Marko 9 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ Toro wihi us iyidah, “Rume atin icheeka, gaasiinkoo maanta inta kijiro omoot ma argo, ichoowka dakhi Waakh miig khabaayi yamiit.”

Yeesso luurgiyicha Eliiya ichoow Muusa Yeesso leeyyeedaan

² Inkoo ibeen lihe kutte ka, Yeesso Beetero ichoow Yaakoobo ichoow Yoohana khaatte, woye, haloo deer koreen, ichohaas on. ꞌDeyꞌdoossaayi Yeesso luurgiyiche.

³ Gaaddiis la weyti dakhnaatte, waha maanta torrogoote, dikhaassi harrata kootte ikayeelin yitaaheen.

⁴ Eliiya ichoow Muusa ba orcho ka soobaheene, Yeesso leeyyeedeen.

⁵ Beetero wihi us Yeesso iyidah, “Eti weenoow, a haaggantahe gon, chiꞌ nah inta kijirro. Alley gaayim seyyah a disno, too a taahha, too a too Muusa too la a too Eliiya.”

⁶ A mehe abattiti seyyahe weyti nahte, Beetero wihi us laabo ma garti.

⁷ Mirisoo soobahe icho tuumman ankube. Hooyoo la mirisaas goyaka sooyeede, “Waha a Weeleeyki an weyti ꞌdoono. Usu nabah isuda!” yidah.

⁸ Chirraas on jilakh rorrogatte, et addane icho leejiro icho argeen mele Yeesso on menye.

⁹ Chirra icho hal kasookhubtaan ka, Yeesso icho amur ibahche, iicho wihi icho argeen ꞌdooꞌdi addan iicheekine ichoowka Ínam Aadam omoot a kasookaho.

¹⁰ Wihi us iyidah raahte, iꞌdaasenyi ayta omoot lakasookaho wihiche kahawwoocheen.

¹¹ Wihi icho Yeesso worsateen, “A iꞌdoh tagaammeti amurre, ‘Eliiya koloo yamiit,’ ielatta?”

¹² Yeesso wihi us ilaabe, “Rumanka, Eliiya koloo yamiite, walah tuumman iꞌdi icho eheneet toro kayeela. Kamalda bal a iꞌdoh Chiirnaanneti Waakh goya Ínam Aadam bolokkhi buurenye latusa, weyti laꞌdiiꞌda liikachiire?

¹³ Iꞌdaasenyi wihi an atin icheeko, Eliiya a yimiyye, ꞌdooꞌd la suujoonki noole icho ꞌdoonaan usu tuse iꞌdi wihi usu miinsane lachiiruu.”

Yeesso inanki ginna dakhatti samaacha

¹⁴ Chiꞌiche abattiti addan itamiit, ururi buurenye icho khaariche argeen. Tagaammeti amurre ichehi abatti leeiriirto ꞌheleen.

¹⁵ Enenyet uun us Yeesso arge weyti girmeeste, iorye bariitiche.

¹⁶ Yeesso wihi us abattitiis worsate, “Atin mehe ꞌdooꞌdaas isleeiriirtaan?”

¹⁷ Etoo la urur goyaka wihi us ilaabe, “Eti ween, inankaaya kikeene, ginna dakhatta, yeyyeed tiratta.

¹⁸ Kolbaaw iche khabatte, ile irogta, af dakkhan ꞌdombeestaane, ilko iskaroba choꞌha. Abattitaah, ‘Ginna inam kabahcha,’ iidahye, iꞌdaasenyi iche a agaafatte.”

¹⁹ Yeesso wihi us ilaabe, “ꞌDooꞌdi weyꞌdane Waakh ikakhuufin, geeddoh atin leefiddiyo? Geeddoh atin igarrahsadi? Ínam ikeena!”

²⁰ Ínam Yeesso ikeeneen. Ginna uun iche Yeesso agarte, chirraas on inam korkokisse. Inam il guꞌdde, fade, afa dakkhan ꞌdomboyyo leekeene.

²¹ “Uuꞌ maantoh iꞌda eheneet?” Yeesso aabbahi inam worsate. Wihi us ilaabe, “Uus weel eheet.

²² Geeddi buure ꞌdab ommos bicche goya kaluguꞌdda, ichehi tagiise ꞌdoontaa. Iꞌdaasenyi chaꞌat wohoo nah iyeelin tabuuꞌd, uur nah isoonugleyso, nah gargaar!”

²³ “Chaꞌat wohoo tabuuꞌd a?” Yeesso yidah, “Eti Waakh on rummeesti walah us iubaaꞌdan mala.”

²⁴ Aabbahi inam chirraas on sooriire, wihi us yidah, “An a kirummeesda, iꞌdaasenyi igargaare uurlammaal a baho.”

²⁵ Yeesso chuꞌus ururi intaas isooryo arge ka, ginna leejaakhe, “Ginnata ínam yeed ichoow dogo tirto, amure kibahchaa, toolla kofche inankaas goya kabahe, jirtuu la iinokhan!” iyidah.

