Mattaayo 17 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeessó fool urgiya

¹ Inkoo ibeen lihe kutte ka, Yeesso Beetero ichoow Yaakoobo ichoow Yoohanahi walaal Yaakoobee khaatte, woye, haloo deer koreen ichohaas on.

² ꞌDeyꞌdoossaayi, Yeesso luurgiyiche, fooliis urgiye iꞌdi orraheet u ababe, gaaddiis la iꞌdi banay u dakhnaatte.

³ Chirraas on Muusa ichoow Eliiya orcho ka soobaheene Yeesso leeyyeedeen.

⁴ Beetero wihi us Yeesso iyidah, “Kamur, a haaggantahe gon chiꞌ nah inta kijirro! Chirri at ꞌdoonto, gaayim seyyah inta ka a disa, too a taahha, too la a too Muusa, too la a too Eliiya.”

⁵ Yeyyeedaayi, mirisoo dakhane torrogoot icho ankube, hooyoo la miris goyaka sooyeede, “Waha a Weeleeyki an weyti ꞌdoono, an weyti kahamaado. Usu nabah isuda!” yidah.

⁶ Abatti uus iche hooy daagte ka, weyti nahte il guꞌdubte fool il kakhabatte.

⁷ Iꞌdaasenyi Yeesso yimiyye, icho ꞌdaare, “Sookaha, roorro akhabina,” iyidah.

⁸ Chiꞌiche serey yeyto, Yeesso on menye et addane iche agarto mele.

⁹ Chirra icho hal kasookhubtaan ka, Yeesso icho amur ibahche wihi us iyidah, “Etoo kalday laka waha atin agarteen iicheekina, ichoowka Ínam Aadam omoot a lakasookahcho.”

¹⁰ Abatti wihi iche usu worsatte, “A iꞌdohe ꞌdeerka tagaammeti amurre geeddi ꞌDoorribe iimaatan Eliiya soonokhta ielatta?”

¹¹ Yeesso wihi us ilaabe, “Rumanka, Eliiya koloo yamiite, walah tuumman iꞌdi icho eheneet toro kayeela.

¹² Iꞌdaasenyi, wihi an atin icheeko, Eliiya orey on yimiyye, ꞌdooꞌd la eti us yahe ma kasine, iꞌdaasenyi suujoonki noole icho ꞌdoonaan usu tuseen. Ínam Aadam laka, saggaas on dahanohicho ka dowwanoha ka sina ikawaarta.”

¹³ Abatti ꞌdeerka saggi us wor Yoohanahi Enenyet Baattissiyo ikaayyeedo, kasse.

Yeesso inanki ginna dakhatti ginna kabahcha

¹⁴ Chiꞌicho urur iyamiitiin, etoo Yeesso iyimiyye ortiis ka jilbo il kaguꞌdde.

¹⁵ “Kamur, inankeey uur isoonugleyso, a sirgowe, sina weyti kawaarta, a mehe kol dakhan ꞌdab ommos bicche goya kadiha.

¹⁶ Abattitaah la a ikeene, iꞌdaasenyi iche inam a samaawwaayte,” iyidah.

¹⁷ Yeesso wihi us ilaabe, “ꞌDooꞌdi weyꞌdane uskeel lehe Waakh ikakhuufin! Geeddoh atin leefiddiyo? Geeddoh atin igarrahsadi? Ínam inta ka ikeena!”

¹⁸ Yeesso ginna leejaakhe, ginna la inam kabahte, inam la chirraas on samaate.

¹⁹ Abatti ꞌdeerka dagsi ka Yeesso itimiyye, “Nah a iꞌdoh ginna bihit iagaafanne?” worsatte.

²⁰ Wihi us ilaabe, “A jeenteeti atin Waakh weyti ikakhuufin. Rume atin icheeka, chiꞌ kakhuufnaanki atin Waakh kakhuuftaan buur ka geeddi ilinti geeyi dahar yahe a geeddi atin hala, ‘Inta kaguure intuus iro,’ itadeehiine, ulla irti. Walah atin iubaaꞌdan la mala.”

Yeesso koli lammaatteet omoottiis kayeyyeeda

²² Chiꞌ abatti tuumman boroofenhi Gaalilaaya ka isitimiy ka, wihi us iyidah, “Ínam Aadam dowwanoha ka ꞌdube lagoocha, dahanohi enenyet lagessa,

²³ yagiisiine, ibeenki seyyahnaatteet ka omoot lakasookahcha.” Abatti tuumman la fool ribowe.

Kooddihi minki Waakhe buure

²⁴ Inkoo Yeesso ichoow abattitiis ba ilkerengeetti Kafarnaaꞌhum eleeleen ka, ꞌdooꞌdi kooddihi minki Waakhe buure goocho, Beetero iyimiyye, “Eti atin iween kooddihi minki Waakhe buure a guta?” worsateen.

²⁵ Beetero la wihi us ilaabe, “Aa a guta.” Beetero la min gele, Yeesso wahaas worsataa. Yeesso geeddi Beetero isooyeedin yeede, “Siimon at mehe tadeeh? Karnatohi harrata ayyo kooddi kaguttaan, ꞌdooꞌdichooda bal ꞌdooꞌdi ilaas kicho ieheynane ilaas fiddiyo?” worsate.

²⁶ Beetero wihi us ilaabe, “ꞌDooꞌdi ki ilaas ieheynane kaguttaan.” Yeesso iiyeyye, “ꞌDeerka ꞌdooꞌdicho kooddi ma guto gon.

²⁷ Iꞌdaasenyi uus inno kakhuufnaanki icho Waakh kakhuufaan tirine, nyaam beyti Gaalilaaya iro, oroohti bahag lakakhabti bey goya isey. Bahaggi oraate at sookhabatte, chaꞌat af bakkaahisse chilim a agarta, chilinkaas khaate ꞌdooꞌdi kooddi goocho igeeche, kooddiheey ichoow kaah ba kagut.”