Marko 8 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso mejeli alif affare goollicha

¹ Ibeennetaas on ururoo buure toro kulme, golol la ma khabin. Yeesso abattitiis wahe wihi us iyidah,

² “An ꞌdooꞌda weyti uur isoonugleesda. Maan seyyah dakkhan ani on ileejire wihi icho yamhiin la ma khabaan.

³ Chirri an ankaa khabaani goobassicho ilaabo jit ka a sussuuhaan. A mehe gaasichokoo foga kayimaateen.”

⁴ Abattitiis wihi iche ilaabte, “Yiba ka la, gololi geeddaasenye enenyeta tuumman yaakho intoh kaꞌhella?”

⁵ Yeesso la, “Makaate geeddoh khabtaan?” worsate. Wihi icho ilaabeen, “Makaate teeba.”

⁶ Ulla urur amur ibahche orrommiche. Makaateyyohi teebee khaate, Waakh kalaꞌd ilaabe jejjebche, abattitiis ididdiibe, “Baꞌh gisa,” iyidah. Iche la baꞌh gisse.

⁷ Bahaggi rurrucchul laka wohoor a khabte. Yeesso wahaas laka iweeste, “Waha laka gisa,” iyidah.

⁸ ꞌDooꞌd golossate ichoowka darge. Abatti enjel teeba gololi jejjebane lasoowaache buuho soosuunte.

⁹ Mejeli golossate a geeddi elif affar. Inkoo us enenyet laabe ka,

¹⁰ chirraas on kooban goya gele, abattitiis khabaayi anki distiriighi ꞌDalmanuuꞌda tabe.

Farissaayo ichehi Yeesso wahanyeyyohoo miigti Waakh tuso iyeelo maranta

¹¹ Farissaayotoo timiyye Yeesso leeiriirte usu angey gelin ꞌdoontaa, wahanyeyyohoo miigti Waakh tuso goobi Waakh kayimiy daahte.

¹² Yeesso uur suujowe, “ꞌDooꞌda iꞌdee a iꞌdoh wahanyeyyohi miigti Waakh tuso idaaha?” yidah. “Rume atin icheeka, wohoo kaldaye miigti Waakh tuso laka ma lasiicho!”

¹³ ꞌDeerka Yeesso Farissaayo katabe, kooban goya inokhte, beyti Gaalilaaya aficheki ꞌdiri irte.

Yeesso abattitiis wihi Farissaayo ꞌdooꞌd abisso katootoocha

¹⁴ Abatti makaate a kadabte, too kaldaye iche kooban goya kakhabto on menye.

¹⁵ Yeesso icho tootooche, “Yeedad Farissaayo ichoow yeedad ꞌHeroode iꞌdi booddati makaate fuurissee yuubsada!” iyidah.

¹⁶ Icho la iskaleehawwoocheene, wihi icho yidaaheen, “Jeenteti inno makaate ikhabine iꞌdaas iessa.”

¹⁷ Yeesso la, wihi iche kahawwoosso a garta, mehe icho worsate ya, “A iꞌdoh makaatewaayyo ikayeyyeeddaan? Atin uliba walah ma abanna? Uurassiinna ladagahnooche?

¹⁸ Indo a khabtaane, iꞌdaasenyi walah atin agartaan mele! Nabho la a khabtaane, iꞌdaasenyi walah atin daagtaan mele! Toro ma kasooꞌhessaan a?

¹⁹ Maanti an makaate chan mejeli elif chane ijejjebche enjel geeddoh makaateti sooꞌhadde kijirto soosuunteen?” Wihi icho ilaabeen, “Tomon ichoow lamma.”

²⁰ “Maanti an makaate teeba mejeli alif affare ijejjebche enjel geeddoh buuhto makaateti sooꞌhadde kijirto soosuunteen?” toro worsate. Wihi iche ilaabte, “Enjel teeba.”

²¹ “Toro la uliba walah atin abatteen mele?” iyidah.

Yeesso ilkerengeetti Bessaayda ka etoo indo laa samaacha

²² Ilkerengeetti Bessaayda yimaateene, ꞌdooꞌdoo la etoo indo laa Yeesso ikeene, hawwaasteene, ꞌdee dahan a kaꞌdaaro.

²³ Yeesso et dahan khabte, ilkerengeet khariche geeche. Et indo katufe, dahan korche, “Wohoo a agarta?” worsate.

²⁴ Et la serey yeye wihi us yidah, “Enenyet a arga, iꞌdi geeyohi sohti iyoogyahiin.”

²⁵ Toro et dahano indo korche. Kolaakka et indo furnameene, indo toro haagsateene, walah tuumman mujjum arge.

²⁶ Yeesso et minkiis ierge, wihi us iyidah, “Ilkerengeet goya iiran.”

Beetero eti Yeesso yahe cheeka

²⁷ Yeesso ichoow abattitiis ba ilkerengeetohi ilkerengeetti weene Kaaysareya Fiiliffi kamarsan ikaheen. Jit raahaani, Yeesso abattitiis wihi us worsate, “ꞌDooꞌd an a ayyo essa?”

²⁸ Wihi iche ilaabte, “Gaasoo ati a Yoohanahi Enenyet Baattissiyo iche essa, gaasoo a Eliiya essa, gaasoo laka ꞌdooꞌdi goorat Waákh íyeyyeedo a kichekoo, iche essa.”

²⁹ “Iꞌdaasenyi atin la? An a ayyo tadeehiin?” worsate. Beetero wihi us ilaabe, “At a Ki Lasubhe lasugo.”

³⁰ Yeesso icho tootooche, uus icho eti us yahe etoo kalday laka icheekine.

Yeesso bolokkhi latuso ichoow omoottiis cheeka

³¹ Yeesso ꞌdeerka abattitiis wihi Waakh gooche abinnaan sookhabte. Waha la a saggi Ínam Aadam sinati buure liituso, ewweenki Yaꞌhuud ichoow kuhaaniyyohi wewween ichoow tagaammeti amurre usu iꞌdiiꞌdaane, liiyagiise, chirri maan seyyahe kutte us omoot ikasookaho.

³² Yeeda weyti ibabbakkaahiche, Beetero la usu ꞌdol geeche leejaakhe.

³³ Iꞌdaasenyi Yeesso urgiye abattitiis yeye, Beetero leejaakhe wihi us iyidah, “Seytaankaane fooleey buj! At wahanyeyyohi Waakh menye, iꞌdaasenyi wahanyeyyohi weeli enenyete kamalatta.”

³⁴ Yomboka urur ichoow abattitiis wahe wihi us iyidah, “Chiꞌ etoo isooraahin ꞌdoono, awtiis a ꞌdiiꞌdo toro la massalaabatiis barbar a sookorsati a isooraaho.

³⁵ A mehe eti tuummane jirotiis ribin ꞌdoono jiroti rummaat a waaya. Iꞌdaasenyi ki ani ichoow Wori Haaggan jirotiis iwaayo, jirotiisti rummaat a riba.

³⁶ Etoo maanta a chirri us wohoo ꞌhele chirri us wihi harrata tuumman ꞌhele, jiroti awtiissa Waakh siiche la waaye?

³⁷ Ommos weeli enenyet maanta mehe diibin yabuuꞌde jirotiis kadooricha?

³⁸ Chirri etoo ꞌdooꞌda weyꞌdane waakkhassi addan wahti uskeel leh goyaka ani ikuuryaawo toro yeedeey kuuryaawo, Ínam Aadam laka maanti us miig Aabbahiis ichoow ti herti Waakhe munyee leesoonokhti, usu a kuuryaawa.”