Mattaayo 14 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yoohanahi Enenyet Baattissiyo layagiis

¹ Saahka ꞌHeroodhi boroofenhi Gaalilaaya iween wihi Yeesso yeelo daage.

² Ulla wihi us ꞌdooꞌdiiski hil haaggicho iyidah, “Waha a Yoohanahi Enenyet Baattissiyo. Omoote kasookahe, jeentetaase miigti us wihi weeli enenyet yeelin iubaaꞌdan kahaaggicho ikhaba.”

³ ꞌHeroode goorat Yoohana sookhabte, jeela ka hide. Waha la a jeente ꞌHeroodiyati makhaabál walaaliiski Fiilif layadeeh.

⁴ A mehe Yoohana mehe ꞌHerood idowe ya, “Amurre ichoow khaatannaanki at iche khaatatti ma israahaan.”

⁵ ꞌHerood Yoohana ogoos a ꞌdoone, iꞌdaasenyi ꞌdooꞌd karoore, jeenteti ꞌdooꞌd Yoohana eti Waákh íyeyyeedo iekkaachuu.

⁶ Maanti seeri goorat ꞌHerood desse soomare ka, inám ꞌHeroodiya ꞌdooꞌd tuumman ortiis ka ꞌdurte, ꞌHerood weyti hamaadisse.

⁷ ꞌHerood ꞌdeerka daato ka inám ꞌHeroodiya walahbaaw iche daahte siin iayyiche.

⁸ Abarche la wihi iche tadeeh icheekte, “Yoohanahi Enenyet Baattissiyo matakkiis karam sookoriche inta ka isii,” itidah.

⁹ Karnat uur suujowe, iꞌdaasenyi jeenteti wihi us idaatte ichoow jeenteti martitiis u, amur bahche ꞌdee wihi iche daahte a lasiicho.

¹⁰ ꞌDeerka etoo iskareet ergate jeela ka Yoohana matah lasoogooche.

¹¹ Matakkiis karam lasookorche inám lasiiche, iche la abarche igeesse.

¹² Abatti Yoohana timiyye, sartiis khaatte hawwaasse. ꞌDeerka iratte Yeesso wihi yitah icheekte.

Yeesso mejeli elif chane gololicha

¹³ Inkoo Yeesso wihi yitah daage ka, koobanhoo gele, intaas katabe, intoo khaawwan irte. Chirri urur waha daage ka, ilkerengeeto kasoobahe, luhlo ka Yeesso raahe.

¹⁴ Chirri beyti Gaalilaaya afiche ka Yeesso kooban kasooyage ka, urura buure arge, weyti uur inugleeste, toro ꞌdooꞌdichoki khakkhannan laka samaache.

¹⁵ Chirri il gelebnowe ka, abattitiis itimiyye, “Il kola a ibeennowe, inta la a yibe, ururre laabe ꞌdee goobab a iratti gololoo a soogatteen,” itidah.

¹⁶ Yeesso la wihi us ilaabe, “Walah icho kanokhtaan mele. Atin rubeytiin wohoo icho yamhiin siicha!”

¹⁷ Wihi icho ilaabeen, “Wihi nah inta ka khabno a makaate chan ichoow bahag lamma kalday on.”

¹⁸ Yeesso la wihi us iyidah, “Sookhaata ikeena.”

¹⁹ Ulla urur amur ibahche hoos koorromiche. Makaateyyohi chane ichoow bahaggi lammee khaate, serey yeye, Waakh kalaꞌd ilaabe, makaateyyo jejjebche. ꞌDeerka abatti idiibe, abatti la enenyet siisse.

²⁰ Enenyet tuumman golossate, darge. Abatti la enjel tomon ichoow lamma gololi laajjebche lasoowaache buuhaan soosuunte.

²¹ Mejeli golossate tiriis, deyyeho ichoow nyaakhut la liiekkaan, a geeddi alif chan.

Yeesso bicche sarcho kasohta

²² Yeesso chirraas on abattitiis kooban gesse, ꞌdee ortiis bey aficheki ꞌdiri a iratti geeddi us urur kahcho.

²³ Inkoo us urur kahche ka, burroo sartiis ikore Waakh wahte. Intaas keley kajiraayi, il ibeennowe.

²⁴ Iꞌdaasenyi kooban bey goyaka geeddoo a sohteen, ire la kooban kolba ankoo iguꞌdubta. A mehe hafare icho jeychaa.

²⁵ Geedda baryo kasoodowwaatte ka, Yeesso bey sarche kasohte abattitiis iirte.

²⁶ Chirri abatti usuhi bey sartiis kasohti agarte ka, weyti nahte, “Wooy, waha a meleyka!” tidahye, jeenteti roorruu la, riirte.

²⁷ Iꞌdaasenyi Yeesso chirraas on, “Anahina, a ani roorro akhabina!” iyidah.

²⁸ Beetero la wihi us ilaabe, “Kamur, chirri rumanka ati tahe, amur ibihiche bicche sarcho a kasoosohdi, a kiimaate.”

²⁹ Yeesso la, “Kaale,” iyidah. Beetero ꞌdeerka kooban goya kasooyage, bicche sarcho kasohte, Yeesso iirte.

³⁰ Iꞌdaasenyi chirri us hafari iir kahcho arge ka roorro gesse, bicche goya kadihe riire, “Kamur irib,” iyidah.

³¹ Yeesso chirraas on dahan sooge khabte, wihi us iyidah, “Ati iꞌdaaru marah on ikakhuufta! A iꞌdoh ikamalassa?”

³² Chirri icho kooban kidiheen ka, hafar tolossate.

³³ Abattiti kooban goya kijirte la jilbo il kaguꞌdubte, Yeesso wahatte, “Rumanka ati Weeli Waakhe,” tidah.

Yeesso ili Gennaasaret ka ꞌdooꞌdi khakkhannan samaacha

³⁴ Chirri icho beyti Gaalilaaya afichekuus imaaheen ka, intoo Gennaasaret layadeeh yimaateen.

³⁵ Chirri ꞌdooꞌdi ilaas Yeesso kase ka, farniin ilaas tuumman iergeene, ꞌdooꞌd ꞌdooꞌdichoki khakkhannan tuumman sookhaate, Yeesso ikeene.

³⁶ Hawwaasteene, ꞌdee ꞌdooꞌdi khakkhannan laddi kabuuꞌdiis kalday laka a ꞌdaaro. Eti tuummane ꞌdaare la samaate.