Marko 16 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso omoot lakasookahcha

¹ Inkoo Seeri Lanaso kute ka Maariyati ilkerengeetti Magdaala ichoow Maariyati abar Yaakoobee ichoow Saloome miricchihoo weyti uyuuge soogateen, sar Yeesso kasubhaanee.

² Ibeenki oraate teebataas ka, uus orrahe sookorte kaheene, goꞌddi Yeesso lakahawwaale ibaheen.

³ “Ayyo ꞌdee daddaabti goꞌd af lakorche inno iꞌdembeleeliya?” iche isworsateen.

⁴ Iꞌdaasenyi chiꞌicho serey yeyeen ka, daddaabti laꞌdembeleeliye argeen chiꞌiche buurtahe laka.

⁵ Chiꞌicho goꞌd geleen ka, eti nugule anki miigeet fiddiyo darfohi daddakhan khabo argeene, naheen.

⁶ Ulla wihi us iyidah, “Anahina! Yeessohi Naasarete goorat massalaaba lakakaahe iche yowattaan. Omoot a kasookahe, inta ma kijiro! Meessi icho kareecheen yeya.

⁷ Iꞌdaasenyi nyaama, abattitiis ichoow Beetero mehe itadeehiin ya, ‘Yeesso ortiinna ili Gaalilaaya irta. Iꞌdi goorat us atin iyidah u, intaakka a agartaan.’ ”

⁸ Oboorri hamar kayimiyye girmeeste, goꞌd kabahe, firde. Etoo kalday laka ma icheekin, a mehe roorro khabeen.

Chiirnaanneti Yeedi Waakhe uumacchee Marko 16:9-20 ma khabto. Yeesso Maariya Magdaala isoobaha

⁹ Ibeenki oraate teebataase us omoot kasookahe ka, kolooraat Maariyati ilkerengeetti Magdaala goorat us ginna teeba kabahche isoobahe.

¹⁰ Iche la iratte, ꞌdooꞌdi goorat Yeesso leejire icheekte. Icho la a wihi uuwwicho ooyo.

¹¹ Chirri icho saggi Yeesso inoolyahe ichoow saggi iche iagarte daageen ka, rummeysawwaayeen.

Yeesso ꞌdooꞌdoo lammeenye usu raaho isoobaha

¹² Waha ꞌdubicho ka, Yeesso uummankoo yeere ka ꞌdooꞌdoo lammeenye ilkerengeet khariis raaho isoobahe.

¹³ Chiꞌiche eti us yahe kasse ka, nokhatte, ti addan icheekte, iꞌdaasenyi iche laka ma rummeysan.

Yeesso abattiti tomon ichoow koowe isoobaha

¹⁴ Yomboka golossataani Yeesso ichehi tomon ichoow koowe isoobahe. Jeenteti icho kakhuufnaanki icho usu kakhuufaan ikhabin ichoow matahmiigti icho wori ꞌdooꞌdi inkoo us omoot kasookahe arge irummeysan u, leejaakhe.

¹⁵ Wihi us icho iyidah, “Nyaama harra tuumman taba, Wori Haaggan la ꞌdooꞌdi Waakh soouume tuumman icheeka.

¹⁶ Eti rummeesti toro labaattissiyo, a lariba. Iꞌdaasenyi eti irummeysan Waakh uskeel a igoocha.

¹⁷ ꞌDooꞌdi rummeesti wahanyeyyoha miigti Waakh tuso a yeela. Antohi magaheey ka ginna enenyet a kabahcha, afi us idaagin laka kayeyyeeda.

¹⁸ Toof laka dahan a kakhabta, toro chuꞌus hadaadohi uskul yabhuub laka ma gaameeraan iꞌdaaru laka. ꞌDooꞌdi khakkhannan dahano on korcha, ꞌdooꞌd samaata.”

Yeesso serey liikahcha

¹⁹ Inkoo Yeessohi Kamure icho leeyeede ka goobi Waakh liikorche, Waakh anki dahantiisti miigeet orronte.

²⁰ Abatti ꞌdeerka bahte Wori Haaggan meel tuumman ka cheekte. Kamur la icho hil leehaaggiche, yeedicho ichoow wahanyeyyohi miigti Waakh tuso sooraahe ka, yeedi icho cheekeen rummaache.