Marko 12 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Mammahti ꞌdooꞌdi sussuujenye gos kireeste

¹ Yeesso ꞌdeerka makhaaballetaas mammah ka wihi us iyidah, “Etoo geeyohi sabiibe gosiis goyaka il gesse. Gos ootti dagaheet kamarche, lunki gurnaanki sabiib lakayabti khute. Koondihi deere eti gos yaakhicho fiddiyo, laka dise. ꞌDeerka gosiis lakireeste, ulla iloo deer sulhaal kiirte.

² Maanti gurnaan lagurti ka, eti gos leh ilbooyiiskoo ꞌdooꞌdi gos kireeste iergate, gisi gurnaankiiski sabiib yowte.

³ Iꞌdaasenyi ꞌdooꞌdi gos kireeste, ilbooy a khabte one, jahe, dahano marah sooꞌdiiche.

⁴ Toro ilbooyoo addan icho iergate. Kan matah guꞌddeene, lakhaanyo kadoween.

⁵ Koo addan ergate, kaas yigaaseen. Too addane ittaawe laka ergate, icho la gaasoo jaheene, gaasoo laka yigaaseen.

⁶ “Etoo kaldaye us ergati ꞌhade, a inankoo, ki us weyti ꞌdoone. ꞌDaꞌddaboka inankiis ergate. ‘ꞌDee inankeey a inkaanyitta one,’ iche essa.

⁷ “Iꞌdaasenyi ꞌdooꞌdi gos kireeste mehe isiyidah ya, ‘Ki dahal leh kalla. Kaaleya a nigaase ꞌdee dahalhiis weheen a yitaaheen.’

⁸ ꞌDeerka khabteene, yigaaseene, gosi sabiib khariis iseyeen.

⁹ “Kamalda bal, eti gosi sabiib leh ꞌdeerka mehe yeela? A yamiite ꞌdooꞌdaas yagiise, ꞌdee gos ꞌdooꞌdoo addan gessa.

¹⁰ Atin injire waha Chiirnaanneti Waakh ka ma soomin a? “ ‘Daakki ꞌdooꞌdi minan diso ꞌdiiꞌde, iche tirrinki dagaheete min tiiro yitah.

¹¹ Kamure waha yeele, indoheen ka la weyti haagganyahiin!’ ”

¹² ꞌDeerka weynaanti Yaꞌhuud jiti iche Yeesso kakhabatti yowatte, a mehe saggi us mammahtaas ka woricho ikaayyeede iche garteen. Iꞌdaasenyi urure karooraane, ꞌdeerka katabte iratte.

Farissaayo Yeesso kooddi Kaaysar a igunna worsatta

¹³ Farissaayotoo ichoow ꞌdooꞌd ꞌHerood koo Yeesso iergateen angeye gelin ꞌdoonta yeediis ka.

¹⁴ ꞌDooꞌd Yeesso iyimiyye, wihi us iyidah, “Eti ween, nah saggi at rum ikanokhan a garanna. At et at ibaasso mele, weyneetteey ichoow kuus ka ba. Iꞌdaasenyi jiti Waakhe at enenyet abisso ichoow runti Waakh a israahaan. Kaaysarhi weene kooddi liiguto a mujjum a bal mujjum mee?

¹⁵ A igunna bal ma igunno?” Iꞌdaasenyi Yeesso saggi icho isikaayyeelaan garte, wihi us worsate, “Atin a iꞌdoh ani angey igelin iꞌdoontaan? Bal chilinkoo Rooma ikeena, a argo.”

¹⁶ Chilinkoo liikeene. Chirraakka wihi uꞌ worsate, “Foola ichoow magaha kachiiran, a keyya?” Wihi icho ilaabeen, “A koo Kaaysar.”

¹⁷ Yeesso chirraakka iiyeyye, “Kaaysar, wihi wihiise iguta, Waakh la wihi wihiise iguta.” ꞌDooꞌd usu weyti kagirmeeste.

Sadukaayo wori omootti lakasookaho worsatta

¹⁸ ꞌDeerka ꞌdooꞌdoo Sadukaayo Yeesso iyimiyye wohoo worsate. ꞌDooꞌda la ꞌdooꞌdi tuume berri ma sookaho iche essa.

¹⁹ “Eti ween, Muusa goorat mehe inno ichiire ya, ‘Chiꞌ etoo walaaliis yumuyye, makhaabál katabe iꞌdaasenyi nyaakhut ikhabin, etaas makhaabassaas a disti, walaaliis nyaakhut a idelo.’

²⁰ Reeroo teebeenye isleedesse a jire. Ki ween min diste nyaakhut ma ꞌheline, buje.

²¹ Ki lammaatteet muunkhotaas diste, iꞌdaasenyi nyaakhut ma ꞌheline, buje. Ki seyyahnaatteet laka iꞌdaas on eheneet.

²² Teebaccho ba, koo nyaakhut katabe mele. ꞌDaꞌddaboka makhaabale laka tumuy.

²³ Maanti ꞌdooꞌdi tuume lasookahcho, etichekoh makhaabassiis tateeh teebaccho la a disteenee?”

²⁴ Yeesso wihi us ilaabe, “Atin wihi Chiirnaanneti Waakh enenyet abisso ichoow miigti Waakh ma garattaan. Jeenteta menya jiti baabule ikijirtaan?

