Marko 3 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso Seeri Lanaso ka etoo samaacha

¹ Yeesso toro minki weysiite Yaꞌhuud gele. Etoo dahane hanjaawte la intaas a kijire.

² Chiiy Yeesso too intaas goya kijirta, wohoo icho Yeesso kacheektaane yowtaane, ꞌdeerka usu Yeesso Seeri Lanaso ka etaas samaacho ꞌdeyꞌdoocheen.

³ Yeesso wihi us eti dahane hanjaawte iyidah, “Enenyet tuumman ortiis tolosso!”

⁴ Yeesso ꞌdeerka wihi us icho worsate, “Seeri Lanaso ka, wihi haaggane layeelo ichoow suujoonki layeelo koh amurreteen israahaan? Jiroti enenyete laribo israahaan bal enenyeti layagiis?” Iꞌdaasenyi gammadicheen.

⁵ Yeesso hol ka indo leeraahe toro weyti uur suujowe, matahmiigticho ka. Et, “Dahantaah fiti!” iyidahye, et dahan ficche, dahane toro tuum haagsatte.

⁶ ꞌDeerka Farissaayo bahte, ꞌdooꞌd ꞌHerood iiratte, chirraas on jiti icho Yeesso kayagiisiin kamasseen.

Ururre Yeesso raahta

⁷ Yeesso ichoow abattitiis ba intaas katabeene, beyti Gaalilaaya afiche irteene, ꞌdooꞌdi ittaawenye boroofenhi Gaalilaaya kayimiy la raahe.

⁸ Wihi us yeelo ladaage, enenyeti ittaawe ili Yaꞌhuudiya ichoow ilkerengeetti weene Yeerusaleem ichoow ili Idumeeya ichoow ili Yoordan berihiise ichoow ilassi ilkerengeetohi Tiiro ichoow Siidon tuumman kayimiy.

⁹ Jeenteti urur ibuuraatuu, abattitiis koobanhoo us koro, ꞌdee goya katolossati, urur iskalaabo daahe.

¹⁰ A mehe enenyeti buurenye samaache, ꞌdeerka ꞌdooꞌdi khakkhannan tuumman a issootakha, Yeesso ꞌdaarin ꞌdoonaa.

¹¹ ꞌDooꞌdi ginnayyo dakhtaan chirbaaw ginnayyohaas Yeesso argeen, inkaanyit ka ortiis ka il a guꞌddaane riiraane, “Ati Weeli Waakhe!” yadeehiin.

¹² Iꞌdaasenyi amur ibahche uus icho eti us yahe cheekin.

Yeesso ergaanotiisti tomon ichoow lammee soobahsata

¹³ Yeesso irte burroo kore, ꞌdooꞌdi us ꞌdoono isiwahe, icho la usu iyimaateen.

¹⁴ Et tomon ichoow lamma soobahsate, ergaanotiis kayeesse ꞌdee usu leejirta, toro leergata Yeedi Waakh cheekta.

¹⁵ Toro la antohi iche ginnayyo laka enenyet kabihisso siiche.

¹⁶ Reeri tomon ichoow lammeenye us soobahsate a kan, Siimon magahi us ibahche a Beetero,

¹⁷ Yaakoobohi inam Sebedaayee ichoow walaaliiski Yoohana layadeeh. Icho la magahi us ibahche a Bowwanerge. Iꞌdaakka la mehe leessa ya, “Yeeleti Karkaraho.”

¹⁸ Reeri addan la a Andereeya, Fiilif, Barꞌdolomaayo, Mattaayo, Toomas, inam Alfaayo ki Yaakoobo layadeeh, ꞌDaꞌdaayo, Siimonhi magahiis Yaaftiisꞌdoone layadeeh,

¹⁹ ichoow Yuuda Iskaariyoot, ki yomboka Yeessó ꞌdub gooche.

Yeesso ichoow Seytaanki Beelsebuul lakawaho

²⁰ Yomboka Yeesso minki us fiddiyo isoonokhte, urur la buuraate, ichoowka usu ichoow abattitiis saggi icho igolossataan laka waayeen.

²¹ Chirri abartiis ichoow walaalinyetiis daageen ka yimaateen, goobe geechaanee. Iꞌdi tahe mehe essaan ya, “Us a sirgowe.”

²² Tagaammeti amurre la ilkerengeetti weene Yeerusaleeme katimiyye, mehe elatta ya, “Beelsebuule dakhta alah! Miigti karnati ginnayyoote enenyet ginna kabahcha.”

²³ Yeesso ꞌdeerka ꞌdooꞌd wahe, mammaho ka leeyyeede, “Seytaan saggoh Seytaan ibahcha?

²⁴ Yaafe chirri iche seley goote, geed iche fiddiito mele.

²⁵ Minki seley gowe, isdiho geed us fiddiyo mele.

²⁶ Seytaan laka, chirri usu on isikahe seley goggowe, geed us fiddiyo mele, a baaba.

²⁷ Rumanka et minki etoo miige gelo meehiis hato mele sammata us koloo etaas miige ihidhidin. ꞌDeerka chirraase minkiis hata.

²⁸ Runti an atin icheeko, enenyet uskeeliis tuumman ichoow gaf tuumman laka a liikakuta on.

²⁹ Iꞌdaasenyi eti Rubeyti Munyee igafe, jirtuu uskeeliis ma liikakuto. Uskeeli uꞌ gele, a ki jirtuu laka imassan.”

³⁰ Wihi us ꞌdooꞌdaas iꞌdaas ikayidah, a jeenteti icho “Usu ginna dakhatta!” iessaan.

ꞌDooꞌdi Yeesso rummeeste a hiiy Yeesso ki rummaat

³¹ Abartiis ichoow walaalinyetiis ꞌdeerka yimaateene, khar tolossateen. Farniin ergeene ꞌdee Yeesso a liisoowaho.

³² Ururi kootte Yeesso khaariche fiddiyo la, wihi icho Yeesso iyidaaheen, “Abartaah ichoow walaalinyetaah a kiyowtaane, kallaayo khar ka.”

³³ Wihi us worsate, “Kamalda bal, abarteey ichoow walaalinyeteey a ayyo illeh?”

³⁴ ꞌDooꞌda fiddiyo khaariche yeye, “Yeya, abarteey ichoow walaalinyeteey kallaayo.

³⁵ A mehe eti tuummane wihi Waakh ꞌdoono yeelo, a walaalaaya, a walaassaaya, a abartaaya,” iyidah.