yaafohi Yaꞌhuude kasookhabta, ꞌdee yaafohi Yaꞌhuud ieheynan ikuta.

¹⁰ Iꞌdaasenyi Waakh eti tuummane haag kalday on yeelo a koolicha, inkaanyit tusta, nebey siicha. Koloo la yaafohi Yaꞌhuude kasookhabta, ꞌdee yaafohi Yaꞌhuud ieheynan ikuta.

¹¹ Iꞌdi tahe Waakh gar badah ma gatti, enenyet tuumman ortiis ka a ekka on.

¹² ꞌDooꞌdi Yaꞌhuud ieheynan amurre Muusa walah iche leetahe mele. Chirri icho uskeel yeelaan, Waakh icho a baabiicha chiꞌ amurreta wohoo ileeheynan laka. Iꞌdaasenyi yaafohi Yaꞌhuud amurre Muusa anatta gone, chirri icho uskeel yeelaane, amurretaas iraahin, Waakh icho amurretaase kahukkuma.

¹³ A mehe ꞌdooꞌdi amurre Muusa nabah on ka daago mee Waakh ꞌdooꞌdi fiffissan iekkaacho. Iꞌdaasenyi ꞌdooꞌdi wihi amurre ꞌdoonto yeelo iche Waakh ꞌdooꞌdi fiffissan iekkaacha.

¹⁴ Chirri ꞌdooꞌdi Waakh igaranne amurre Muusa ikhabin, uuricho on woyo wihi amurre elatti raaho, ꞌdooꞌda saggi us amurre iraaho tusa chiꞌicho amurre ikhabin laka.

¹⁵ Sohoticho wihi us tuso a mehe ya, wihi amurre Muusa enenyet kaꞌdoonto a iꞌdoo uurassicho goya lakachiire. Rubeyohichoki haag ichoow suujoon seley saaho laka waha a cheekaan. Toro la malassicho ankoo ka saggi icho uskeel iyeeleene cheekaane, ankoo ka la a iyeyyeedaane saggi icho haag iyeeleen icheekaan.

¹⁶ Waha la saggane iyateehiin maalinki Waakh Yeesso Kiriisto ka mali weeli enenyete dagsan tuumman hukkumo. Wori Haaggane an cheeko iꞌdaase yadeeh.

Wihi amurre Muusa ichoow yaafohi Yaꞌhuud isiyahiin

¹⁷ Toollaka atihi Yaꞌhuud istadeeh, amurre Muusa khucchissa, wihi ati ichoow Waakh isitahiin keeylajja.

¹⁸ Toro la wihi Waakh kaaꞌdoono a abatte, wihi haaggan ichoow wihi suuje seley bihin a tabuuꞌd. Waha la a jeenteti amurre Muusa kiabisse.

¹⁹ Saggi at eti ki indo laa angaamicho, at banayhi ꞌdooꞌdi mugꞌdi goya kijiro, Waakh igaran itahe a tissibta.

²⁰ Atin ꞌdooꞌdi wihi Waakh miinsan ka ꞌdalammee jite tussaane, ꞌdooꞌdi iiꞌdowin jiti Waakh abissaan. Iꞌdi tahe atin mehe tissibtaan ya, amurre Muusa ka, buuhi runti Waakh enenyet abcho a khabtaan.

²¹ Toollaka atinhi ꞌdooꞌdi addan walah abissaan, a iꞌdoh atin rubeytiin walah isiabinna? Atinhi hatto suujjiche cheektaan, atin rubeytiin walah a hattaan?

²² Atinhi makhaabali kaah ieheynan ommos makhaabassi taah ieheynan aleeurꞌdin, elattaan, atin rubeytiin mejel ommos deyyehoti tiin ieheynan a leeuꞌdurtaan? Atin iyookkoyyohi lawahti weyti a ꞌdiiꞌddaane, atin rubeytiin la minassi iyookkoyyoha lakawahti a hattaan?

²³ Atin amurre Muusati atin khabtaane keeylajjaane, iꞌdaasenyi atin rubeytiin amurreti atin iraahin ka, Waakh lakhaanyo a kadowtaan?

²⁴ Iꞌdi liichiiruu, “Jeenteti atinhi Yaꞌhuude, iche ꞌdooꞌdi Waakh igaran magahi Waakh ikagafa.”

Khandi indigir us khabo mele

²⁵ Khandihi Yaꞌhuude atin khandiyattaan indigir a atin ikhaba chaꞌatin amurre Muusa raahtaan. Iꞌdaasenyi chaꞌatin amurre Muusa iraahin a iꞌdoo atin ikhandiineynan.

²⁶ Maantaka chirri eti Yaꞌhuud ieheynane ikhandiineynan wihi amurre Muusa enenyet kaꞌdoonto raaho, Waakh etaas iꞌdi etoo lakhandiye ma iekkaacho?

²⁷ ꞌDooꞌdi Yaꞌhuud ieheynane sartiis ka ikhandiyanne toro amurre Muusa raaho, iche atinhi Yaꞌhuude chiirnaanneti amurreta khabtaane khandiyattaane toro la iraahin, saggi atin amur ijebisseene uskeel iyeesseen atin igoocha.

²⁸ Eti rumanka Yaꞌhuude ki wihi indo ka laargo kalday menye, ommos khandihi rummaat ki sarti kharaate laaggoocho mee.

²⁹ Wahaas mee etoo Yaꞌhuud kayeelo. Eti rumanka Yaꞌhuude, a ki uuriis ka Yaꞌhuude. Khandihi goyaatteete rummaat la wihi yeelo, amurreti chiiran menye, a Rubeyti Waakhe enenyet urgiyisso. Eti iꞌdaasu luurgiyiche, weeli enenyet menye, Waakhe koolo kaꞌhela.