²⁶ Ginna riirit guꞌdubte, ínam korkokisse kabahte, inam iꞌdi eti yumuy yitahye, ꞌdooꞌdi buure, “A yumuy,” yidah.

²⁷ Iꞌdaasenyi Yeesso inam dahan khabte, sootoolliche, inam la tolossate.

²⁸ Inkoo Yeesso min gele ka, abattitiis dagsi ka mehe worsatte ya, “Nah a iꞌdoh ginna bihit iagaafanne?”

²⁹ Wihi us ilaabe, “Ginnati iꞌdee, wihi bahcho tuumman a weysi kalday.”

Yeesso toro omoottiis ichoow omootti us kasookaho kaayyeeda

³⁰ Intaas kakaheene, ili Gaalilaaya dah kagoocheen. Yeesso usuhi enenyet inti us kijiro abti ma ꞌdoono,

³¹ a mehe abattitiissa wohoo abchaa. Wihi us iyidah, “Ínam Aadam dowwanoha ka ꞌdube lagoocha, dahanohi enenyet lagessa yagiisiine, chirri maan seyyahe kutte ka omoot kasookaha.”

³² Iꞌdaasenyi wihi us idowo ma abanne, toro usu worsan karooreen.

Abatti eti ꞌdooꞌdi addan tuumman iween isworsatta

³³ Ilkerengeetti Kafarnaaꞌhum soogeleen. Chiꞌicho min geleen ka, Yeesso wihi us abatti worsate, “Atin kootte jit ka mehe isleeiriirtaan?”

³⁴ Iꞌdaasenyi gammadisse a mehe kootte jit ka eti ꞌdooꞌdi addan tuumman iweene isleeiriireen.

³⁵ Yeesso orronte, abattiisti tomon ichoow lammee isiwahe wihi us iyidah, “Chiꞌ etiinkoo orey ꞌdoono, eti weyti ꞌduboot a yitaahe, falfati enenyet tuumman a yitaahe.”

³⁶ Weeloo rucchul khaate, goycho toolliche. Dahano kakhabte wihi us abatti iyidah,

³⁷ “Eti tuummane jeenteti us abattiteey iyahuu, nyaakhuta rurrucchul kichekoo martiisti, ani imartiista. Eti ani imartiisti la, ani menye eti isooergate martiista.”

Eti inno iꞌdiiꞌdin, a aaleenna

³⁸ Saahka Yoohana wihi us iyidah, “Eti ween, nah etoo antohi magahaah ka ginnayyo enenyet goya kabahcho a agarre. Jeenteti us keen ieheynan u wahaas toolli inidah.”

³⁹ “Ajeyinna,” Yeesso yidah, “Eti antohi magaheey ka wihi weeli enenyet yeelin iubaaꞌdan yeelo, ꞌdeeka toro ma ihayhayo,

⁴⁰ a mehe eti inno iꞌdiiꞌdin, a aaleenna.

⁴¹ Rume atin icheeka, eti tuummane jeenteti us abatti Kiriisto iyahuu kooboo biccheet kisiiche, etaas koloo kalday laka kalaꞌddiis ma waayo.”

Wihi uskeel kaalugꞌdo

⁴² “Chiꞌ etoo ꞌdooꞌdaar irummeesti kichokoo tarraantarricho la, etaas wihi ideefo a usuhi daddaabti buurenye gurnaan lakatumo lukhum lakahido beyti buure lakalugꞌdo.

⁴³ Chiꞌ dahantaah uskeel kaaluguꞌddo, dahantaas gooy! Atihi dahan laaye jiroti jirtuu imassan ꞌhesso deefta, atihi dahano lammacho khabto, meessi ꞌdabi armaanjireene ꞌdabiche ijitin iratti ka.

⁴⁵ Chiꞌ luhtaah uskeel kaaluguꞌddo, luhtaas gooy! A mehe atihi elyeenye jiroti jirtuu imassan ꞌhesso deefta, atihi luhlo lammacho khabto, meessi ꞌdabi armaanjireen lakaalugꞌdo ka.

⁴⁷ Chiꞌ issaah uskeel kaaluguꞌddo la, issaas bihi! Atihi issoo laaye dakhi Waakh gesso deefta, atihi indo lammacho khabto, meessi ꞌdabi armaanjireen lakaalugꞌdo ka.

⁴⁸ Intaas ka, “ ‘ꞌdooꞌdaas akhsihiis ma yamuute, ꞌdabiche la jirtuu ma jito.’

⁴⁹ Saggi orran golol tuumman magaaꞌd liikachibuu, saggaas on enenyet tuumman ꞌdabi sinayyoot itaba.

⁵⁰ “Magaaꞌde a haaggantahe. Iꞌdaasenyi chiꞌiche gimbatiche waayte saggoh toro liigimbaacha? Magaaꞌddi haaggane gimbatiche khabto ateeha! Nebey iskaleefiddiya.”