²⁵ Maanti ꞌdooꞌdi tuume sookaho, min ma distaane ommos mindischo ka ma ladiibo. Icho tuumman iꞌdi herti Waakhe goobi Waakh kijirto yateehiin.

²⁶ Atin wori ꞌdooꞌdi tuume omoot lakasookahcho miinsan ma soomin a? Rumanka buuggi Muusa chiire ka wori geeyi hidaad goyaka bolkho a agarteen. Wihi Waakh iyidah, ‘Ani a Waakh Aburaaham, a Waakh Isakh, a Waakh Yaakoobo.’

²⁷ Usu Waakkhi ꞌdooꞌdi tuume mee, iꞌdaasenyi a Waakkhi ꞌdooꞌdi jiro. Atin weyti khufteen, atinhi ꞌdooꞌdi tuume kol us toro isookahin koogtihiin.”

Amuri amurre tuumman kussan

²⁸ Etoo la a tagaanki amurre yimiyye wihi icho kahawwoochaan daage. Saggi Yeesso yeed ieysiiche arge, wihi us Yeesso worsate, “Amurreti Waakh tuumman goyaka, koh weyti khumman?”

²⁹ “Ki wihi addan tuumman kuto a kan,” Yeesso iyidah, “ ‘Daaga, yaafohi Issiraayeloow! Kamureenki Waakhe a Kamuroo kalday on.

³⁰ Kamuri Waakkhaahe uuraah tuumman ka ichoow rubeytaah tuumman ka ichoow malaah tuumman ka ichoow miigtaah tuumman ka ꞌdoon.’

³¹ Ki lammaatteet la a kan, ‘Ollokkaah geeddi at isꞌdoonto ꞌdoon.’ Amuri amurreta kussan, ma jiro.”

³² Et wihi us soolaabe, “Eti weenoow a eysiisse. Wihi at tidah ka at a eysiisse, Waakkheen a koo kalday one, koo addan ma jiro, usu on menye.

³³ Kamuri Waakkhaahe uuraah tuumman ka ichoow garanti at walah garatti tuumman ka ichoow miigtaah tuumman ka ꞌdoon. Ichoow ollokkaah geeddi at isꞌdoonto, ꞌdoon. ꞌDooninta naffi tuum Waakh liigubo ichoow soorriyo tuumman a kutta.”

³⁴ Yeesso saggi makhaabal yeedi khara isoolaabe arge, wihi us iyidah, “At dakhi Waakh kadeeraan mele.” Uus maantaas la et usu wohoo addan worsan iggo mele.

Ki Lasubhe a hiiy Dawuudhi karnat eheneet a?

³⁵ Geedda Yeesso uranti minki Waakhe buure ka Yeedi Waakh enenyet abcho, wihi us worsate, “A iꞌdoh tagaammeti amurre, Ki Lasubhe a hiiy Dawuud ielatta?

³⁶ Dawuud rubeytiis Rubeyti Munyee ka yeyyeedaayi mehe yidah ya, “ ‘Waakkhi Kamure wihi us Kamureey iyidah, Dabankeeyki miigeete antoot orrommo, ichoowka chiiytaah tuum dahanohaah a soogesso.’

³⁷ Dawuud rubeytiis usu Kamure kawaha, saggoh ꞌdeerka Ki Lasubhe hiiy Dawuud iyahe?” Urur tuumman hamaadi buure ka dagansate.

Yeesso ꞌdooꞌd tagaammeti amurre yuubsada iyadeeh

³⁸ Yeesso urur walah abchaayi wihi us iyidah, “Tagaammeti amurre yuubsada! Wihi icho weyti ꞌdoonaan a ichohi darfohi hahhaaggane derdeer leesohti, toro la sokkoyyo ka weyti inkaanyit ka labariiticho.

³⁹ Toro la chiꞌ minki weysiite Yaꞌhuud ommos sukuukuyyo lagele, wihi icho weyti ꞌdoonaan a ichohi meessi weyti lakiinkaanyito orronti.

⁴⁰ ꞌDooꞌda muunkhoyyo ekkeesta, hoolahicho kakhaataan. Chiꞌiche weysatti la, enenyeti haaggane iskaayyeessa, weysi derdeeraassa. ꞌDooꞌda Waakh sinati weyti kutto igoocha.”

Sadakhati makhaabassoo muunkhee bihisse

⁴¹ Yeesso minki Waakhe buure ka inti sadakha lakachibo hagga orronte, enenyeti chilimme saanduukhi chilimme lakalugꞌdo kichibo ꞌdeyꞌdooche. ꞌDooꞌdi ittaawenye kamurree, chilimmeti buure meel kichibe.

⁴² Iꞌdaasenyi makhaabassoo muunkheenye miskiine timiyye, chilim lamma wohoo rucchul laka ibihin meel kaluguꞌdde.

⁴³ Yeesso abattitiis isiwahe, wihi us iyidah, “Rume atin icheeka, muunkhota miskiine, iche saanduukhi chilimme lakachibo, ꞌdooꞌdi addan ꞌdirihiis wihi buure kaluguꞌdde.

⁴⁴ Kamurre tuumman kamurroonkiche ka sadakhatoore bihisse, iꞌdaasenyi iche miskiinkiche ka wihi iche kanoossahe tuummane bihisse.”